ខេត្តកំពង់ធំៈ ប្រជាពលរដ្ឋជាច្រើនភូមិ នៅក្នុងឃុំម្សាក្រង ស្រុកស្ទោង ខេត្តកំពង់ធំ បានជួបនូវគ្រោះរាំងស្ងួតហួតហែង ខុសពីឆ្នាំមុនៗ បង្ករឲ្យប្រជាពលរដ្ឋដែលរស់នៅតាមបណ្តោយស្ទឹងស្ទោង ខ្វះខាតទឹកក្នុងការប្រើប្រាស់ បង្ករឲ្យមនុស្ស សត្វជួបនូវផលពិបាក ដោយសារតែទឹកស្ទឹងស្រុកស្ទោង រីងស្ងួតប្រេះក្រហែង ដែលជាហេតុការណ៍ចម្លែកក្នុងឆ្នាំ ២០១៥។
ប្រជាពលរដ្ឋ ជាច្រើនភូមិកំពុងតែនាំគ្នាព្រួយបារម្មណ៍ ទាំងទឹកសម្រាប់ប្រើប្រាស់ប្រចាំថ្ងៃ និងទឹកសម្រាប់ឲ្យមឆ្ឆាជាតិ ពងកូន ដោយសារតែជារៀងរាល់ឆ្នាំថ្ងៃទី១ ខែ មិថុនា ត្រូវបានសមត្ថកិច្ចរដ្ឋបាលជលផល បិទការនេសាទត្រី តែឆ្នាំនេះ ថ្ងៃទី៥ ខែមិថុនា ទៅហើយនៅពុំទាន់មានទឹកដកនៅតាមស្រែ និងនៅក្នុងស្ទឹងនៅឡើយ បែរជាបាតស្ទឹងប្រេះ ក្រហែងទៅវិញ និងព្រួយថានិងមានការខ្វះខាតត្រីសាច់ សម្រាប់ ពួកគាត់ដែមមានមុខរបរនេសាទត្រី ។
ដោយមានការយកចិត្តទុកដាក់ ពីជីវភាពរបស់ប្រជាពលរដ្ឋ ដែលកំពុងតែរងទុក្ខ និងជួបការលំបាកក្នុងការប្រើប្រាស់ ទឹក ត្រូវបានលោក ឧកញ៉ា លឹម ប៊ុណ្ណា ហៅឧកញ៉ា ខ្នារ នាំយកគ្រឿងចក្រអ៊ិចស្ការវទ័រ មកកាយជាស្រះនៅតាម បាតស្ទឹង ជាច្រើនកន្លែង ក្នុងរយះពេល២ថ្ងៃ ក្នុងឃុំម្សាក្រង កាលពីថ្ងៃទី ៤ ខែ មិថុនា ឆ្នាំ ២០១៥ ដើម្បីឲ្យប្រជាពលរដ្ឋ បានប្រើប្រាស់ទឹក ដោយសារតែលោកឧកញ៉ា បានឃើញនូវផលពិបាករបស់ប្រជាពលរដ្ឋ ដែលនាំគ្នាជីកកូនអន្លង់ តូចៗហើយនាំគ្នាដងសំរិតយកទឹក ដ៏សែនខ្លោចផ្សារ ទើបបញ្ជារឲ្យក្រុមការងារស្រុក និងលោក គន ចាន់ស៊ីហា សង្កាត់រដ្ឋបាលជលផលស្ទោង ដឹកនាំគ្រឿងចក្រជីកស្រះ កាយអណ្តូងក្នុងបាតស្ទឹងដើម្បីយកទឹកទៅប្រើប្រាស់។
ប្រជាពលរដ្ឋបានថ្លែងអំណរគុណ យ៉ាងខ្លាំងចំពោះលោក ឧកញ៉ា លឹម ប៊ុណ្ណា ដែលបានជួយសង្គ្រោះអាយុជីវិតរបស់ ប្រជាពលរដ្ឋឲ្យផុតពីគ្រោះធម្មជាតិ នឹងជាគុណបំណាច់យ៉ាងធំធេង ក្នុងការលះបង់ទ្រព្យសម្បត្តិផ្ទាល់ខ្លួនរបស់លោក ឧកញ៉ា មកធ្វើមហាបុណ្យនេះ ពិតជាបានទទួលនូវកុសល់ផលបុណ្យយ៉ាងក្រៃលែង ដែលចាស់បុណ្យពោលថា ធ្វើបុណ្យដែលទទួលបានកុសល់ច្រើនលើសលប់នោះ គឺទី១ ធ្វើស្ពាន ធ្វើផ្លូវ ជីកអណ្តូង កាយស្រះ និងសាងសង់ ព្រះវិហារ ដែលបុណ្យទទួលបានរាល់ថ្ងៃ នៅពេលដែលមានមនុស្សប្រើប្រាស់ ក្នុងនោះប្រជាពលរដ្ឋបានជូនពរដល់លោក ឧកញ៉ា លឹម ប៊ុណ្ណា និងឯកឧត្តម អ៊ុត សំអន អភិបាលខេត្តកំពង់ធំ បានគិតគូរដល់ការរស់នៅប្រចាំថ្ងៃរបស់ពួកគាត់។
មហាជនបានរិះគន់យ៉ាងចាស់ដៃទៅលើ ប្រធាន អនុប្រធានមន្ទីរពាក់ព័ន្ឋ នៅក្នុងខេត្តកំពង់ធំ នាពេលបច្ចុប្បន្នដែល ពុំមានឆន្ទះគិតគូរ ពីសុខទុក្ខរបស់ប្រជាពលរដ្ឋ ទោះជួបការលំបាកក្តី ជួបគ្រោះមហាហន្តរាយក្តី ពុំដែលចុះធ្វើការពិនិត្យ ស្ថានភាពប្រជាពលរដ្ឋយ៉ាងម៉េចនោះទេ គឺការងារអ្វីទាល់តែមាន អភិបាលខេត្តចាំទាញក្រលុះ រុញគូត ចង្អុល បង្ហាញ ទើបពួកគាត់ភ្ញាក់រលឹកនាំគ្នាធ្វើ បើពុំនោះទេប្រជាពលរដ្ឋច្បាស់ជារងទុកវេទនាមិនខានឡើយ ជាពិសេសថ្មីនេះ សម្តេចនាយករដ្ឋមន្ត្រី ហ៊ុន សែន បានព្រមានរួចមកហើយ ដល់មន្ទីរអង្គភាព និងស្ថាប័ន ទាំងអស់ត្រូវមានម្ចាស់ការដោយ ខ្លួនឯង និងទទួលខុសត្រូវតាមតួនាទី ដោយមិនចាំបាច់តែបញ្ញា និងអនុសាសន៍ ចង្អុល បង្ហាញ ទើបបាននាំ គ្នាធ្វើនោះទេ ។
ដោយ ប៊ុន រដ្ឋា
