បាត់ដំបង:យុវជនម្នាក់ត្រូវរងរបួសជាទម្ងន់ រហូតដល់បែកខ្ទេចប្រអប់ដៃម្ខាង កាលពីថ្ងៃទី1-6-15 វេលាម៉ោង1,30នាទីរសៀល ត្រង់ចំនុចភូមិស្វាយជ្រុំ ឃុំកំពង់ល្ពៅ ស្រុកសំឡូត ខេត្តបាត់ដំបងខណ:ដែលយុវជនរូបនេះ បានយកគ្រាប់ផាវមកកែច្នៃធ្វើជាគ្រាប់សម្រាប់បោកត្រី ប៉ុន្តែចៃដន្យត្រូវបានភ្លាត់ស្នៀតធ្វើអោយគ្រាប់នោះផ្ទុះឡើងតែម្តង។
លោកអធិការរង កោ ស៊ុនកាំង បានបញ្ជាក់ថា នៅមុនពេលកើតហេតុ គឺមានយុវជនម្នាក់ឈ្មោះអុីង ឌី អាយុ19ឆ្នាំ រស់នៅក្នុងភូមិ ឃុំកើតហេតុខាងលើ បានយកគ្រាប់ផាវជាច្រើនដែលគេទុកសម្រាប់ដុតពេលបុណ្យចូលឆ្នាំចិន មកហែកយករំសេវចាក់ចូលទៅក្នុងកំប៉ុងមួយ ដើម្បីធុកវាអោយណែន ដើម្បីដាក់ភ្ជាប់ខ្សែឈ្នួន ក្នុងគោលបំនងធ្វើជាគ្រាប់បែកទុកសម្រាប់បោកត្រី។លោកអធិការរងបានបន្តថា ក្នុងពេលដែលយុវជនម្នាក់នេះកំពុងតែច្នៃម្នាក់ឯងនោះ
ក៏ស្រាប់តែមានស្នូមួយបានផ្ទុះឡើង ដែលបានលាន់ឮសំលេងយ៉ាងខ្លាំង ធ្វើអោយមានការភ្ញាក់ផ្អើលពីសំណាក់ប្រជាពលរដ្ឋដែលរស់នៅជុំវិញមូលដ្ឋាននោះ និងរត់សំដៅមកចោមរោមមើល ទើបដឹងថាគឺចាការផ្ទុះគ្រាប់ដែលយុវជនម្នាក់នោះកំពុងអង្គុយច្នៃម្នាក់ឯង រីឯប្រអប់ដៃខាងឆ្វេងរបស់គេក៏ត្រូវបែកខ្ទេចខ្ទីមើលលែងយល់ផងដែរ ទើបប្រជាពលរដ្ឋព្រាមទាំងសមត្ថកិច្ចបានរៀបចំបញ្ជូនជនរងគ្រោះទៅកាន់មន្ទីរពេទ្យដើម្បីជួយសង្គ្រោះ។
តាមការសន្និដ្ឋានរបស់សមត្ថកិច្ខ ដៃនេះប្រហែលជាត្រូវកាត់ផងក៏មិនដឹង ព្រោះវាមានសភាព
ខ្ទេចខ្ទីខ្លាំងពេក ដោយបែករហូតដល់ឆ្អឹងឯណោះ ដោយសមត្ថកិច្ចក៏សូមអំពាវនាវដល់ប្រជាពលរដ្ឋទាំងអស់ ពិសេសប្អូនៗយុវជនមេត្តាកុំកែច្នៃរបស់ណាដែលអាចបង្កអោយមានគ្រោះថ្នាកលដល់អាយុជីវិត ពិសេសគ្រាប់មីន និងគ្រាប់មិនទាន់ផ្ទុះ គឺត្រូវរាយការជាបន្ទាន់នៅពេលដែលបានជួបប្រទះ៕
