នៅម៉ោង៨និង៣០នាទីយប់ថ្ងៃទី២៨ ខែឧសភា ឆ្នាំ២០១៥យុវជន៣នាក់ជិះម៉ូតូដើរលេងពេលយប់កាន់ដាវសាំម៉ូរៃ១ដើម នៅចំណុចផ្លូវបែកជា៤ រោងចក្រកាត់ដេរតាបារាំងក្នុងភូមិស្រែព្រីង សង្កាត់កំពង់ឆ្នាំង ក្រុងកំពង់ឆ្នាំត្រូវបានកម្លាំងសមត្ថកិច្ចចំរុះខេត្ត ចុះត្រួតពិនិត្យអាវុធជាតិផ្ទុះចាប់ឃាត់ខ្លួនបញ្ជូនទៅស្នងការដ្ឋាននគរបាលខេត្ត។
នគរបាលព្រហ្មទណ្ឌ័ក្រុងកំពង់ឆ្នាំងបានអោយដឹងថា៖តាមផែនការ ការពារសន្តិសុខ ទប់ស្កាត់អំពើលួច ឆក់ ប្លន់ របស់ក្រុមចោរ គណៈបញ្ជារកាឯកភាពខេត្ត និងលោកស្នងការ បានដាក់បញ្ជារអោយសមត្ថកិច្ចចំរុះ២ក្រុម ចុះត្រួតពិនិត្យអាវុធជាតិផ្ទុះជាប្រចាំនៅក្នុងក្រុងកំពង់ឆ្នាំង ទៅតាមសភាពការសន្តិសុខជាក់ស្តែង ១អាទិត្យពី៤ទៅ៥ដង ដោយចល័តតាមមូលដ្ឋានក្នុងក្រុងកំពង់ឆ្នាំង។កិច្ចការងាររបស់ក្រុមចំរុះ គឺពិនិត្យនិងដកហូតអាវុធសម្លាប់មនុស្សគ្រប់ប្រភេទ ចាប់ម៉ូតូមានស៊ីមាំងប្រែន ភ្លើងឡាស៊ែ ។ល។
យុវជនទាំង៣នាក់នេះមាន ១.ឈ្មោះ ហ៊ន គឺសាន អាយុ១៩ឆ្នាំ ២.ឈ្មោះ សុខ តេងបញ្ញា អាយុ១៨ឆ្នាំ និង៣.ឈ្មោះ សោម គឹមឆាយ អាយុ១៩ឆ្នាំ ពួកគេរស់នៅក្នុងភូមិថ្មី ឃុំពង្រ ស្រុករលាប្អៀរ ជិះម៉ូតូម៉ាកហុងដាឌ្រីម ០១២ ពាក់ផ្លាកលេខកំពង់ឆ្នាំង 1E-3217 ពណ៌ខ្មៅនិងមានកាន់ដាវសាំម៉ូរៃ១ដើម មានប្រវែងប្រមាណ៨តឹតជាដាវផលិតក្នុងស្រុក ដែលគេបានទិញតៗពីមិត្តភក្រ័របស់គេក្នុងតម្លៃ២០ដុល្លា។
យុវជនទាំងបីខាងលើដែលសមត្ថកិច្ចឃាត់ខ្លួន ប្រាប់ថា៖ការដាក់ដាវតាមខ្លួនគេបែបនេះ គឺដើម្បីការពារខ្លួន ព្រោះថាកន្លងមកពួកគេធ្លាប់ត្រូវពួកក្មេងទំនើងដេញវាយរួចមកហើយគេមិនដឹងថា ការដាក់ដាវតាមខ្លួនបែបនេះខុសច្បាប់នោះឡើយ។
សមត្ថកិច្ចបានអោយដឹងថា៖តាមច្បាប់មាត្រា៤៩៤ បានចែងថា៖ បទផលិត ឬធ្វើចរាចរណ៍អាវុធសម្រាប់ប្រហារផ្សេងៗ ការផលិត ការនាំចូឡ ការនាំចេញ និងអាវុធសម្រាប់ប្រហារផ្សេងៗ ដូចជាចំពុះទុង ដាវ ស្នាប់ដៃជាអាទ៍ សម្រាប់សម្លាប់ ឬធ្វើអោយរបួស ដោយគ្មាការអនុញ្ញាតពីអាជ្ញាធរមានសមត្ថកិច្ច ត្រូវផ្តន្ទាទោសដាក់ពន្ធនាគារពី ២ឆ្នាំ ទៅ ៥ឆ្នាំ និងពិន័យជាប្រាក់ពី ៤លានរៀល ទៅ១០លានរៀល។
យុវជន៣នាក់និងវត្ថុតាងត្រូសមត្ថកិច្ចនគរបាលក្រុងកំពង់ឆ្នាំងកសាងសមណុំរឿងបញ្ជូនខ្លួននិងវត្ថុតាងទៅកាន់ស្នងការនគរបាលខេត្ត តាមនីតិវិធីច្បាប់ ដើម្បីចាត់ការបន្ត៕
