ខេត្តព្រះវិហារ
គំនរឈើហ៊ុបមូលរាប់សិបកំណាត់ទើបកាប់បំផ្លាញថ្មីៗដែលជនល្មើសធ្វើសន្និធិខុសច្បាប់នៅក្នុងព្រៃជ្រៅឆ្ងាយពីផ្លូវជាតិលេខ៩ប្រមាណ១ពាន់ម៉ែត្រត្រូវជំនាញមេព្រៃសហការជាមួយកំលាំងនគរបាលមូលដ្ឋាននិងនគរបាលប្រឆាំងបទល្មើសសេដ្ឋកិច្ចនៃក្រសួងមហាផ្ទៃធ្វើការបង្ក្រាបរឹបអូសកាលពីព្រឹកថ្ងៃទី២៤ឧសភា២០១៥ស្ថិតនៅចំណុចក្បែរព្រៃការពារអភិរក្សព្រះរការភូមិពោធិ៍ទាបឃុំម្លូរព្រៃ១ស្រុកឆែបខេត្តព្រះវិហារ។
តាមសេចក្ដីរាយការណ៍បានអោយដឹងថាឈើហ៊ុបមូលខុសច្បាប់ទាំងអស់នោះត្រូវបានលោកអ៊ិតភូម្រានាយខណ្ឌរដ្ឋបាលព្រៃឈើខេត្តជួយបញ្ជូនរថយន្តស្ទូច១គ្រឿងទៅដឹកជញ្ជូនចេញពីព្រៃយកទៅរក្សាទុកនៅអង្គភាពផ្នែករដ្ឋបាលព្រៃឈើឆែបរួចរាល់ហើយនៅថ្ងៃដដែលនោះ។កំលាំងសមត្ថកិច្ចចុះបង្ក្រាបរួមមានលោកនាយសង្កាត់រដ្ឋបាលព្រៃឈើកំពង់ស្រទ្បៅលោកនាយផ្នែករដ្ឋបាលព្រៃឈើឆែបនិងលោកអភិបាលស្រុកឆែបដោយបានរាយការណ៍ជូនលោកព្រះរាជអាជ្ញាអមសាលាដំបូងខេត្តផងដែរ។
លោកសេងលាងនាយសង្កាត់រដ្ឋបាលព្រៃឈើកំពង់ស្រទ្បៅបានអោយដឹងនៅព្រឹកថ្ងៃទី២៥ឧសភាថាវត្ថុតាងឈើហ៊ុបមូលដែលកំលាំងចម្រុះបង្ក្រាបបានមានចំនួន៣០កំណាត់ជាគំនរឈើអញ្ញតិជន។កំណាត់ឈើហ៊ុបទាំងអស់នោះត្រូវជនខិលខូចកាប់បំផ្លាញទ្រង់ទ្រាយធំពីតំបន់ព្រៃការពារព្រះរការួចហើយដឹកជញ្ជូនយកមកលាក់ស្តុកទុកនៅភូមិពោធិ៍ទាបដែលជាទីតាំងបង្ក្រាបរឹបអូស។
លោកនាយសង្កាត់បន្តទៀតថាឈើហ៊ុបមូលទាំងនោះមានចំនួន៣០កំណាត់ស្មើនឹង១៩,០៨ម៉ែត្រគូបមុខកាត់ចាប់ពី៣៥ដល់៦០សង់ទីម៉ែត្រប្រវែង៤ទៅ៥ម៉ែត្រជាឈើលេខ១ប្រភេទឈ្លីក។លោកបញ្ជាក់ថានឹងបញ្ចូនសំណុំរឿងនេះទៅកាន់តុលាការខេត្តព្រះវិហារដើម្បីចាត់ការទៅតាមផ្លូវច្បាប់៕
