បាត់ដំបង៖ ការរកដំណោះស្រាយរវាងសហគមន៍”បឹងតាអឿ”ជាមួយនឹងមនុស្សមានទឹកលុយ មួយគ្រួសារ ត្រូវជាប់គាំងនៅត្រឹមអាជ្ញាធរខេត្ត បន្ទាប់ពីមន្ទីរជំនាញចុះដោះស្រាយតាមបែបបុគ្គលនិយម រាប់សិបលើករួចមក នៅតែគ្មានប្រយោជន៍សម្រាប់ប្រជាពលរដ្ឋដែល
រស់នៅក្នុងភូមិក្បាលថ្នល់ ឃុំកំពង់ព្រៀង ស្រុកសង្កែ ខេត្តបាត់ដំបង ទាំង67គ្រួសារនៅក្នុងសហគមន៍ ដោយសារតែប្រជាពលរដ្ឋទាំងនោះបានប្រឆាំងតវ៉ាទាមទារយកដីបឹងដែលមានក្បាលដីលេខ67 ដែលជាបឹងតាំងពីបុរាណ មកទុកជាសម្បត្តិរដ្ឋ ប៉ុន្តែបែរជាការិយាល័យ និងមន្ទីរជំនាញពុសជ្រៀកផ្ទៃបឹងនោះទៅអោយបុគ្គល ធ្វើជាសម្បត្តិឯកជនទៅវិញ។
កន្លងមកដែលមានរយ:ពេលប៉ុន្មានឆ្នាំមកហើយនោះ មន្ទីរជំនាញនិងអាជ្ញាធរភូមិ ឃុំ
ស្រុក ធ្លាប់បានប្រកាសនិងសម្រេចរួចមកហើយ នៅក្នុងវេទិការសាធារណ:មួយដែលបានធ្វើឡើងនៅក្នុងទីតាំងវត្តបឹងឈូក ស្ថិតនៅក្នុងឃុំកំពង់ព្រៀង ដោយចាត់ទុកដីបឹងតាអឿជាសម្បត្តិរដ្ឋ គឺមិនអនុញ្ញាតិអោយបុគ្គល ឬអង្គភាពណាមួយយកដីបឹងនេះធ្វើជាកម្មសិទ្ធិឯកជនជាដាច់ខាត។ ហើយនៅក្នុងអំឡុងឆ្នាំ2015នេះដែរ លោកសួន សាវ៉េត អភិបាលស្រុកសង្កែក៏ធ្លាប់បាន ចេញដិការនិរាករណ៍ម្តងរួចមកហើយដែរ ដោយបានកំណត់ថាដីបឹងតាអឿដែលមានក្បាលដីឡូតិ៍ លេខ67គឺជាបឹងយ៉ាងពិតប្រាកដ ដែលចាត់ទុកថាជាបឹងរបស់រដ្ឋផងដែរ ដោយសារតែនៅក្នុងអំឡុង ឆ្នាំ2008ប្រជាពលរដ្ឋដែលរស់នៅក្នុងសហគមន៍ទាំងអស់ បានទទួលនូវប្លង់កាន់កាប់កម្មសិទ្ធិស្របច្បាប់ គឺមានន័យថាមន្ទីររៀបចំដែនដីនគរូបនីយកម្ម និងសំណង់ ដែលដឹកនាំដោយលោក អនុប្រធានចៅ គឹមអូន (បច្ចុប្បន្នចូលនិវត្តន៍) បានចងក្រងជាប្លង់ប្រព័ន្ធ ព្រមទាំងបានកំណត់យ៉ាងច្បាស់ ថាឡូតិ៍លេខ67គឺជាផ្ទៃបឹងតាអឿ។
ប្រមាណជាពីរខែកន្លងទៅថ្មីៗនេះ នៅពេលដែលប្រជាពលរដ្ឋទាំងអស់នៅក្នុងសហគមន៍
បានទទួលនូវលិខិតអនុញ្ញាតិពីលោកអភិបាលនៃគណ:អភិបាលខេត្ត ដែលតម្រូវអោយពួកគេធ្វើការស្តារបឹងនេះឡើងវិញ ដើម្បិបានទឹកប្រើប្រាស់នៅក្នុងសហគមន៍នារដូវប្រាំងនោះ ស្រាប់តែមានទូរស័ព្ទ អន្តរាគមន៍ពីនេះពីនោះ ដោយបានបញ្ជាអោយប្រជាពលរដ្ឋផ្អាកសកម្មភាពការស្តារបឹងនេះជាបណ្តោះអាសន្ន ដោយសារតែមានឈ្មោះហេង ហុង និងអ្នកស្រីម៉ាក់ ចាន់ថន ដែលចេញមុខដោយលោក> ឡេង ស្រ៊ុន បានមកប្រកាសថាដីបឹងនេះគឺជាដីលំនៅដ្ឋានរបស់ពួកគេទៅវិញ។
រឿងដែលស្មានមិនដល់គឺនៅពេលដែលប្រជាពលរដ្ឋទាំងអស់ កំពុងប្រឆាំងតវ៉ាទៅអាជ្ញាធរ
គ្រប់លំដាប់ថ្នាក់ដើម្បីទាមទារយកបឹងនេះមកទុកជាសម្បត្តិរដ្ឋ ស្រាប់តែលោកអ៊ូ ដារី ប្រធានមន្ទីរ រៀបចំដែនដីនគរូបនីយកម្ម និងសំណង់បានលួចសំងំពុសជ្រៀកដីឡូតិ៍លេខ67នោះទៅជាក្បាលដី លេខ1338និង1339ទៅវិញក្នុងគោលបំនងប្រគល់ដីនេះទៅអោយបុគ្គលដែលមានទឹកប្រាក់ នាអំឡុង ឆ្នាំ2014 យ៉ាងស្ងៀមស្ងាត់ ដែលធ្វើអោយប្រជាពលរដ្ឋមានការមិនពេញចិត្តព្រមទាំងបានផ្ទុះកំហឹង យ៉ាងខ្លាំងទៅនឹងទង្វើនេះ រហូតដល់ប្រជាពលរដ្ឋហ៊ានបោះបង្គោលលើកបដា ដែលមានខ្លឹមសារ សុំអោយសម្តេចតេជោ និងសម្តេចកិត្តិព្រឹទ្ធបណ្ឌិត ជួយរកយុត្តិធ៌មដើម្បីទាមទារយកបឹងនោះមកទុក ជាសម្បត្តិរដ្ឋ និងដើម្បីរក្សាទុកទឹកស្រោចស្រពស្រែប្រាំងនៅក្នុងតំបន់នេះនារដូវប្រាំងផងដែរ។មិនត្រឹម
តែប៉ុណ្ណោះទេ គឺពួកគាត់បានបញ្ជូនឯកសារដែលពាក់ព័ន្ធនឹងបឹងតាអឿនេះទៅដល់លោកអភិបាលខេត្ត ថែមទៀតផងដើម្បីអោយលោកជួយរកដំណោះស្រាយលើបញ្ហានេះ។
ប៉ុន្តែរហូតមកដល់ពេលនេះ អាជ្ញាធរខេត្តនៅតែបន្តទៅអោយខាងជំនាញជាអ្នកដោះស្រាយដដែល ដែលធ្វើអោយប្រជាពលរដ្ឋមានការថ្នាំងថ្នាក់ចិត្តជាខ្លាំង ដោយសារតែពួកគាត់យល់ថាខាង មន្ទីរជំនាញមានទំនោរបែបបុគ្គលនិយមរួចទៅហើយ។ក្នុងជំហររបស់ប្រជាពលរដ្ឋនាពេលនេះគឺប្រឆាំង ដាច់ខាតមិនអនុញ្ញាតិអោយបុគ្គលមួយក្តាប់តូចនេះទន្ទ្រានយកដីបឹងតាអឿមកធ្វើជាកម្មសិទ្ធឯកជនឡើយព្រោះនៅក្នុងតំបន់នេះគ្មានប្រភពទឹកទាល់តែសោះ ដោយសំអាងទៅលើបឹងនេះតែមួយគត់ជាទីរំពឹង
ក្នុងការរក្សាទឹកទុកប្រើប្រាស់នៅក្នុងសហគមន៍។
តាមរយ:ទូរស័ព្ទកាលពីថ្ងៃទី20-5-15 វេលាម៉ោង11,09នាទីព្រឹក លោកអភិបាលខេត្ត
ច័ន្ទ សុផល បានលើកឡើងថា បញ្ហានេះលោកនឹងខិតខំព្យាយាមធ្វើការសម្របសម្រួលលើភាគី ទាំងសងខាងដើម្បីបញ្ចប់នូវការវិវាទនេះ ប៉ុន្តែបើលោកអស់លទ្ធភាព ព្រមទាំងមិនអាចរកច្រកចេញមិនបានទេនោះ គឺលោកនឹងបញ្ជូនទៅតាមដំណាក់កាលនីមួយៗបន្តទៅទៀត។
រឿងបញ្ហា”បឹងតាអឿ”គឺជាជំងឺមហារីកមួយដែលមានសភាពរុាំរ៉ៃជាទីបំផុត ព្រោះបានអូស
បន្លាយពេលមកជាយូរឆ្នាំមកហើយគឺតាំងពីអាណាត្តិមុនមកម្ល៉េះ រហូតមកទល់នឹងពេលនេះនៅតែ មិនអាចរកដំណោះស្រាយបាន ដោយកំពុងតែនៅជាប់គាំងត្រឹមអាជ្ញាធរខេត្តតែម្តង ចំណែកប្រជាពលរដ្ឋនៅក្នុងសហគមន៍បឹងតាអឿទាំងមូលកំពុងរង់ចាំដោយក្តីអន្ទះសារ ដោយសារតែរដូវភ្លៀងកាន់តែខិតជិតចូលមកដល់ទៅហើយដែរ៕
