ភ្នំពេញ ៖ ជនសង្ស័យម្នាក់ត្រូវបានប្រជាពលរដ្ឋ នាំគ្នាព្រួតវាយម្នាក់មួយដៃមួយជើង សល់តែដង្ហើមចង្រិត ទើបសម្រេចប្រគល់អោយសមត្ថកិច្ច បន្ទាប់ពីរូបគេធ្វើសកម្មភាពកាច់ករម៉ូតូ បានសម្រេចទៅហើយ តែសំណាងអាក្រក់ ត្រូវគេតាមទាន់ ។ ហេតុការណ៍នេះបានកើតឡើង កាលពីវេលាម៉ោង២១និង១០នាទីយប់ ថ្ងៃទី០៤ ខែមិថុនា ឆ្នាំ២០១៥ នៅចំណុចមុខផ្ទះជួលគ្មានលេខមួយកន្លែង ស្ថិតក្នុងក្រុមទី២ ភូមិទ្រា៣ សង្កាត់ស្ទឹងមានជ័យ ខណ្ឌមានជ័យ ។ ជនសង្ស័យខាងលើ មិនត្រូវបានស្គាល់អត្តសញ្ញាណនៅឡើយទេ ព្រោះមុនពេលសមត្ថកិច្ចទៅដល់ រូបគេត្រូវប្រជាពលរដ្ឋព្រួតវាយ រហូតដល់សន្លប់លែងដឹងអី ។ ចំណែកយុវជនជាម្ចាស់ម៉ូតូ មានឈ្មោះ ភួង មករា ភេទប្រុស អាយុ២២ឆ្នាំ មុខរបរជាកម្មករសំណង់ ស្នាក់នៅផ្ទះជួលគ្មានលេខ ក្នុងភូមិទ្រា៣ ក្រុមទី៣ សង្កាត់ស្ទឹងមានជ័យខណ្ឌមានជ័យ មានស្រុកកំនើតនៅខេត្តព្រៃវែង ។
ប្រភពព័ត៌មានពីសាក្សីនៅកន្លែងកើតហេតុ បានរៀបរាប់អោយដឹងថា ដំបូងឡើយគេសង្គេតឃើញជនសង្ស័យខាងលើ មកអង្គុយក្បែរទីតាំងកើតហេតុ ដោយមិនដឹងថា រូបគេមកពីណា ព្រោះអ្នកស្រុកនៅក្បែរនោះ មិនដែលស្គាល់រូបគេទាល់តែសោះ ។ លុះមកដល់វេលាកើតហេតុ ជនសង្ស័យរូបនេះ បានធ្វើសកម្មភាពកាច់ករម៉ូតូមួយគ្រឿង ម៉ាក សង់ឌ្រីមសេ១២៥ ពណ៌ខ្មៅ ស៊េរីឆ្នាំ២០០៧ ពាក់ស្លាកលេខ ភ្នំពេញ 1N-7745 បានសម្រេចទៅហើយ តែសំណាងអាក្រក់ត្រូវម្ចាស់ម៉ូតូឃើញទាន់ ស្រែកឆោរឡោរឡើង ធ្វើអោយជនសង្ស័យ ប្រដួលម៉ូតូចោល ហើយព្យាយាមរត់គេចខ្លួន តែខណៈនោះម្ចាស់ម៉ូតូ និងក្រុមប្រជាពលរដ្ឋ នៅជិតកន្លែងកើតហេតុ បាននាំគ្នារត់ដេញតាម ជនសង្ស័យតាំងពីចំណុចកើតហេតុ រហូតដល់ចំណុចក្រោយផ្សារស្ទឹងមានជ័យថ្មី ទើបចាប់បាន ហើយព្រួតវាយម្នាក់មួយដៃមួយជើង រហូតដល់សន្លប់បាត់បង់ស្មារតីតែម្តងទៅ ។ ភ្លាមៗនោះ សមត្ថកិច្ចមូលដ្ឋាន បានចុះអន្តរាគមន៍ដល់កន្លែងកើតហេតុ រួចនាំខ្លួនជនសង្ស័យ យកទៅកាន់ប៉ុស្តិ៍រដ្ឋបាលនគរបាលស្ទឹងមានជ័យ ដើម្បីសាកសួរនាំបន្ថែម ។
ក្រោយកើតហេតុ យុវជនជាម្ចាស់ម៉ូតូ បានទៅដាក់ពាក្យបណ្តឹងនៅប៉ុស្តិ៍នគរបាលស្ទឹងមានជ័យ ចំណែកជនសង្ស័យ ត្រូវបានសមត្ថកិច្ចឃុំខ្លួនបណ្តោះអាសន្ននៅប៉ុស្តិ៍ រងចាំកសាងសំណុំរឿង បញ្ចូនទៅអធិការខណ្ឌមានជ័យ ដើម្បីចាត់ការបន្ត ៕
