នារីវ័យក្មេង៣នាក់ ទើបតែចេញពីក្នុងក្លឹប ជិះម៉ូតូឌុបគ្នាបំណងត្រឡប់ទៅផ្ទះ ត្រូវក្មេងស្ទាវដែលចេញពីក្លឹបដូចគ្នា ជិះម៉ូតូដេញតាមគៀរ រួចពួកនាងជិះគេច ក៏ជ្រុលទៅបុករថយន្តមួយគ្រឿង បណ្តាលឱ្យរបួសធ្ងន់ធ្ងរ២នាក់ នៅចំណុចស្តុបវត្តមហាមន្ត្រី តាមបណ្តោយផ្លូវព្រះសីហនុ កែងនឹងផ្លូវលេខ១៦៣ ស្ថិតក្នុងសង្កាត់បឹងកេងកងទី៣ ខណ្ឌចំការមន កាលពីវេលាម៉ោង១១នឹង៣៥នាទីយប់ថ្ងៃទី៤ ខែមិថុនា ឆ្នាំ២០១៥ ។
ប្រភពពត៌មានពីមិត្តភក្ត្រនារីរងគ្រោះ ដែលរួមដំណើរជាមួយ មិនបានរងរបួស បានប្រាប់ឱ្យដឹងថា ពួកគេទាំង៣នាក់ ទើបតែចេញពីក្នុងក្លឹបកំសាន្តហាយ រួចជិះម៉ូតូម៉ាកឌ្រីម សេ១១០ ពណ៍ខ្មៅ ពាក់ស្លាកលេខ ភ្នំពេញ 1BI-5338 ជិះឌុបគ្នាបំណងត្រឡប់ទៅផ្ទះ ដោយជិះតាមបណ្តោយផ្លូវព្រះសីហនុ ។ ពេលនោះក៏មានក្មេងស្ទាវ៣នាក់ ចេញពីក្នុងក្លឹបដូចគ្នាជិះដេញតាមគៀរ រួចពួកនាងបានព្យាយាមគេច ក៏ជ្រុលទៅបុករថយន្ត ដែលកំពុងជិះកាត់ទទឹងផ្លូវ បណ្តាលឱ្យដួលសន្លប់ស្តូកស្តឹងម្នាក់ និងម្នាក់ទៀត ប្រកាច់នៅនឹងកន្លែងកើតហេតុតែម្តង ត្រូវបានអ្នកដំណើរ ជួយសង្គ្រោះជាបឋមផងដែរ ។ ហើយនៅពេលដែលឃើញនារីរងគ្រោះដូច្នេះ ពួកគេក៏បានជិះគេចខ្លួនបាត់តែម្តង ចំណែករថយន្តបានបន្ថែមល្បឿនគេចខ្លួនបាត់ដែរ ។
មួយសន្ទុះក្រោយមក នារីរងគ្រោះទាំង២នាក់ ត្រូវបានជួយសង្គ្រោះឱ្យដឹងខ្លួនពីសន្លប់វិញ និងត្រូវបានមិត្តភក្ត្រមកជាច្រើននាក់ ដឹកយកទៅព្យាបាលនៅមន្ទីរពេទ្យផងដែរ ៕
