កំពង់ឆ្នាំង៖សមត្ថកិច្ចចម្រុះរដ្ឋបាលជលផល ខេត្តពោធិសាត់ និងខេត្តកំពង់ឆ្នាំង ដឹកនាំដោយលោក មាក សឿង នាយរងអធិការដ្ឋាន រដ្ឋបាលជលផលខាងត្បូងបឹងទន្លេសាប លោក លី ឡា នាយរងខណ្ឌរដ្ឋបាលជលផល ខេត្តកំពង់ឆ្នាំង សហការជាមួយកម្លាំង សង្កាត់រដ្ឋបាលជលផលកំពង់
ហ្លួង ខេត្តពោធិសាត់ ក្នុងនោះដោយមានការចូលរួម ពីកម្លាំងយោធា ខេត្តពោធិសាត់ ចំនួន២នាក់ និង នគរបាលស្រុកបរិបូណ៌ ខេត្តកំពង់ឆ្នាំងម្នាក់ សរុបរួមទាំងកម្លាំងរដ្ឋបាលជលផល សង្កាត់បរិបូណ៌ និងផ្នែកផ្សារឆ្នាំង ខេត្តកំពង់ឆ្នាំង ប្រមាណជាង២០នាក់ ប្រើប្រាស់ដោយមធ្យោបាយកាណូតបាឡា ចំនួន៤គ្រឿង បានចុះយុទ្ធនាការបន្តបន្ទាប់ ចំនួន២ថ្ងៃ គឺគិតចាប់ពីថ្ងៃទី៣ ដល់ថ្ងៃទី៤ ខែមិថុនា ឆ្នាំ២០១៥ លទ្ធផលបង្ក្រាបបាន ក្នុងថ្ងៃទី០៣ ខែមិថុនា ឆ្នាំ២០១៥ មានរបាំងសាច់អួន ប្រវែង៦០០ម៉ែត្រ លូសាច់អួន ចំនួន២២គ្រឿង បង្គោលចំនួន៤៤០ដើម និងចាក់លែងត្រីគ្រប់ប្រភេទ ចូលបឹងធម្មជាតិវិញ ចំនួន២៥គីឡូក្រាម ។
លទ្ធផលនៅព្រឹកថ្ងៃទី០៤ ខែមិថុនា បង្ក្រាបបាន របាំងសាច់អួន ប្រវែង៥៦០ម៉ែត្រ លូសាច់អួន ចំនួន១៦គ្រឿង បង្គោលចំនួន៣២០ដើម និងចាក់លែងត្រី ចម្រុះគ្រប់ប្រភេទចូលក្នុងទឹកវិញ ចំនួន១៥គីឡូក្រាម ដោយឡែកល្ងាចថ្ងៃដដែលនោះផងដែរ បង្ក្រាបបានរបាំងសាច់អួន ប្រវែង៤០០ម៉ែត្រ លូសាច់អួនចំនួន៨គ្រឿង បង្គោលចំនួន៣៥០ដើម ចាក់លែងត្រីចូលទៅក្នុងទឹកវិញ បានចំនួន១៥គីឡូក្រាម ។ សរុបបង្ក្រាបបានរបាំងសាច់អួន ចំនួន២៤កន្លែង ប្រវែង៩៦០ម៉ែត្រ លូសាច់អួន ចំនួន២៤គ្រឿង បង្គោលចំនួន៦៧០ដើម ចាក់លែងត្រីចម្រុះ ចំនួន៣៥គីឡូក្រាម ។
សូមបញ្ជាក់ថា តំបន់ ក-ដប ជាតំបន់ប្រសពគ្នា ជាប់ព្រំប្រទល់៣ខេត្ត គឺខេត្តកំពង់ឆ្នាំង ពោធិសាត់ និងកំពង់ធំ ហើយក៍ជាច្រកតែមួយគត់ ត្រីធ្វើចរាចរណ៍ប្រាស្រ័យទាក់ទងគ្នា ពីបឹងទន្លសាប ទៅទន្លេមេគង្គ ដែលមន្ត្រីជំនាញហៅថា ច្រកបំពង់ក ដោយឡែកប្រជាពលរដ្ឋហៅថា តំបន់ឆ្នុកទ្រូ ៕
