ខេត្តរតនគិរី៖ សមត្ថកិច្ចអាជ្ញាធរក្នុងមូលដ្ឋានក្រុងបានលុងហាក់ពុំទាន់អនុវត្តចំពោះគោលនយោបាយភូមិឃុំមានសុវត្ថភាពលើការបង្ក្រាបបទល្មើសល្បែងស៊ីសងក្នុងមូលដ្ឋានដែលខ្លួនកាន់កាប់នោះឡើយ ប្រជាពលរដ្ឋបានលើកឡើងស្រដៀងគ្នាកាលពីព្រឹកថ្ងៃទី២៥ ខែឧសភា
ឆ្នាំ២០១៥ ខណៈដែលឃើញល្បែងភ្នាល់បាល់ និងកត់កន្ទុយលេខខុសច្បាប់ដែលមានទីតាំងទី១នៅហាងកាហ្វេអ្នកលឿងខាងកើតផ្សារ ស្ថិតនៅភូមិជ័យជំនៈ សង្កាត់ឡាបានសៀក ក្រុងបានលុង ទី២ទល់មុខសណ្ឋាគាររតនៈស៊ីធី ផ្ទះលេខ៨ ស្ថិតនៅក្នុងភូមិទេសអន្លង់ សង្កាត់បឹងកន្សែង ក្រុងបានលុង ទី៣នៅទល់មុខសាខាពន្ធដាខេត្ត។ ល្បែងភ្នាល់បាល់និងកត់កន្ទុយលេខទាំងនោះសង្ស័យមានអ្នកធំជាខ្នងបង្អែកមើលទៅបានជាកត់និងភ្នាល់បានដោយរលូនដូច្នេះ។
សាក្សីដែលធ្លាប់ញៀនល្បែងបានបញ្ជាក់ថា ក្នុងនោះមានការភ្នាល់បាល់ និងកត់កន្ទុយលេខមានទីតាំងធំៗដែលនៅក្នុងក្រុងបានលុង ខេត្តរតនគិរីនេះ។ ពាក់ព័ន្ធករណីខាងលើនេះមិនអាចទំនាក់ទំនងម្ចាស់ទីតាំងនេះបានទេ។ លោកហួត បុរី អធិការក្រុងបានលុងបានបញ្ជាក់ថា លោកមិនទាន់ឲ្យកម្លាំងរបស់លោកស៊ើបគ្រប់ជ្រុងជ្រោយទេ ព្រោះលោកទើបតែមកកាន់តំណែងថ្មី។
ប៉ុន្តែប្រជាពលរដ្ឋនៅទីនោះថាទីតាំងភ្នាល់បាល់និងកត់កន្ទុយលេខនេះបានបើកជាយូរឆ្នាំមកហើយ ពុំដែលឃើញមានសមត្ថកិច្ចណាចុះបង្ក្រាបទេមានតែចុះមកដើម្បីប្រយោជន៍តែប៉ុណ្ណោះ។ ប្រជាពលរដ្ឋបន្តទៀតថាល្បែងស៊ីសងនៅទីនេះអាចជាការលាក់បាំងណាមួយពីសំណាក់អាជ្ញាធរសមត្ថកិច្ចមូលដ្ឋានក្រុងបានលុងដើម្បីលាភសក្ការៈ ហើយមិនឲ្យថ្នាក់លើដឹង ដូចជាគណៈបញ្ជាការឯកភាពខេត្ត ដែលកំពុងមានវិធានការលុបបំបាត់ល្បែងស៊ីសងគ្រប់ប្រភេទនៅក្នុងមូលដ្ឋានរបស់ខ្លួន៕
