តាកែវ៖ ប្រជាពលរដ្ឋ រស់នៅក្នុងភូមិដក់ព ឃុំបឹងត្រាញ់ខាងត្បូង ស្រុកសំរោង ខេត្តតាកែវបានស្នើរឲ្យអាជ្ញាធរខេត្តតាកែវបិទការដ្ឋានបូមខ្សាច់គ្មានច្បាប់អនុញ្ញាតិ ហាវ អ៊ុន(HAV UN)ជាបន្ទាន់។ប្រជាពលរដ្ឋលើកឡើងថាការបូមខ្សាច់យ៉ាងអាណាធិបតេយ្យនៅតាមដងស្ទឹង
ស្លាគូ ធ្វើឲ្យមានផ្ទៃស្ទឹងក្លាយទៅជាជង្រុកជ្រៅៗនិងបានធ្វើឲ្យផ្ទៃស្ទឹងក្លាយទៅជាបឹងទៅហើយ។ ប្រជាពលរដ្ឋបានបន្តទៀតថាផ្ទៃដីស្រែរបស់ពួកគាត់នៅស្របតាមមាត់ស្ទឹងស្លាគូត្រូវបានហូរច្រោះបាក់ធ្លាក់ដីស្រែធ្វើឲ្យពួកគាត់ពុំអាចធ្វើស្រែនិងដាំដុះដំណាំផ្សេងៗបានឡើយ ។ ប្រជាពលបានបន្តទៀតថា ក្រុមហ៊ុនបូមខ្សាច់ខុសច្បាប់ហាវ អ៊ុន នេះបានធ្វើការគំរាមកំហែងដល់ពួកគាត់ឲ្យលក់ដីថោកៗទៅអោយក្រុមហ៊ុនបើមិនលក់ក៍ក្រុមហ៊ុនបូមធ្លាក់ចុះអស់ដែរ។
លោក ធិច ស៊ុយ ប្រធានក្រុមហ៊ុនបូមខ្សាច់ ហាវ អ៊ុន(HAV UN)បាននិយាយថា៖ បច្ចុប្បន្នការបូមខ្សាច់របស់លោក ពុំទាន់មានច្បាប់អនុញ្ញាតិពីក្រសួងរ៉ែនិងថាមពល មែនប៉ុន្តែលោក
កំពង់តែស្នើសុំច្បាប់ទៅក្រសួងរ៉ែនិងថាមពល។ លោក ធិច ស៊ុយបានបន្តទៀតថា ក្រសួងបានអនុញ្ញាតិឲ្យក្រុមហ៊ុនរបស់គាត់បានបូមនៅតាមដងស្ទឹងស្លាគូនេះមានចំងាយ៥គីឡូម៉ែត្រពីគល់ស្ពាន និងបូមពីអក្សម្ខាងៗចម្ងាយ១៥០ម៉ែត្រសងខាង។ប្រធានមន្ទីររ៉ែនិងថាមពលខេត្តតាកែវ លោក ផេង វុធ បានផ្តល់បទសំភាសន៍តាមទូរស័ព្ទថា៖ មន្ទីរ៉ែនិងថាមពលបានធ្វើការផ្សព្វផ្សាយឲ្យមានការផ្អាកធ្វើអាជីវកម្មបូមខ្សាច់ទាំងអស់ និងស្នើឲ្យអាជីវករមកដាក់ពាក្យជាថ្មីបន្ទាប់ពីមានសេចក្តីណែនាំ របស់ក្រសួងរ៉ែនិងថាមពលនាពេលកន្លងមក។ លោកបានបន្តទៀតប្រសិនបើអាជីវករនៅតែធ្វើការបូមខ្សាច់ខុសច្បាប់លោកនិងដឹកនាំកំលាំង ទៅដកហូតឧបករនិងគ្រឿងចក្រទាំងនោះ។
តាមសេចក្តីប្រកាសព័ត៌មានរបស់ ក្រសួងរ៉ែ និងថាមពល ក៏បានដាក់ចេញវិធានការមួយចំនួនរួមមាន ការបង្កើតឲ្យមានលេខទូរស័ព្ទ (Hotline) ដើម្បីទទួលពាក្យបណ្តឹងទាក់ទងនឹងការបូមខ្សាច់នៅតាមសមុទ្រ ដងទន្លេនិងស្ទឹង។ ការធ្វើយុទ្ធនាការ ឆ្មាំទន្លេ ការប្រមូលកម្លាំងទាំងអស់ដើម្បីការពារទន្លេ ទប់ស្កាត់ការធ្វើអាជីវកម្មបូមខ្សាច់ខុសច្បាប់និងវិធានការមួយចំនួនទៀត៕
