ស្រះទឹកមួយកន្លែងស្ថិតក្នុងភូមិស្វាយឬស្សី សង្កាត់បារាយណ៍ ក្រុងដូនកែវ ខេត្តតាកែង ដែលមានផ្ទៃក្រឡា ប្រមាន២៥០ម៉ែត្រការេ ត្រូវបានប្រជាពលរដ្ឋនាំគា្នភ្ញាក់ផ្អើលពេលដែលអាជ្ញាធរក្រុមប្រឹក្សាសង្កាត់មានបំណងដាក់ ដេញថ្លៃលក់ទៅឲ្យឈ្មួញ។ បើតាមសម្តីរបស់ប្រជាពលរដ្ឋដែលនៅជុំវិញស្រះនោះបានឲ្យដឹងថា ស្រះទឹកនេះជាស្រះទឹករួមក្នុងភូមិ ដែលមានប្រជាពលរដ្ឋ២០០គ្រូសារប្រើប្រាស់ ហើយស្រះនេះគឺជីកឡើងដោយប្រជាពលរដ្ឋខ្លួនឯង តាំងពីឆ្នាំ១៩៨៧ ជារបបស្បៀងរបស់អង្គការពិភពលោក។ ក្នុងករណីនេះលោកចៅសង្កាត់បារាយណ៍ក៏មានការទទួលស្គាល់នូវហេតុការដែលកើតឡើងនេះដែរ តែលោកបានបកស្រាយថា លោកមេភូមិស្វាយឬស្សី បានមកសុំយោបល់ពីក្រុមប្រឹក្សាសង្កាត់អំពីការលក់ដីស្រះនេះ ហើយលោកពិតជាបានដាក់នូវគម្រោងសម្រាប់ដេញថ្លៃមែន តែលោកក៏មិនរំលោភនូវសិទ្ធរបស់ពលរដ្ឋទេ គឺលោកបានហៅប្រជាពលរដ្ឋដែលនៅក្នុងភូមិមកពិភាក្សាអំពីស្រះនេះដែរ ដោយប្រជាពលរដ្ឋភាគច្រើនសម្រេច ឲ្យលក់ដើម្បីយកថវិការមកប្រើប្រាស់។ លោកចៅសង្កាត់បានបន្តទៀតថា បានជាលោកមេភូមិមានគម្រោង លក់ស្រះនេះ ព្រោះជាក់ស្តែងស្រះនេះប្រើប្រាស់បានតែប្រជាពលរដ្ឋជាង១០គ្រួសារប៉ុណ្ណោះ និងដោយមាន សំណួមពរពីប្រជាពលរដ្ឋភាគច្រើនសុំឲ្យធ្វើផ្លូវ និង ពង្រីកផ្លូវក្នុងភូមិវិញទើបលោកស្នើទៅក្រុមប្រឹក្សាចៅសង្កាត់ ជួយ
ដោះស្រាយ។ លោកចៅសង្កាត់ក៏សុំជាមតិយោបល់ពីប្រជាពលរដ្ឋអំពីករណីលក់ស្រះនេះដើម្បីយកថវិការមកធ្វើផ្លូវ ទើបមានការមិនពេញចិត្តពីប្រជាពលរដ្ឋមួយចំនួន។ លោកចៅសង្កាត់បានបញ្ជាក់ផងដែរថាបើគ្មានការយល់ព្រមពីប្រជាពលរដ្ឋទេលោកក៏មិនអាចលក់ស្រះនេះ បានដែរព្រោះនេះជាសម្បត្តិរួមក្នុងភូមិ ហើយបច្ចុប្បន្នស្រះនេះកមិនទាន់មានឈ្មួញណាមកដេញ ថ្លៃទិញនៅឡើយទេ។ អំពីបញ្ហាផ្លូវក្នុងភូមិគឺលោកកំពុងតែខ្វះខាតថវិការដើម្បីសាងសង់។
