ភ្នំពេញ ៖ យុវជនម្នាក់ដែលស្រវឹងក្អួតនិងដេកនៅចិញ្ចើមផ្លូវដោយសារតែមិត្តភ័ក្តិរបស់គេជិះម៉ូតូដឹកយកមកទំលាក់ចោលបណ្ដាលអោយមានការភ្ញាក់ផ្អើលដល់អ្នកធ្វើដំណើរចោមរោមមើលស្មានតែមានករណីអ្វីកើតឡើង។ ហេតុការណ៍ភ្ញាក់ផ្អើលនេះបានកើតឡើងកាលពីវេលាម៉ោង១១
និង៣០នាទីយប់ស្ថិតនៅចំណុចក្បែរសាកលវិទ្យាល័យជាតិគ្រប់គ្រង តាមបណ្ដោយផ្លូវព្រះមុនីវង្សក្នុងសង្កាត់ស្រះចកខណ្ឌដូនពេញ។
បើតាមការអោយដឹងពីបុរសម្នាក់ដែលជាអ្នករត់ម៉ូតូឌុបនៅកន្លែងកើតហេតុខាងលើនេះបានឱ្យដឹងថា គាត់បានឃើញយុវជន២នាក់ជិះម៉ូតូមួយគ្រឿងម៉ាកហុងដាឌ្រីម ធុនសេ២១៥ ពណ៌ខ្មៅ មិនចាំស្លាកលេខ បានធ្វើដំណើរតាមបណ្ដោយផ្លូវព្រះមុនីវង្សដោយបានជិះរេពេញផ្លូវ ស្រាប់តែមកដល់ចំណុចកើតហេតុខាងលើក៏យុវជន២នាក់នោះឈប់ម៉ូតូហើយអ្នកបើកម៉ូតូក៏បានអូសអ្នកអង្គុយពីក្រោយទំលាក់ចុះនៅចិញ្ចើមផ្លូវប្រហែលមួយសន្ទុះ ក៏មានប្រជាពលរដ្ឋបានឈប់មើលនិងធ្វើការសាកសួរទៅយុវជនទាំង២នាក់នោះថាមានរឿងអ្វីកើតឡើយហើយ យុវជនម្នាក់ដែលអាចនិយាយកើតនោះក៏បានប្រាប់មកវិញថា គេមិនកើតអ្វីទេ គ្រាន់តែស្រវឹងស្រាខ្លាំងពេក ខណៈនោះយុវជនម្នាក់ដែលអាចនិយាយកើតនោះក៏ឡើងជិះម៉ូតូចេញទៅបាត់តែម្ដង ដោយបន្សល់មិត្តភ័ក្តិគេម្នាក់ដេកនៅក្បែរចិញ្ចើមផ្លូវនិងក្អួតដេកធ្វើមិនដឹង ធ្វើអោយសមត្ថកិច្ចចុះអន្តរាគមន៍និងឈឺក្បាលដោយសារតែយុវជននេះផងដែរ។បន្ទាប់ពីកើតហេតុសមត្ថកិច្ចក៏ទំនាក់ទំនងទៅរថយន្តសង្គ្រោះអោយមកដឹកយុវជនស្រវឹងនេះយកទៅមន្ទីរពេទ្យនិងទំនាក់ទំនងទៅក្រុមគ្រួសារអោយមកទទួលយកវិញផងដែរ៕
