នៅវេលាម៉ោងប្រមាណជាង៩ព្រឹក ថ្ងៃទី២១ ខែឧសភា ឆ្នាំ២០១៥ ការភ្ញាក់ផ្អើលមួយរបស់ប្រជាពលរដ្ឋបានកើតឡើង ខណៈដែលអ្នកស្រុកទៅបេះត្រួយស្តៅ បានប្រទះឃើញ សពបុរសម្នាក់ដេកស្លាប់ហើមស្អុយរលួយនៅគល់ដើមព្រីងមួយ ចំណុចក្រាំងឆាន ស្ថិតក្នុងភូមិផ្សារ ឃុំផ្សារ ស្រុកបរិបូរណ៌ ខេត្តកំពង់ឆ្នាំង ដំបូងឡើងសពជនរងគ្រោះខាងលើ មិនត្រូវបានស្គាល់អត្តសញ្ញាណឡើយ ។
សមត្ថកិច្ចនគរបាលស្រុកបរិបូណ៌ បាននិយាយអោយដឹងថា ក្រោយពីបានទទួលព័ត៌មាននេះ សមត្ថកិច្ច ក៏បានទៅព័ទ្ឋខ្សែការពារជុំវិញសព តាមជំនាញបច្ចេកទេសទាក់ទងតាមប៉ុស្តិ នគរបាលរដ្ឋបាលក្នុងស្រុក ដើម្បីជូនដំណឹងដល់គ្រួសារណា ដែលមានបាត់សមាជិករបស់ខ្លួន រហូតដល់ម៉ោងប្រមាណជាង១១ព្រឹក ថ្ងៃដដែល បានទទួលព័ត៌មានថា ប្រជាពលរដ្ឋនៅភូមិដំរីកូន ឃុំអញ្ចាញរូង ស្រុកបរិបូរណ៌ ខេត្តកំពង់ឆ្នាំង បានបាត់សមាជិកគ្រួសារម្នាក់ ។ ក្រោយមកក្រុមគ្រសារខាងលើ បានមកពិនិត្យសពជនរងគ្រោះ ទើបដឹងថា ជាក្រុមគ្រួសារខ្លួន មានឈ្មោះ វង់ សុខ អាយុ៤០ឆ្នាំ មានប្រពន្ឋឈ្មោះ ជាម វ៉ុន មានកូនស្រីម្នាក់ ។
បុរសម្នាក់ឈ្មោះ ផ្លង់ បុល អាយុ៣៩ឆ្នាំ ដែលត្រូវជាក្មួយបង្កើត ជនរងគ្រោះ បាននិយាយអោយដឹងថា កាលពីថ្ងៃទី១៧ ខែឧសភា ឆ្នាំ២០១៥ រូបគាត់និងឪពុកមាដែលស្លាប់នេះ បាននាំគ្នាដើររកក្របីដែលបានបាត់ចំនួន៥ក្បាល ពេលដើរមកដល់ចំណុចមាត់អូរ បានឃើញដានក្របី ហើយបានបំបែកគ្នាដើររក រហូតល្ងាចនៅតែមិនឃើញក្របី រូបគាត់ក៏ដើរមកកន្លែងដើមវិញ តែមិនឃើញឪពុកមានោះទេ គាត់ក៏ដើរត្រឡប់ទៅផ្ទះវិញ។ ស្រាប់តែឃើញក្របីទាំង៥ក្បាល ដើរមកដល់ភូមិវិញ ប៉ុន្តែមិនឃើញឪពុកមារនោះឡើយ និងក៏បានប្រាប់ដល់សមត្ថកិច្ចមូលដ្ឋានដែរ លុះស្អែកឡើង នាំគ្នាតាមរកទៀតនៅតែមិនឃើញ ។ រហូតដល់ព្រឹកថ្ងៃទី២១ ខែឧសភា នេះស្រាប់តែប្រជាពលរដ្ឋ ដែលនាំគ្នាទៅបេះត្រួយស្តៅ បានធំខ្លិនស្អុយ ក៏នាំគ្នាដើររក ក៏បានប្រទះសពឪពុកមារគាត់ដេកស្លាប់ នៅក្រោមដើមព្រីង ក្នុងក្រឡុកមួយ ។
នៅពេលពិនិត្យធ្វើកោសល្យពិច្ច័យរួចមក សមត្ថកិច្ចបាននិយាយអោយដឹងថា នៅលើសាកសព ពុំមានស្លាកស្នាមអ្វី គួរអោយសង្ស័យជាអំពើឃាតកម្មឡើយ ហើយសមត្ថកិច្ច ក៏ប្រគល់សពជនរងគ្រោះអោយទៅក្រុមគ្រួសារ យកទៅធ្វើបុណ្យទានតាមប្រពៃណី ៕
