ប្រជាពលរដ្ឋនៅឃុំព្រងិល បានរាយការណ៍ថា ដីព្រៃសហគមន៍ព្រៃឈើ ភូមិព្រងិល ក៏ដូចជាដីព្រៃមិនមែនសហគមន៍ ត្រូវបានគេឃុបឃិតគ្នា យកគ្រឿងចក្រទៅឈូសឆាយរាល់ថ្ងៃ តែមេព្រៃសង្កាត់អះអាងថា មិន មែនក្នុងដែនសហគមន៍ទេ ។ ប្រភពព័ត៌មានខាងលើ បានបញ្ជាក់ថា សកម្មភាពគេឃុបឃិតគ្នា យកគ្រឿងចក្រទៅឈូសឆាយ ដណ្ដើមគ្នាយកដីខាងលើ គេសង្កេតឃើញត្រង់ចំណុចជើងភ្នំ ខ្នងត្រង៉ាយ និងសហគមន៍ព្រៃឈើ ភូមិព្រងិល ស្ថិតក្នុងភូមិស្វាយប៉ាក និង ភូមិព្រងិល ឃុំព្រងិល ស្រុកភ្នំក្រវាញ ខេត្ដពោធិ៍សាត់ ។
ប្រភពបន្ដទៀតថា សកម្មភាពនេះ កើតមានយូរមកហើយ ដោយមានត្រាក់ទ័របំពាក់ប៉ែលឈូសព្រៃច្រើនគ្រឿង ឈរនៅទីនោះ ក៏ដូចជាគ្រឿងចក្រប្រភេទអាប៊ុលផងដែរ ។ រហូតមានទំនាស់គ្នា រវាង ប្រជាពលរដ្ឋ នឹងប្រជាពលរដ្ឋខ្លះ ដោយខាងភូមិព្រងិល ចោទទៅខាងភូមិស្វាយប៉ាក រំលោភចូលដីពួកគេ ដែលយើងមើលតាមរូបភាពសុទ្ធតែព្រៃ ។
ប្រភពបញ្ជាក់ថា ដីព្រៃខាងលើ គេបានជួលគ្រឿងចក្រ មកឈូសផង ភ្ជូរផង ក្នុង១ហិកតា តម្លៃ២លានរៀល អ្នករំលោភឈូសបំផ្លាញព្រៃ យកដីខាងលើ សុទ្ធសឹងតែជាអ្នកមានធនធាន ហើយមានអ្នកនៅពីក្រោយខ្នងទៀត ទើបពួកគេធ្វើបានដូច្នេះ ។
បញ្ហាខាងលើនេះ លោក អិន ចន្ទហេ នាយសង្កាត់រដ្ឋបាលព្រៃឈើព្រងិល បានប្រាប់ឲ្យដឹង នៅព្រឹកថ្ងៃទី៣០ ខែឧសភា ឆ្នាំ២០១៥ ថា ពិតជាមានករណីនេះមែន តែនៅក្រៅសហគមន៍ព្រៃឈើនោះទេ ហើយកន្លងមក លោកបានបង្ក្រាបជាញឹកញាប់ដែរ ប៉ុន្ដែដូចវែកចកអ៊ីងចឹង ៕
