បាត់ដំបង: មានការភ្ញាក់ផ្អើលមួយបានកើតឡើងដោយសារតែមានសំលេងផ្ទុះគ្រាប់មីនយ៉ាងខ្លាំង ដែលបានបង្កអោយយុវជនម្នាក់រងរបួសទម្ងន់ទៅលើភ្នែកទាំងសង្ខាង នៅពេលដែលគេកំពុងភ្ជួរស្រែដាស់ដី ត្រង់ចំនុចខាងជើងវត្តអន្លង់ក្តីប្រហែល5គីឡូម៉ែត្រ ស្ថិតក្នុងឃុំបួរ ស្រុកភ្នំព្រឹកខេត្តបាត់ដំបង កាលពីថ្ងៃទី22-5-15 វេលាម៉ោង10,30នាទីព្រឹក បានជាន់ទៅលើគ្រាប់មីនតោនបណ្តាលអោយផ្ទុះឡើងលាន់ស្នូរដូចរន្ទះ។តាមសេចក្តីរាយការពីប្រភពដែលនៅតាមបណ្តោយព្រំដែនកម្ពុជា ថៃបានអោយដឹងថានៅមុនពេលកើតហេតុ មានយុវជនម្នាក់ឈ្មោះប៊ុន បូរី អាយុ28ឆ្នាំ រស់នៅភូមិអន្លង់ក្រូច ឃុំបួរស្រុកភ្នំព្រឹក ដែលមានដីស្រែនៅម្តុំអន្លង់ក្តី បានរៀបចំត្រាក់ទ័រដើម្បីចេញទៅភ្ជូរស្រែនៅទីនោះ ដោយសារតែភ្លៀងក៏ចាប់ផ្តើមធ្លាក់ជា
បណ្តើរៗហើយដែរ។ ប្រភពដដែលបានបន្តថា ខណ:ពេលដែលយុវជនរូបនេះកំពុងធ្វើការភ្ជួរដីនោះស្រាប់តែកង់មុខរបស់ត្រាក់ទ័របានកិនទៅលើគ្រាប់មីនតោន ដែលបណ្តាលអោយផ្ទុះឡើងកក្រើកធរណីព្រមទាំងមានការភ្ញាក់ផ្អើលយ៉ាងខ្លាំងដល់ប្រជាពលរដ្ឋ និងសមត្ថកិច្ចដែលស្ថិតនៅក្បែចំនុចកើតហេតុនោះ ព្រមទាំងបាននាំគ្នារត់សំដៅទៅកន្លែងកើតហេតុដើម្បីជួយដល់ជនរងគ្រោះ។នៅទីនោះគេសង្គេតឃើញថា ជនរងគ្រោះមានសភាពរងរបួសត្រង់ភ្នែកទាំងសង្ខាងដែលធ្វើអោយមើលអ្វីលែងឃើញ ព្រមទាំងមានរបួសនៅលើខ្លួនប្រាណបន្តិចបន្ទួច ដោយឡែកត្រាក់ទ័រត្រូវបានខ្ទេចខ្ទីអស់មួយផ្នែកខាងមុខ ដោយសារតែវាស្ថិតនៅចំពីលើគ្រាប់មីន។ភ្លាមៗទាំងសមត្ដកិច្ចក៏ដូចជាប្រជាពលរដ្ឋបានរៀបចំដឹកបញ្ជូនជនរងគ្រោះទៅ
កាន់មន្ទីរពេទ្យបង្អែកខេត្ត ដើម្បីសង្គ្រោះបន្ទាន់ ដោយសារតែមុខរបួសមានសភាពធ្ងន់ធ្ងរខ្លាំងពេក។គួររំលឹកដែរថា ដីស្រែនេះកន្លងមកធ្លាប់បានធ្វើស្រែអស់រយ:ពេល5ឆ្នាំមកហើយ ប៉ុន្តែមិនដែលមានបញ្ហាអ្វីកើតឡើងនោះឡើយ។ចាប់តាំងពីដើមឆ្នាំ2015មកទល់ពេលនេះ ករណីផ្ទុះគ្រាប់មីនតោននៅក្នុងស្រុកភ្នំព្រឹកមានចំនួនពីរលើកមកហើយ ដោយលើកទីមួយបានកើតឡើងកាលពីថ្ងៃទី5-5-15 វេលាម៉ោង3,40នាទីល្ងាច ត្រង់ចំនុចភូមិអូរតាសុខ ឃុំពេជ្រចិន្តា ដែលបានសម្លាប់មនុស្សម្នាក់នៅនឹងកន្លែងកើតហេតុតែម្តង
បញ្ហានេះក៏មានការសន្និដ្ឋានពីកំលាំងសមត្ថកិច្ចជំនាញផងដែរថា ការផ្ទុះគ្រាប់មីនតោនដែលនៅសេសសល់ពីសម័យសង្គ្រាមនេះគឺងាចបណ្តាលមកពីការស្លុះកង់ ព្រោះក្រោយពេលភ្លៀងធ្លាក់ដីស្រែ ចំការអាចមានសភាពជ្រាយ ដូច្នេះអាចធ្វើអោយកង់ត្រាក់ទ័រដែលមានទម្ងន់ធ្ងន់នោះត្រូវសង្កត់ដល់ក្បាលគ្រាប់មីននោះជាមិនខាន។ម្យ៉ាងវិញទៀត នៅតំបន់នេះគឺជាសមរភូមិក្តៅរវាងទ័ពព្រៃជាមួយនឹងទ័ពរបស់រាជរដ្ឋាភិបាលផងដែរ៕
