ខេត្ដពោធិ៍សាត់ៈ កាលពីថ្ងៃទី២៧ ខែឧសភា ឆ្នាំ២០១៥ខណៈមេឃ កំពុងធ្លាក់ភ្លៀង មានរន្ទះបាញ់ពីលើកក្នុងឃុំត្រញាំងជង ស្រុកបាកាន ខេត្តពោធិសាត់ ដែលលើកទី១ បណ្តាលអោយ ក្មេងជំទង់ពីរនាក់ បងប្អូនបង្កើតបានរងរបួសជាទម្ងន់ ក្នុងភូមិក្ដីស្នួល ឃុំត្រញំងជង ស្រុកបាកាន ខេត្ដពោធិ៍សាត់ និងមួយលើកទៀតមានករណីរន្ទះបាញ់ ក្នុងរយៈពេលមួយម៉ោងក្រោយ ភូមិស្រែល្វា ឃុំត្រញំងជង ស្រុកបាកាន ខេត្ដពោធិ៍សាត់ បានធ្វើអោយសត្វគោចំនួនពីរក្បាលងាប់រដូករណែលពេញដី ។
ករណីរន្ទះបាញ់ខាងលើនេះ លើកទីមួយបណ្ដាល ឱ្យក្មេងពីរនាក់ប្អូនរងរបួសធ្ងន់ ខណៈក្មេង ទាំងពីរនាក់ដើរត្រឡប់មកពីបេះផ្លែព្រីង ខាងក្រោយភូមិ ស្របពេលដែលមេឃមីរ រកកលនឹងភ្លៀង ។
ប្រភពព័ត៌មានពីនគរបាលស្រុកបាកានឱ្យដឹងថា ក្មេងរងរបួស ឈ្មោះ ទី១ ឈ្មោះភាព វិច្ឆិកា ភេទស្រី អាយុ១៥ឆ្នាំ ទី២ ឈ្មោះ ភាព ជាតិ ភេទ ប្រុស អាយុ៩ឆ្នាំ ក្មេងទាំង២នាក់រស់នៅ ភូមិ ឃុំកើតហេតុខាងលើ ។ ក្រោយកើតហេតុ ក្មេងរងគ្រោះត្រូវបានគេបញ្ជូនមកមន្ទីរ ពេទ្យបង្អែកស្រុកបាកាន ។
នគរបាលស្រុកបាកានឱ្យដឹងទៀតថា រំលងជាងមួយម៉ោងក្រោយមក ក៏មាន ករណីរន្ទះបាញ់មួយលើកទៀតនៅភូមិស្រែល្វា ឃុំត្រញំងជង ស្រុកបាកាន ខេត្ដពោធិ៍សាត់ បណ្ដាលឱ្យសត្វគោមេពីរក្បាលងាប់ នៅកណ្ដាលវាលស្រែខាងក្រោយភូមិ ។ នគរបាលបានអោយដឹងទៀថា ម្ចាស់គោដែលរន្ទះបាញ់ស្លាប់ ឈ្មោះ សុត ផាន ភេទប្រុស អាយុ៤៥ឆ្នាំ រស់នៅភូមិស្រែល្វា ឃុំត្រញំង ជង ស្រុកបាកាន ខេត្ដពោធិ៍សាត់ ៕
កែវ ហួរ ពោធិសាត់
