ខេត្តសៀមរាប៖ក្រុមយុវជនជាង៣រយនាក់ មកពីតាមបណ្ដាខេត្ដផ្សេង និងរាជធានីភ្នំពេញ បាននាំគ្នាជិះកង់នៅតំបន់ទេសចរអង្គរ ដើម្បីរ៉ៃអង្គាសប្រាក់ ជួយឧត្ថម្ភដល់មន្ទីរពេទ្យកុមារគន្ធបុប្ផាឬជ័យវរ្មនទី៧ ព្រមទាំងដើម្បីសុខភាព បរិស្ថាន និងបង្ហាញពីការសាមគ្គីភាព ។
ក្បួនជិះកង់នេះបានដង្ហែរចេញពីចំណុចផ្សារសាមគ្គី កាត់តាមបណ្ដាផ្លូវសំខាន់ៗមួយចំនួន ក្នុងក្រុងសៀមរាប ឆ្ពោះទៅកាន់តំបន់ប្រាសាទអង្គរវត្ដ នៅព្រឹកថ្ងៃអាទិត្យនេះ។
អ្នករៀបចំកម្មវិធីលោក គីម ប៊ុនថាន់ ប្រាប់ ថា នៅកន្លែងក្បួនជិះកង់ននោះថា ក្រុមយុវជនទាំងនោះមកពីតាមបណ្ដាខេត្ដផ្សេងៗដូចជា ខេត្ដសៀមរាប បាត់ដំបង និងរាជធានីភ្នំពេញ ដោយពួកគេបានចំណាយថវិកាផ្ទាល់ខ្លួនរបស់គាត់។លោកថា ព្រឹត្ដិការជិះកង់នេះ ដើម្បីរ៉ៃអង្គាសប្រាក់ផ្ដល់ដល់មន្ទីរពេទ្យកុមារគន្ធបុប្ផា និងបង្ហាញពីភាពសាមគ្គីភាព ព្រមទាំងដើម្បីបរិស្ថាននិងសុខភាពផងដែរ។ លោក គីម ប៊ុនថាន់ បញ្ជាក់ថា ថវិកាដែលបានមកពីសប្បុរជននិងការជិះកង់នេះ សល់ពីចំណាយ លោកនឹងប្រគល់ជូនមន្ទីរពេទ្យកុមារ ឬមន្ទីរពេទ្យជ័យវរ្មនទី៧។
យុវតីមួយរូបដែលចូលរួមជិះកង់នេះ កញ្ញា ភួង ម៉ាលីយ៉ា យល់ថា ការជិះកង់នេះ មិនត្រឹមតែជួយឲ្យមានសុខភាពល្អ និងបរិស្ថានប៉ុណ្ណោះទេ ថែមទាំងបង្ហាញពីការរួមចំណែកជួយសង្គមផងដែរ។ កញ្ញាបន្ដថា មន្ទីរពេទ្យកុមារគន្ធបុប្ផាបានជួយសង្គ្រោះដល់កុមារកម្ពុជារាប់លាននាក់ ហើយត្រូវការជំនួយពីសប្បុរស់ជនជាចាំបាច់ពីសប្បុរស់ជន ដូច្នេះក្នុងនាមជាយុវជនខ្មែរមួយរូប ត្រូវមានវិឆន្ទះរួមចំណែកជួយដល់សង្គម។កញ្ញាអំនាវដល់យុវជនគ្រប់រូប ឲ្យចូលរួមផ្ដល់មូលនិធិ ដល់មន្ទីរពេទ្យនេះនូវអ្វីដែលអាចធ្វើទៅបាន។
គួររំលឹកថា ចាប់ពីថ្ងៃទី២៤ខែឧសភាឆ្នាំ២០១៤ ដល់ថ្ងៃទី២៤ខែឧសភាឆ្នាំ២០១៥នេះជាលើកទី២ហើយដែលក្រុមយុវជនបង្កើតព្រឹត្ដិការជិះកង់ ដើម្បីរ៉ៃអង្គាសប្រាក់ជួយដល់មន្ទីរពេទ្យគន្ធបុប្ផា និងដើម្បីសុខភាព ដែលកាលណោះមានយុវជនចូលរួមចំនួន២០២នាក់៕
