បន្ទាយមានជ័យ ៖ យ៉ាងហោចណាស់មនុស្សម្នាក់បានស្លាប់ និងម្នាក់ទៀតបានរងរបួសធ្ងន់ ក្នុងហេតុការណ៍គ្រោះថ្នាក់ចរាចរមួយរវាងរថយន្តបុកម៉ូតូកាលពីវេលាម៉ោង ៥ និង៤០នាទីថ្ងៃទី ០៤ មិថុនា ២០១៥ ក្នុងភូមិគាប សង្កាត់អូរអំបិល ក្រុងសិរីសោភ័ណ ខេត្តបន្ទាយមានជ័យ ។
លោក សួន នីប៉ូ នាយផ្នែកចរាចរជើងគោកនៃស្នងការនគរបាលខេត្តបន្ទាយមានជ័យ បានអោយដឹងថា យុវជនម្នាក់បានស្លាប់ក្រោយនាំយកទៅដល់មន្ទីរពេទ្យមានឈ្មោះ ខ រី ភេទប្រុស អាយុ១៤ឆ្នាំ មានទីលំនៅភូមិទឹកថ្លា សង្កាត់ទឹកថ្លា ក្រុងសិរីសោភ័ណ បានបើកបរម៉ូតូមួយគ្រឿងក្នុងទិសដៅពីកើតទៅលិច លុះដល់ចំនុចកើតហេតុ ក៏ត្រូវរថយន្តមួយគ្រឿងម៉ាកកាមារីបាឡែន ពាក់ស្លាកលេខ បន្ទាយមានជ័យ 2A 5743 បើកបរដោយឈ្មោះ លឹម សាម៉េត ភេទប្រុស អាយុ៤៩ឆ្នាំ ក្នុងស្ថានភាពស្រវឹង បានបោះពួយយ៉ាងលឿនចេញពីភោជនីយដ្ឋានមួយកន្លែងក្បែកន្លែងកើតហេតុទៅបុកម៉ូតូជនរងគ្រោះពេញទំហឹង ហើយបន្តទៅបុកដើមដូងនៅម្ខាងផ្លូវ បណ្តាលអោយខ្ទេចរថយន្តផ្នែកខាងមុខ ផ្ទុះពងសុវត្ថិភាពទាំង២ និងរបួសធ្ងន់ធ្ងរខ្លួនឯង ។
សមត្ថកិច្ចសន្និដ្ឋានថា គ្រោះថ្នាក់នេះបណ្តាលមកពីភាគីខាងម្ចាស់រថយន្តបើកបរក្នុងស្ថានភាពស្រវឹងដែលមានសារធាតុអាកុល១០០% ព្យាមយាមបើកចេញដណ្ដើមយកផ្លូវអតិភាព ទើបបណ្តាលអោយមានគ្រោះថ្នាក់ចរាចរខាងលើ និងធ្វើអោយស្លាប់ជនរងគ្រោះយ៉ាងអាណោចអាធម្ម ដោយគ្នាគ្មានដឹងអីសោះ ៕
