កំពង់ឆ្នាំង៖ បុរសម្នាក់រងរបួសធ្ងន់ និងបាក់ជើងម្ខាងជា២កំណាត់ ដោយត្រូវម៉ូតូមួយគ្រឿងបើកបុកចំពេញទំហឹងនៅពេលដែលរូបគាត់ដើរឆ្លងផ្លូវជាតិនៅពេលល្ងាច។ ករណីនេះបានកើតឡើងនៅវេលាម៉ោង ៥និង១០នាទីល្ងាច ថ្ងៃទី២៥ ខែឧសភា ឆ្នាំ២០១៥ នៅលើផ្លូវជាតិលេខ៥ ត្រង់ចំណុច ភូមិឡទឹកត្រី សង្កា
ត់កំពង់ឆ្នាំង ក្រុងកំពង់ឆ្នាំង ។
សមត្ថកិច្ចនគរបាលចរាចរណ៍ក្រុងកំពង់ឆ្នាំងបានអោយដឹងថា៖ជនរងគ្រោះក្នុងករណីនេះមានឈ្មោះ ប៉ិច ចៃ អាយុ៥២ឆ្នាំ រស់នៅភូមិឡទឹកត្រី ក្នុងកន្លែងកើតហេតុខាងលើ។ មុនពេលកើតហេតុ ជនរងគ្រោះបានដើរឆ្លងផ្លូវពីកើតមកលិច ត្រឡប់មកផ្ទះវិញ ស្រាប់តែពេលនោះមានម៉ូតូមួយគ្រឿងម៉ាកវ៉េវ ពណ៌ស គ្មានស្លាកលេខ បើកបរដោយយុវជនម្នាក់ឈ្មោះ អាត សុផា អាយុ២៤ឆ្នាំ រស់នៅភូមិសំរោង សង្កាត់ផ្សារឆ្នាំង ក្រុងកំពង់ឆ្នាំង បើកបរក្នុងទិសដៅពីជើងទៅត្បូងក្នុងល្បឿនលឿន ស្រាប់តែ ទៅបុកចំជនរងគ្រោះកំពុងឆ្លងផ្លូវយ៉ាងពេញទំហឹងតែម្តង បណ្តាលអោយជនរងគ្រោះប៉ើងជាង៤ម៉ែត្រពីចំណុចកើតហេតុ និងរងរបួសធ្ងន់ធ្ងរបាក់ជើងខាងឆ្វេងជា២កំណាត់។ ចំណែកអ្នកបើកម៉ូតូ បានរងរបួសស្រាលដើរទៅអង្គុយលើម៉ូតូប៉ុន្តែពេលមកដល់មន្ទីរពេទ្យខេត្តបែរជាសន្លប់ស្តូកស្តឹងយូរទៅវិញ ។
ក្រោយពេលកើ់តហេតុបុរសជាជនរងគ្រោះខាងលើត្រូវបានក្រុមគ្រួសារដឹកយកមកមន្ទីរពេទ្យខេត្ត ប៉ុន្តែដោយសារសភាពមុខរបួសធ្ងន់ពេកត្រូវក្រុមគ្រូពេទ្យខេត្តបញ្ជូនជនរងគ្រោះទៅកាន់មន្ទីរពេទ្យក្រុងភ្នំពេញបន្តទៀត។
ដោយឡែកអ្នកបើកម៉ូតូជាជនបង្កវិញ ត្រូវបានសមត្ថកិច្ចនគរបាលចរាចរណ៍ក្រុងកំពង់ឆ្នាំងបានដាក់កម្លាំងយាមជនបង្កដែលដេកសន្លប់នៅក្នុងមន្ទីរពេទ្យខេត្តមួយយប់ទល់ភ្លឺ ដល់ព្រឹកថ្ងៃទី២៦ខែឧសភា ឆ្នាំ២០១៥ ព្រោះតែខ្លាចជនបង្ករត់គេចខ្លួន ម្យ៉ាងទៀតខ្លាចជនបង្កនោះធ្វើពុតជាសន្លប់ នៅពេលមានឱកាស់គេនិងរត់គេចខ្លួន។
