កំពង់ឆ្នាំង៖ សិស្សានុសិស្សចូលរួមសម្អាតអនាម័យបរិស្ថានក្នុងក្រុងកំពង់ឆ្នាំង ដើម្បីអបអរសាទរ ទិវាបរិស្ថាន៥មិថុនា នៅខេត្តកំពង់ឆ្នាំងនៅព្រឹកថ្ងៃទី៤ ខែមិថុនា ឆ្នាំ២០១៥នេះ ឯកឧត្ដម ឈួរ ច័ន្ទឌឿន អភិបាល នៃគណៈអភិបាលខេត្តកំពង់ឆ្នាំង រួមជាមួយថ្នាកដឹកនាំ
មន្ត្រីរាជការមន្ទីរអង្គភាព កងកម្លាំងប្រដាប់អាវុធ លោកគ្រូអ្នកគ្រូ សិស្សានុសិស្ស ចូលរួមសម្អាតអនាម័យបរិស្ថាន ក្នុងក្រុងកំពង់ឆ្នាំង នាព្រឹកថ្ងៃទី៤ ខែមិថុនា ឆ្នាំ២០១៥នេះ ដើម្បីអបអរទិវាបរិស្ថានជាតិ និង បរិស្ថានអន្តរជាតិ ៥មិថុនា ក្រោមប្រធានបទ “ប្រាំពីរពាន់លានសុបិន្ត ភពផែនដីតែមួយ រស់នៅដោយចីរភាព”។
ឯកឧត្តម ឈួរ ច័ន្ទឌឿន បានមានប្រសាសន៍អាយដឹងថា ទីវាបរិស្ថាន ត្រូវបានរដ្ឋាភិបាល និងបណ្តាប្រជាជាតិទាំងអស់លើសកលលោក ប្រារព្ធធ្វើឡើងជារៀងរាល់ឆ្នាំង ក្នុងគោលបំណងផ្សព្វផ្សាយ និងបញ្ជ្រាបចំណេះដឹង អំពីភាពចាំបាច់ និងសារៈប្រយោជន៍ នៃកិច្ចគាំពារបរិស្ថាន ការអភិរក្សជីវចម្រុះ និង ការប្រើប្រាស់ធនធានធម្មជាតិអោយបានសមស្រប សំដៅប្រែក្លាយផ្នត់គំនិត និងឥរិយាបថរបស់មហាជន គ្រប់មជ្ឈដ្ឋាន អោយទៅជា
កម្លាំងចលករ ដើម្បីរួមចំណែកដល់ការលើកកំពស់ប្រសិទ្ធិភាព ការងារគ្រប់គ្រងធនធានធម្មជាតិ និងបរិស្ថាន លើភពផែនដី ស្របតាមទស្សនាទាន ៉រស់នៅដោយចីរភាព ៉ ។
នាឱកាសនោះផងដែរ លោក កែវ ពៅ ប្រធានមន្ទីរសាធារណៈការ និងដឹកជញ្ជូន ខេត្តកំពង់ឆ្នាំង បានប្រាប់អោយដឹងថា តាមគោលការណ៍ណែនាំ របស់ឯកឧត្តមអភិបាល នៃគណអភិបាលខេត្តកំពង់ឆ្នាំង គឺបណ្តាគ្រប់មន្ទីអង្គភាពទាំងអស់ នៅក្នុងខេត្តចូលរួមសំអាត ដោយការប្រមូលសម្រាមតាមដងផ្លូវសាធារណៈ ក៍ដូចជាក្នុងសារមន្ទីរ ជារៀងរាល់ចុងសប្តាហ៍ គឺនៅរៀងរាល់ថ្ងៃសុក្រ ដើម្បីរក្សាអោយបាន នូវបរិស្ថានល្អស្របតាមពាក្យស្លាក “ទីក្រុងស្អាត ទីក្រុងបៃតង ផ្ដើមចេញពីយើងទាំងអស់គ្នា” ៕
