បន្ទាយមានជ័យៈប្រធានសហគមន៍នេសាទចំនួន៣ បានប្តឹងលោកមេឃុំសំបួរ របស់ស្រុកមង្គលបូរី ខេត្តបន្ទាយមានជ័យ បានធ្វើសកម្មភាពភ្ជួរយកដីបឹងធម្មជាតិ ចំនួន៣ ដែលស្ថិតនៅក្នុងភូសាស្ត្រសហគមន៍ដូនឡឹក ធ្វើជាកម្មសិទ្ធនិងផ្តួលរំលំបង្គោលបេតុងកំណត់ព្រំដីបឹង ។
តាមពាក្យបណ្តឹង និងការលើកឡើងពីប្រធានសហគមន៍ដូនឡឹក សហគមន៍ស្រណាល សហគមន៍សំបួរ បានអោយដឹងថា សកម្មភាពភ្ជួររាន រំលោភយកដីបឹងធម្មជាតិពីសំណាក់លោក គង់ សុគន្ធ មេឃុំសំបួរបានធ្វើឡើងកាលពីយប់ថ្ងៃទី១៧ ឧសភា ២០១៥ កន្លងទៅនេះ ហើយការភ្ជួររាស់នេះក៏បាន ផ្តួលរំលំនូវបង្គោលកំណត់ព្រំប្រទល់បឹងធម្មជាតិ ទាំង៣ ដែលមានបឹងដង្កៀបក្តាមធំ បឹងដង្គៀបក្តាមតូច និងបឹងត្រពាំងព្រីង អស់ចំនួន៨បង្គោលដែធ្វើអំពីប៉េតុង ក្នុងចំណោមបង្គោលទាំងអស់១៦ដើម ។ បឹងដែលលោកមេឃុំរំលោភយកនេះមានផ្ទៃដីចំនួនប្រមាណជាបីហិចតា ហើយបឹងទាំង៣នេះស្ថិតក្រោមការមើលថែ និងគ្រប់គ្រងរបស់សហគមន៍ដូនទ្បឹក។
ជាមួយនិងបញ្ហាខាងលើនេះលោក ហ៊ី សេងគ្រី នាយសង្កាត់ជលផលស្រុកមង្គលបូរី បានបញ្ជាក់អោយដឹងថា ពិតជាមានការភ្ជួររាន លើដីបឹងធម្មជាតិខាងលើពីសំណាក់លោកមេឃុំសំបួរពិតមែន តែដែលថាគាត់រំលោភយកដីបឹងគឺមិនអាចទៅរួចទេ ដោយសាតែបឹងនេះត្រូវបានកំណត់ថា ជាបឹងធម្មជាតិរួចហើយ ដោយឡែកការភ្ជួររំលោភ និងប៉ះបង្គោលកំណត់ព្រំបឹងខាងលើ មិនមែនលោកមេឃុំផ្ទាល់ជាអ្នកធ្វើនោះទេ គឺអ្នកបើកត្រាក់ទ័រ មិនប្រយ័ត្ន និងជ្រុលចូលដីបឹង ហើយករណីនេះនៅព្រឹកម្សិលមិញលោកមេឃុំបាន ចាត់អោយមានការបោះបង្គោលឡើងវិញ ។
ក្នុងរឿងនេះមិនអាចទំនាក់ទំនងសុំការបំភ្លឺពីលោក គង់ សុគន្ធ មេឃុំសំបួរបានទេ៕ដោយ:ឃិន គន្ធា
