កំពង់ឆ្នាំង៖ ជនសង្ស័យប្រុសស្រីចំនួន៦៨នាក់ ត្រូវបានសមត្ថកិច្ចនគរបាលនៃស្នងការដ្ឋាននគរបាលខេត្ត និងនគរបាលក្រុង ស្រុកក្នុងខេត្ត បង្ក្រាបបានចំនួន៣១ករណី ក្នុងនោះចាប់តាមដីការ៧ករណី និងបានកសាងសំណុំរឿងបញ្ជូនខ្លួនពួកគេទៅតុលាការខេត្ត តាមនីតិវិធី
ច្បាប់ ដែលទុរលេខនេះគឺជារបាយការណ៍របស់ការិយាល័យកណ្តាលប្រឆាំងបទល្មើសនៃស្នងការនគរបាលខេត្តកំពង់ឆ្នាំង ដោយគិតចាប់ពីថ្ងៃទី១៧ ខែវិច្ឆិកា ឆ្នាំ២០១៤ ដល់ថ្ងៃទី១៦ ខែឧសភា ឆ្នាំ២០១៥។
លោក ប្រាក់ វុទ្ធី ស្នងការនគរបាលខេត្តកំពង់ឆ្នាំងបានអោយដឹងថា៖តាមរបាយការណ៍នៃការិយាល័យកណ្តាលប្រឆាំងបទល្មើស ជនសង្ស័យ៦៨នាក់ដែលពាក់ព័ន្ធជាមួយបទល្មើសគ្រឿងញៀន ត្រូវបានចាប់ខ្លួនបញ្ជូនទៅតុលាការនៅក្នុងការបង្ក្រាបទាំង៣១ករណី។ក្នុងនោះពាក់ព័ន្ធនឹងការរក្សាទុក ជួញដូរ ចែកចាយសារធាតុញៀនដោយខុសច្បាប់មានចំនួន១៩ករណី និងការប្រើប្រាស់សារធាតុញៀនខុសច្បាប់មានចំនួន១២ករណី។
វត្ថុតាងដែលដកហូតបានពីជនសង្ស័យរួមមាន៖ថ្នាំញៀនយ៉ាម៉ាទឹកកកចំនួន៦៣កញ្ចប់ ស្មើនឹង១៤៧.៦៤ក្រាម,ម៉ាយ៉ាគ្រាប់ពណ៌ផ្កាឈូកអក្សWYចំនួន៣គ្រាប់,ជញ្ជីងថ្លឹងថ្នាំញៀន២គ្រឿង,អាវុធកែច្នៃ៤ដើម,កាំបិតចុងស្រួច៥,និងឧបករណ៍ជក់ថ្នាំញៀនមួយចំនួនទៀត។ ចំណែកសម្ភារៈដែលបានដកហូតជាមួយគ្រឿងញៀនមាន រថយន្ត១គ្រឿង,ម៉ូតូ៣០គ្រឿង,ទូរស័ព្ទ៧៣គ្រឿង,កងដៃ៧កង ខ្សែក២ខ្សែ បណ្តោង៣ ប្រាក់ខ្មែរចំនួន១លាន៧៩ម៉ឺនរៀល និងប្រាក់ដុល្លា១០០ដុល្លា។
លោក ប្រាក់ វុទ្ធី បានអោយដឹងទៀតថា៖ក្នុងខែកន្លងមកនេះ កម្លាំងនគរបាលប្រឆាំងគ្រឿងញៀន បានចុះធ្វើការអប់រំផ្សព្វផ្សាយច្បាប់,ផលប៉ះពាល់គ្រោះថ្នាក់នៃគ្រឿងញៀន ដល់គ្រឹះស្ថានសិក្សា និងសហគមន៍បានចំនួន៤២លើក មានសិស្សានុសិស្ស និស្សិត និងប្រជាពលរដ្ឋចូលរួមសរុបចំនួន១៩២៨នាក់ ស្ថិតក្នុង៧ស្រុកនិងក្រុង១របស់ខេត្ត។
ដោយឡែកទិសដៅអនុវត្តបន្តរបស់ស្នងការដ្ឋាននគរបាលខេត្តកំពង់ឆ្នាំងគឺ៖ អប់រំបំបាត់ ប្រសិទ្ធិភាពដល់មុខសញ្ញាប្រើប្រាស់គ្រឿងញៀនតាមបណ្តាស្រុកក្រុងទូទាំងខេត្ត,បន្តចុះផ្សព្វផ្សាយអប់រំច្បាប់ស្តីពីផលប៉ះពាល់គ្រោះថ្នាក់ដោយសារគ្រឿងញៀន ដល់គ្រឹះស្ថានសិក្សា និងសហគមន៍នានាក្នុងខេត្ត។បន្តសហការជាមួយអធិការដ្ឋាននគរបាលស្រុកក្រុងដើម្បីបង្ក្រាបមុខសញ្ញាគ្រឿងញៀន។លោកស្នងការខេត្ត បានសំណូមពរដល់ប្រជាពលរដ្ឋ,មន្ត្រីរាជការ,អាណាព្យាបាលទាំងអស់ រួមសហការជាមួយសមត្ថកិច្ច រាយការណ៍អោយបានទាន់ពេលវេលាពេលឃើញមុខសញ្ញា គ្រឿងញៀន ដើម្បីរួមចំណែកទប់ស្កាត់ បង្ក្រាប កំចាត់អោយអស់នូវមុខសញ្ញាគ្រឿងញៀនក្នុងខេត្ត៕
