ខេត្តបន្ទាយមានជ័យ៖ថ្មីៗនេះលោកគោស៊ុំសារឿតអភិបាលខេត្តបន្ទាយមានជ័យបានឲ្យមន្ត្រីក្រោមឧវ៉ាតចុះស្តារអូរគៀបដែលជាដៃស្ទឹងសិរីសោភ័ណដែលមានប្រវែង១,០០០ម៉ែត្រដើម្បីការពាររំដោះទឹកជំនន់និងផ្តល់ប្រព័ន្ធទឹកសម្រាប់ប្រើប្រាស់ស្រូវស្រាលក្នុងស្រុក.ក្រុងចំនួន២
ក្នុងខេត្តបន្ទាយមានជ័យនេះ។ លោកគោស៊ុំសារឿតបានឲ្យលោកយឹមប៊ុនរ៉ុមប្រធានមន្ទីរធនធានទឹកនិងឧតុនិយមខេត្តបន្ទាយមានជ័យនិងក្រុមការងារចុះស្តារប្រព័ន្ធទឹកអូរគៀបដែលជាដៃស្ទឹងសិរីសោភ័ណដែលមានប្រវែង១.០០០ម៉ែត្រនិងទទឹងប្រវែង១០ម៉េត្រជម្រៅ៣ទៅ៤ម៉ែត្រដែលស្ថិតនៅភូមិគៀបសង្កាត់ទឹកថ្លា ក្រុងសិរីសោភ័ណ ខេត្តបន្ទាយមានជ័យ។
លោកបានបញ្ជាក់ទៀតថា៖ការស្ថារប្រព័ន្ធអូរគៀបនេះគឺសម្រាប់ការពារទឹកជំនន់ដែលជន់លិចនៅផ្នែកខាងលិចផ្លូវជាតិលេខ៥ដែលត្រូវបានជន់លិច២ឆ្នាំជាប់គ្នាបណ្តាលឲ្យប៉ះពាល់និងខូចខាតដល់កសិផលប្រជាកសិករក្នុងខេត្តយ៉ាងខ្លាំងកន្លងមក។ដូច្នេះហើយទើបលោក គោស៊ុំ សារឿត អភិបាលខេត្តបានបញ្ជាឲ្យស្តារប្រព័ន្ធអូរគៀបនេះដែលត្រូវបានគោករាក់ពេលខែប្រាំងនិងពេលខែវស្សាវិញប្រព័ន្ធទឹកហូរនេះបណ្តាលឲ្យទឹកជន់លិចស្ទើរតែរាល់ឆ្នាំ។
លោកយឹមប៊ុនរ៉ុម បានបន្តថាក្រោយពេលស្តារអូរគៀបដែលជាដៃស្ទឹងសិរីសោភ័ណបានរួចរាល់ហើយគឺវាអាចរំដោះទឹកជំនន់និងផ្តល់ប្រយោជន៍ជាប្រព័ន្ធទឹកសម្រាប់ប្រើប្រាស់ស្រូវស្រាលដល់ប្រជាកសិករក្នុងក្រុងសិរីសោភ័ណនិងស្រុកមង្គលបូរីលើវិស័យកសិផលទៀតផង៕
