ខេត្តបន្ទាយមានជ័យ៖ លោកសុនគន្ធររដ្ឋមន្ត្រីប្រតិភូអមនាយករដ្ឋមន្ត្រីនិងក្នុងនាមជាអនុប្រធានក្រុមការងារថ្នាក់កណ្តាលគណបក្សប្រជាជនកម្ពុជា ចុះជួយខេត្តបន្ទាយមានជ័យបានទៅស្តាប់និងពិនិត្យមើលដំណើរការនៃ លំហូរចេញ-ចូលទំនិញ និងការដោះដូរជីវភាព នៅ
ច្រកតំបន់ម៉ាឡៃ ឃុំម៉ាឡៃ ស្រុកម៉ាឡៃ ដែលឈមនឹងខាងភាគីថៃ គឺច្រកតំបន់ណងព្រឺ ឃុំណងព្រឺ ស្រុកអារញ្ញប្រាថេតខេត្តស្រះកែវប្រទេសថៃ។ អ្នកស្រី ឃឹង សុវឌ្ឍនី ប្រធានទីស្នាក់ការ ច្រកទ្វារព្រំដែនតំបន់ម៉ាឡៃ បានអោយដឹងថា: កាលពីមុនមានលោកអួន ព័ន្ធមុនីរ័ត្ន បំពេញទស្សនកិច្ចនៅច្រកនេះដែរហើយលោកបានសន្យាផ្តល់ថវិការដ្ឋ ដើម្បីកសាងជាផ្លូវបេតុង ក្នុងបរិវេណច្រកទ្វារ ភ្ជាប់ពីខ្នែងផ្លូវជាតិលេខ៥៩ ទៅដល់ស្ពានបេតុង ព្រំដែនកម្ពុជាថៃ។ ឯសកម្មភាពទំនិញនាំចេញ នៅច្រកនេះ គឺមានមើមដំឡូងមីស្ងួត គ្រាប់ពោតក្រហម សណ្តែកសៀង សណ្តែកបាយ កាលពីរដូវប្រមូលផល តែឥឡូវមានតិចតួចណាស់។ ចំពោះទំនិញនាំពីថៃមកវិញ មានតែអាជីវករម្នាក់គត់ ដែលនាំចូលគ្រឿងបន្លាស់ម៉ូតូ គ្រឿងទេសក៏ និងសម្ភារ:ប្រើប្រាស់ប្រចាំថ្ងៃ ក្នុងទ្រង់ទ្រាយតូចដែរ។ លោករដ្ឋមន្ត្រីប្រតិភូ បានស្នើអោយមន្ត្រី កងកម្លាំងពាក់ព័ន្ធ ពលរដ្ឋ អាជីវករ នៃប្រទេសទាំងពីរ បន្តទំនាក់ទំនង សហប្រតិបត្តិការ និងដោះដូរជីវភាព ពាណិជ្ជកម្ម សេដ្ឋកិច្ច នឹងគ្នាល្អប្រសើរឡើងទៀត។ ឱកាសនោះដែរ 
លោកបានទៅពិនិត្យមើល អគារសិក្សា១ខ្នង មានរចនាបថខ្មែរល្អ នៅក្នុងសាលាបឋមសិក្សាម៉ាឡៃ ឃុំម៉ាឡៃ ដែលជាអំណោយលោក ឧបនាយក រដ្ឋមន្ត្រី ប្រតិភូអមនាយករដ្ឋមន្ត្រី គាត ឈន់ ដែលប្រចាំការកសាងឡើង ដោយលោក គាត រស្មី ប្រធានក្រុមការងារថ្នាក់កណ្តាល គណបក្សប្រជាជនកម្ពុជា ចុះជួយស្រុកម៉ាឡៃ។ អគារសិក្សា១ខ្នង ស្មើ៦បន្ទប់ អគារទីចាត់ការថ្មី ទាំងនេះ កសាងពីឆ្នាំ២០១៤ ឥឡូវរួចរាល់ និងរង់ចាំពេលវេលាមួយ ដើម្បីដាក់សម្ពោធអោយ សាលារៀនប្រើប្រាស់។ រដ្ឋមន្ត្រីប្រតិភូ បានស្នើអោយអ្នកពាក់ព័ន្ធ ត្រៀមលក្ខណ:ទទួលយក ទៅប្រើប្រាស់អោយចំគោលដៅ ហើយថែទាំអោយបានគង់វង្ស បានយូរអង្វែង។ ចុងក្រោយ លោកសុន គន្ធរ បានទៅពិនិត្យដំណើរការ សង្វាក់ផលិតកម្ម នៃឡសម្ងួត (Silo) របស់ក្រុមហ៊ុនម៉ាឡៃ ត្រេឌីង នៅឃុំបឹងបេង ដែលជាឡបង្កើតឡើង មុនគេយូរហើយ ក្រោមបដិភាគឥណទាន ធនាគារអភិវឌ្ឍន៍ជនបទ តាំងពីកាលលោក នៅជានាយកធនាគារនោះ និងជាប្រធានក្រុមការងារថ្នាក់កណ្តាល គណបក្សប្រជាជនកម្ពុជា ចុះជួយស្រុកម៉ាឡៃ។
ហើយលោកក៏បានចុះទៅមើលឡសំងួតបានជួយដល់ស្រុក និងកសិករ អោយមានកន្លែងសម្ងួត គ្រាប់ពោត ស្រូវ សណ្តែក ដំឡូងមី ទោះជារដូវវស្សា ឬប្រាំងយ៉ាងណាក្តី ដើម្បីធានាគុណភាព ស្តង់ដារ និងមានទីផ្សារ សមស្របនៅព្រំដែនកម្ពុជា ថៃ។លោកក៏លើកពីគោលនយោបាយលើកកម្ពស់ បង្កលក្ខណ:ងាយស្រួល របស់រាជរដ្ឋាភិបាល ដឹកនាំដោយសម្តេចតេជោ ហ៊ុន សែន ដល់ពលរដ្ឋ អាជីវករ អ្នកវិនិយោគ ក្នុងនិងក្រៅស្រុក ដើម្បីជីវភាពពលរដ្ឋ សេដ្ឋកិច្ច សង្គមកិច្ចមូលដ្ឋាន និងជាតិ មានការរីកចម្រើនថែមទៀតទៅថ្ងៃអនាគត់៕
