បាត់ដំបង៖ មានបញ្ហាជាច្រើនដែលបានកើតចេញពីក្នុងសាលាសង្កាត់ស្វាយប៉ោ ក្រុងបាត់ដំបងពាក់ព័ន្អទៅនឹងការពុសដីក្នុងសង្កាត់ជិតពាក់កណ្តាលជួលទៅអោយឯកជនធ្វើជាក្លឹបហាត់ប្រាណដែលធ្វើអោយបាត់បង់នូវទីវាលសម្រាប់ចតរថយន្ត និងសម្រាប់ធ្វើពិធីអ្វីមួយ និង
បញ្ហាម្យ៉ាងទៀតគឺចៅសង្កាត់បានចេញវិកយប័ត្រដើរប្រមូលប្រាក់តាមខ្នងផ្ទះប្រជាពលរដ្ឋយកលេសឧបត្ថម្ភទៅលើកំលាំងប្រជាកាពារដែលមានមនុស្សប្រមាណ22នាក់តែប៉ុណ្ណោះ។
ថ្មីៗនេះគេសង្គេតឃើញថា នៅក្នុងសាលាសង្កាត់ស្វាយប៉ោ មានការពុសចែកដីជិត
ពាក់កណ្តាលដើម្បីប្រគល់ទៅអោយលោក ចាន់ សាវង្ស ក្នុងការបង្កើតជាទីតាំងក្លឹបហាត់ប្រាណដែលបង្កអោយទីធ្លាក្នុងបរិវេណសង្កាត់មានសភាពតូចចង្អៀត ព្រមទាំងមានការកកស្ទះចរាចរនៅរាល់ពេលល្ងាចផងដែរ ដោយសារតែយាន្តជំនិះដែលអតិថិជននាំចូលមកហាត់ប្រាណក្នុងទីនេះ។
គួររំលឹកដែរថា កន្លងមកកាលពីជំនាន់ចៅសង្កាត់មុនគឺអ្នកស្រី នូ នារី បានរៀបចំទីតាំងក្នុង
សាលាសង្កាត់យ៉ាងស្អាតបាត ព្រមទាំងបានទុកទីធ្លានេះសម្រាប់ចាទីសំចតនូវម៉ូតូ និងរថយន្ត
ដោយមានពេលខ្លះទីធ្លានេះត្រូវបានរៀបចំជាពិធីផ្សេងៗផងដែរ ដូច្នេះការទុកទីធ្លាធំទូលាយនៅក្នុងសាលាសង្កាត់វាមិនមែនអត់ប្រយោជន៍នោះទេ ដូច្នេះការពុសដីជិតពាក់កណ្តាលជួលទៅអោយឯកជនរបៀបនេះវាមិនសមទាល់តែសោះ។
ពាក់ព័ន្ធនឹងបញ្ហានេះ ក៏មានសំណួរជាច្រើនដែលកម្ពុជាថ្មីទទួលបាន ដោយគេឆ្ងល់ថា
អោយតែមានដីទំនេរបន្តិចបន្ទួចសាលាសង្កាត់ហ៊ានពុសជួលបែបនេះ តើលោកចៅសង្កាត់គិតថាលុយដែលបានមកពីការជួលនេះវាមានទំហំធំធេងណាស់តើមែនទេ ព្រោះទីតាំងសាលាសង្កាត់នីមួយៗគឺសុទ្ធតែជាដីរបស់រដ្ឋ តែឥឡូវត្រូវបានឯកជនក្តោបក្តាប់ពាក់កណ្តាលទៅហើយ ប្រហែលជាតទៅមុខអាចជួលទាំងអាគារសង្កាតទាំងមូលផងក៏មិនដឹង ព្រោះគេអាចលើកសង្កាត់ទៅធ្វើក្បូននៅលើស្ទឹងសង្កែក៏បានដែរ ហើយអាចចំណេញបានលុយជួលថែមទៀត។
ជួបជាមួយកម្ពុជាថ្មីតាមរយ:ទូរស័ព្ទកាលពីវេលាម៉ោង 10,46នាទី ព្រឹកថ្ងៃទី3-6-15
លោក អ៊ុក គីម ចៅសង្កាត់ស្វាយប៉ោបានរៀបរាប់ថា ទីតាំងនេះលោកពិតជាបានជួលទៅអោយលោកចាន់ សាវង្ស ពិតប្រាកដមែន ដោយមានការប្រជុំឯកភាពពីក្រុមប្រឹក្សាសង្កាត់ ព្រមទាំងបានសុំគោលការទៅលោកអភិបាលក្រុង និងលោកអភិបាលខេត្តផងដែរ ដោយសារតែគិតថាទុកដីអោយនៅទំនេរគ្មានប្រយោជន៍ បើជួលអោយគេបែបនេះគឺអាចបានលុយយកមកផ្គត់ផ្គង់ទៅលើកិច្ចការលំអរក្រុងគ្រប់យ៉ាង ព្រោះបច្ចុប្បន្នសង្កាត់ស្វាយប៉ោគឺជាសង្កាត់គំរូផង។
គួរពិចារណាថា បើលោកអភិបាលក្រុង និងលោកអភិបាលខេត្តមានការអនុញ្ញាតអោយ
ពុសដីរដ្ឋជួលទៅអោយឯកជនបានបែបនេះ បន្តិចទៀតសាលារៀន និងទីអារាមក៏អាចមានសិទ្ធិជួលដីទៅអោយក្រុមហ៊ុនឯកជនបានដែរ ព្រោះសាលារៀន និងវត្តអារាមមានដីទំនេរច្រើនណាស់ទោះបីជាទុកក៏គ្មានប្រយោជន៍ដែរ នេះបើយោងតាមសំដី និងគំនិតដែលលោកចៅសង្កាត់បានលើកឡើងបញ្ជាក់ប្រាប់កម្ពុជាថ្មី។
ម្យ៉ាងវិញទៀត ក៏មានប្រភពជាច្រើនបាននិយាយថា កន្លងមកវាធ្លាប់មានរួចទៅហើយអំពីបញ្ហាជួលដីទៅអោយក្រុមហ៊ុនឯកជនព្រោះយូរៗទៅវាអាចក្លាយជាដីកម្មសិទ្ធិឯកជនថែមទៀតផង ដូច្នេះត្រង់ចំនុចនេះ យូរៗទៅប្រហែលជាអាចមានប្លង់កម្មសិទ្ធស្របច្បាប់ផងក៏មិនដឹង ព្រោះបច្ចុប្បន្នគេបានរៀបចំបាំងបិទយ៉ាងស្អាតដោយមានការខ័ណ្ឌដាច់ចេញពីគ្នាជាមួយនឹងសាលាសង្កាត់ ដោយមិនមានពាក់ព័ន្ធគ្នាឡើយ បើបែបនេះមែនតើអ្នកណាជាអ្នកទទួលខុសត្រូវ?រាល់បញ្ហានេះ គឺមានប្រជាពលរដ្ឋ និងមន្ត្រីរាជការមានការងឿងឆ្ងល់យ៉ាងខ្លាំង នៅពេលដែលគេឃើញសាលាសង្កាត់ស្វាយប៉ោពុសដីពាក់កណ្តាលជួលទៅអោយឯកជនបែបនេះ គឺវាដូចជាជ្រុលពេកហើយ ដែលចៅសង្កាត់ហ៊ានដាក់សំណើរដើម្បីលុយយ៉ាងនេះ៕
