កំពង់ឆ្នាំង៖លោកយាយ កែមរឿន អាយុ៧៩ឆ្នាំ មានជីវភាពទីទាល់ក្រនៅភូមិក្រាំងខ្មែរ ឃុំពពេល និងលោកយាយ ពេង វិន អាយុ៩៨ឆ្នាំ ងងឹតភ្នែករស់នៅតែ២នាក់ចៅ នៅភូមិកំព្រង ឃុំផ្សារ ស្រុកបរិបូណ៌ នៅរសៀលថៃ្ងទី០២ ខែមិថុនា ឆ្នាំ២០១៥ បានទទួលអំណោយប្រចាំខែ
ឧសភា របស់លោក ផែង វណ្ណៈ ជាសប្បុរសជន និងជាសកម្មជនអ្នកលេងហ្វេស្បុកគាំទ្រគណបក្សប្រជាជនកម្ពុជា រស់នៅក្នុងរាជធានីភ្នំពេញ លោកបានប្រគល់អំណោយនេះតាមរយៈ លោក ចែម ភ័ក្តិ សមាជិកគណបក្សប្រជាជនកម្ពុជាស្រុកបរិបូណ៌ និង លោក អ៊ឹម ផង់សមាជិកបក្សស្រុកនិងជាសមាជិកគណបក្សប្រជាជនកម្ពុជាឃុំពពេល និងជាមេបក្សឃុំផ្សារ ស្រុកបរិបូណ៌។
លោក ចែម ភ័ក្តិ បានអោយដឹងថា៖ លោក ផែង វណ្ណៈ គឺជាសកម្មជនគណៈបក្ស និងជាអ្នកលេងហ្វេស្បុកគាំទ្រគណបក្សប្រជាជនកម្ពុជា រស់នៅក្នុងរាជធានីភ្នំពេញ កន្លងមកលោកបានជួយជនទីទាល់ក្រ កុមារពិការ កូនភ្លោះ៣នាក់ និងជនចាស់ជរាជាច្រើននាក់ នៅក្នុងស្រុកបរិបូណ៌ ហើយលោកបានសន្យាថា និងជួយលោកយាយ កែម រឿន និងលោកយាយ ពេង វិន ក្នុង១ខែអង្ករ១៥គីឡូក្រាម និងថវិកា៤ម៉ឺនរៀលក្នុងម្នាក់ៗ ហើយនៅរសៀលថៃ្ងនេះលោក ក៏បាននាំយកអង្ករនិងថវិការបស់លោក ផែង វណ្ណៈ ទៅប្រគល់ជូនផ្ទាល់ដៃ ដល់លោកយាយទាំង២នាក់ តាមការសន្យារបស់ខ្លួន។
លោក ចែមភ័ក្តិ បានអោយដឹងទៀតថា៖ លោក ផែង វណ្ណៈ និងមិត្តភ័ក្តិដែលលេងហ្វេស្បុកគាំទ្រគណបក្សប្រជាជនកម្ពុជា បាននាំយកអំណោយផ្ទាល់ខ្លួននិងសប្បុរសជនជូនដល់ជនរងគ្រោះជនគ្មានទីពឹងកុមារពិការកូនភ្លោះនិងជនចាស់ជរាបានជាច្រើនគ្រួសារនៅក្នុងប្រទេសនិងក្នុងខេត្តកំពង់ឆ្នាំង។ អំណោយរបស់លោក ផែង វណ្ណៈ ដែលបានផ្តល់ជូនជនក្រីក្រ គឺជាសកម្មភាពមនុស្សធម៌ពិតៗ ដោយមិនរើសអើងពូជសាសន៍និងនិន្នាការនយោបាយឡើយ ។ ដើម្បីចូលរួមចំណែកជាមួយរាជរដ្ឋាភិបាល និងកាកបាទក្រហមកម្ពុជា ក្នុងការជួយសំរាលការលំបាកជូនប្រជាពលរដ្ឋក្រីក្រគ្រប់រូប។ លោក ចែម ភ័ក្តិ បានសំណូមពរដល់លោកយាយទាំង២នាក់ត្រូវចេះថែទាំសុខភាពអោយបានល្អ ដោយរស់នៅស្អាតហូបស្អាត ទើបធ្វើអោយសុខភាពលោកយាយបានល្អនិងអាចរស់នៅបានយូរឆ្នាំតទៅមុខទៀត។
អាជ្ញាធរដែនដីនិងលោកយាយទាំង២នាក់បានថ្លែងអំណរគុណយ៉ាងជ្រៀលជ្រៅដល់លោក ផែង វណ្ណៈ និងសប្បុរសជនទាំងអស់ដែលបានផ្តល់អំណោយមនុស្សធម៌ ជួយដោះស្រាយការខ្វះខាតរបស់ពួកគាត់ ខណៈដែលពួកគាត់កំពុងតែជួបលំបាកពេលនេះ លោកយាយសូមជូនពរអោយ លោក ផែង វណ្ណៈ និងសប្បុរសជនទាំងអស់ជួបប្រទះតែសេចក្តីសុខនិងទទួលបានជ័យជំនៈគ្រប់ប្រការ និងគ្រប់តួនាទីភារកិច្ច៕
