ខេត្តបន្ទាយមានជ័យ៖លោកអ៊ុងអឿនប្រធានក្រុមប្រឹក្សាខេត្តបន្ទាយមានជ័យបានណែនាំដល់សមាជិករបស់ខ្លួនត្រូវចេះសហការគ្នានិងធ្វើតាមដានវាយតម្លៃគម្រោងឃុំ.សង្កាត់ខណៈដែលការណែនាំនោះត្រូវបានលើកឡើងក្នុងវគ្គផ្សព្វផ្សាយនៅព្រឹកថ្ងៃទី៤មិថុនា២០១៥នៅសាល
ប្រជុំសាលាខេត្តបន្ទាយមានជ័យ។ លោក អ៊ុង អឿន ប្រធានក្រុមប្រឹក្សាខេត្តបន្ទាយមានជ័យបានមានប្រសាសន៍ថា វគ្គផ្សព្វផ្សាយសៀវភៅណែនាំស្តីពីការអនុវត្តគម្រោងមូលនិធិឃុំ.សង្កាត់ដែលត្រូវបានកែសម្រួលដែលចូលរួមពីសមាជិកក្រុមប្រឹក្សាខេត្តចំនួន ១៧រូបមានប្រធានក្រុមប្រឹក្សាស្រុក.ក្រុងចំនួន៩រូបនាយរដ្ឋបាលស្រុក.ក្រុងចំនួន៩រូបបុគ្គលឹកបច្ចេកទេសស្រុក.ក្រុងចំនួន៩រូបនិងក្រុមប្រឹក្សាឃុំសង្កាត់ចំនួន១៣០នាក់សរុបចំនួន១៧៤នាក់។ លោកបានបន្តថា វគ្គផ្សព្វផ្សាយនេះមានគោលបំណងឲ្យមន្ត្រីគ្រប់រូបមានការយល់ដឹងអំពីគម្រោងមូលនិធិឃុំ.សង្កាត់និងដំណើរការលទ្ធកម្មគម្រោងមូលនិធិឃុំសង្កាត់ ការត្រួតពិនិត្យគុណភាពគម្រោង ផ្នែកអភិវឌ្ឍន៍មូលដ្ឋានឃុំ.សង្កាត់ និយមន័យនៃគម្រោងហេដ្ឋារចនាសម្ព័ន្ធមូលដ្ឋាន គម្រោងសេវាកម្ម និងការពិនិត្យបញ្ជាក់បច្ចេកទេសជាដើម។
លោក អ៊ុង អឿន បានណែនាំដល់សមាជិកក្រុមប្រឹក្សាខេត្តនិងស្រុក.ក្រុងឃុំសង្កាត់ត្រូវចេះសហការគ្នាអោយបានល្អនិងតាមដានវាយតម្លៃគម្រោងឃុំ.សង្កាត់ធ្វើយ៉ាងណាត្រូវយកចិត្តទុកដាក់ដល់ប្រជាពលរដ្ឋនិងប្រទេសជាតិមានអភិវឌ្ឍន៍និងរីកចម្រើននៅកម្ពុជាទៀតផង៕
