ខេត្តប៉ៃលិន៖ លោក ស៊ុន យី អភិបាលក្រុងប៉ៃលិន បានដឹកនាំក្រុមការងារមានសមាជិកក្រុមប្រឹក្សាក្រុង អាជ្ញាធរមូលដ្ឋាន កម្លាំងសមត្ថកិច្ចប៉ូលីស ប៉េអិម ចុះរៀបចំសណ្តាប់ធ្នាប់ផ្សារ សាមគ្គីហៅផ្សារប៉ាហ៊ី ព្រមទាំងចុះផ្សព្វផ្សាយសេចក្តីណែនាំដល់អាជីវករ នៅជុំវិញផ្សារ និង
អាជីវករដែលយកផ្លូវសាធារណៈលក់ដូរយ៉ាងអាណាធិបតេយ្យ ដោយអោយពួកគាត់តាំងលក់ទំនិញប្រកបដោយសណ្តាប់ធ្នាប់ល្អ និងបញ្ឈប់ការលក់នៅកន្លែងដែលមានផលប៉ះពាល់ដល់សណ្តាប់ធ្នាប់សាធារណៈ ។ ការចុះផ្សព្វផ្សាយសេចក្តីណែនាំនេះ ប្រព្រតិ្តទៅនៅព្រឹកថ្ងៃទី២៥ ខែឧសភា ឆ្នាំ២០១៥ ស្ថិតក្នុងភូមិប៉ាហ៊ីជើង -ប៉ាហ៊ីត្បូង សង្កាត់ប៉ៃលិន ក្រុងប៉ៃលិន ខេត្តប៉ៃលិន ។
លោក ស៊ុន យី អភិបាលក្រុងប៉ៃលិន បានឲ្យដឹងថា៖ យោងតាមអង្គប្រជុំចុះថ្ងៃទី២០ ខែឧសភា ឆ្នាំ២០១៥ កន្លងទៅ របស់គណៈកម្មការរៀបចំសណ្តាប់ធ្នាប់សាធារណៈក្រុងប៉ៃលិន គឺសូមឱ្យអាជីវករ ពាណិជ្ជករ ដែលកំពុងប្រកបមុខរបររកស៊ីនៅជុំវិញផ្សារសាមគ្គី ដោយមានអ្នកខ្លះបានដាក់តាំងសម្ភារទំនិញលក់ដូរនៅលើគម្របលូបង្ហូរទឹក និងលើផ្លូវសាធារណៈ 
ធ្វើឱ្យប៉ះពាល់ដល់សណ្តាប់ធ្នាប់ សោភ័ណភាព និងទ្រព្យសម្បត្តិសាធារណៈ ថែមទាំងបង្កការកកស្ទះចរាចរណ៍ជារឿយៗផងនោះ ។ដូច្នោះ ត្រូវតែបញ្ឈប់ការតាំងលក់របស់របរនៅលើគម្របលូបង្ហូរទឹក និងនៅជុំវិញបរិវេណផ្សារ, បញ្ឈប់ការតាំងលក់របស់របរនៅលើចំណីផ្លូវ និងនៅលើផ្លូវសាធារណៈជុំវិញផ្សារសាមគ្គី (ហៅប៉ាហ៊ី), ត្រូវរុះរើតូប ឬសំយាបតូប ដែលបានលក់ដូរលើគម្របលូ ឬលើផ្លូវសាធារណៈជុំវិញផ្សារ, ហាមអ្នករត់ម៉ូតូឌុប ឬយានជំនិះផ្សេងទៀតចតលើដងផ្លូវ នៅក្នុងបរិវេណផ្សារ ។
សូមបញ្ជាក់ថាៈ សាលាក្រុងប៉ៃលិនចេញសេចក្តីណែនាំនេះដើម្បីអោយអាជីវករ រៀបចំ និងរុះរើអោយបានក្នុងរយៈពេល ១០ថ្ងៃ គិតចាប់ពីថ្ងៃទី ២៥ ខែឧសភា ឆ្នាំ២០១៥ នេះតទៅ តែបើមិនធ្វើតាមសេចក្តីណែនាំនោះទេអភិបាលក្រុងប៉ៃលិននឹងចាត់វិធានការ ហើយរដ្ឋបាលនឹងចុះរៀបចំសណ្តាប់ធ្នាប់នៅកន្លែងផ្សារ រាល់ការខូចខាត ឬបាត់បង់ទ្រព្យសម្បត្តិរបស់អាជីវករ និងពាណិជ្ជករណាមួយ ខាងសាលាក្រុងនឹងមិនទទួលខុសត្រូវ ឬផ្តល់សំណងអ្វីឡើយ៕
