កំពង់ឆ្នាំង៖ កុមារាអាយុ២ឆ្នាំម្នាក់ បានរងរបួសដោយការរលាកទឹកសម្លពុះក្តៅធ្ងន់ធ្ងរនៅមុខផ្ទះ នៅពេលដែលគេយកដង្កៀបចាប់ធ្យូង ទៅថ្ពក់ទាញមាត់ឆ្នាំងសម្លកំពុងពុះ នៅលើចង្ក្រានមានកំពស់ប្រមាណ១ម៉ែត្របណ្តាលអោយកំពប់ចាក់ចំមកលើខ្លួន។ករណីគ្រោះថ្នាក់ខាងលើ
នេះបានកើតឡើងនៅវេលាម៉ោង១០និង៤៥នាទីថ្ងៃត្រង់ថ្ងៃទី២៦ ខែឧសភា ឆ្នាំ២០១៥ នៅលំនៅដ្ឋានកុមារងគ្រោះ ស្ថិតក្នុង ភូមិឃ្លាំង ប្រាក់ សង្កាត់ប្អេរ ក្រុងកំពង់ឆ្នាំង ។
ម្តាយកុមារារងគ្រោះបាននិយាយអោយដឹងថា៖ គាត់មានឈ្មោះ អ៊ុន គឹមសៀន អាយុ៣៥ឆ្នាំ ចំ ណែកកូនប្រុសអាយុ២ឆ្នាំដែលរងគ្រោះមានឈ្មោះ សឿន សុធារ៉ា ជាកូនពៅក្នុងចំណោមកូន៤នាក់ ។ នៅមុនពេលកើតហេតុ រូបគាត់បានដាំបាយឆ្អិនហើយបានលើកឆ្នាំងបាយចេញពីចង្ក្រាន និងបានដាក់ដាំទឹកសម្លនៅលើចង្ក្រានមុខផ្ទះ ដែលមានកំពស់ប្រមាណ១ម៉ែត្រពីដី ។ ពេលដាំទឹកពុះ គាត់ជ្រុំប្រហុក បង់បន្លែជាបណ្តើរៗ គាត់ក៏ឈ្លាតទៅលើកឆ្នាំងបាយឆ្អិនយកទុកក្នុងផ្ទះ ពេលនោះ កូនប្រុសគាត់មិនដឹងវាដើរមកពីណាទេ ស្រាប់តែវាស្រវ៉ាបានដែកដង្កៀបចាប់ភ្លើងទៅថ្ពក់ជាប់មាត់ឆ្នាំង ហើយទាញមកបណ្តាលអោយកំពប់ទឹកសម្លកំពុងពុះ ចាក់ស្រោចលើខ្លួនតែម្តង បណ្កាលអោយរលាកពេញខ្លួន។
ក្នុងពេលនោះដែរ គេក៏ស្រែកយំឡើង គាត់បានស្ទុះចេញពីក្នុងផ្ទះហើយបានព្យាយាមយកទឹកត្រជាក់មកស្រោចលើខ្លួន របកស្បែកចេញដូចស្រុះមនុស្សទាំងរស់ ដោយគាត់តក់ស្លុតខ្លាំងពេកក៏ស្រែកហៅអោយគេជួយ។បន្ទាប់មក គាត់ក៏បានយកកូនគាត់ទៅផ្ទះពេទ្យឯកជនអោយជួយសង្គ្រោះ ពេលនោះគរូពេទ្យបានអោយគាត់ទិញស្ប្រាយសម្រាប់បាញ់អោយត្រជាក់មួយដបថ្លៃ១០ ដុល្លា មកបាញ់លើខ្លួនវា រួច បានយកកូនមកផ្ទះវិញ ព្រោះតែគាត់ក្រីក្រគ្មានប្រាក់បង់អោយពេទ្យព្យាបាល ។
ស្ត្រីជាម្តាយកុមារារងគ្រោះបាននិយាយអោយដឹងថា៖ ប្តីគាត់ឈ្មោះ សឿន សុង អាយុ៣៥ឆ្នាំ ធ្វើជាងសំណង់ គាត់នៅផ្ទះមើលថែកូន៤នាក់ គ្រួសារគាត់ក្រីក្រណាស់ ហេតុនេះហើយទើបគាត់យកកូនមកមើលថែនៅផ្ទះវិញ ព្រោះតែគ្មានប្រាក់សម្រាប់ព្យាបាលកូននោះឡើយ។គាត់បានអង្វតាមរយៈអ្នកសារព័ត៌មានយើយស្នើសុំដល់សប្បុរសជននានាដែលមានទឹកចិត្តសប្បុរស ពិសេសអាជ្ញាធរ និងសាខាកាកបាទក្រហមខេត្ត មេតា្តជួយសង្គ្រោះដល់គ្រួសារគាត់ដែលកំពុងមានទុក្ឋលំបាកនិងខ្វះខាតដោយសេចក្តីអនុគ្រោះផង៕
