ខេត្តព្រះវិហារ៖មន្ដ្រីរដ្ឋបាលព្រៃឈើកំពង់ស្រទ្បៅនិងរដ្ឋបាលព្រៃឈើឆែបចុះល្បាតតាមព្រៃឈើការពារអភិរក្សព្រះរការបានប្រទះឃើញគំនរឈើអារដែលឈ្មួញខិលខូចធ្វើសន្និធិខុសច្បាប់តាមដុបព្រៃហើយបានរាយការណ៍និងឆ្លងយោបល់លោកព្រះរាជអាជ្ញាអមសាលាដំបូងខេត្តព្រះវិហារដើម្បីឈានទៅធ្វើការបង្ក្រាបរឹបអូសកាលពីរសៀលថ្ងៃទី០៦មិថុនា២០១៥ស្ថិតនៅភូមិពោធិ៍ទាបឃុំម្លូរព្រៃ១ស្រុកឆែប។លោកសេងលាងនាយសង្កាត់រដ្ឋបាលព្រៃឈើកំពង់ស្រទ្បៅបានអោយដឹងថាក្រុមការងាររបស់លោកបានប្រមូលរឹបអូសគំនរឈើអារលេខ១ប្រភេទគគីរដែលធ្វើសន្និធិក្នុងដុបព្រៃបានចំនួន៧១សន្លឹកស្មើនឹង៤,២៩៣ម៉ែត្រគូបគឺជាគំនរឈើអញ្ញតិជន(គ្មានម្ចាស់ឈើណាម្នាក់ចេញមុខអះអាង)។មុននឹងធ្វើការរឹបអូសគំនរឈើសន្លឹកទាំងអស់នោះលោកបានឆ្លងយោបល់ពីលោកលីលន់ព្រះរាជអាជ្ញាអមសាលាដំបូងខេត្តព្រះវិហារទៅតាមនិតិវិធីច្បាប់ត្រឹមត្រូវផងដែរ។លោកនាយសង្កាត់រដ្ឋបាលព្រៃឈើបន្តថាការចុះបង្ក្រាបបទល្មើសព្រៃឈើខាងលើនេះដោយមានការលើកទឹកចិត្តពីលោកគឹមជេតថាវីនាយផ្នែករដ្ឋបាលព្រៃឈើឆែបនិងលោកអ៊ិតភូម្រានាយខណ្ឌរដ្ឋបាលព្រៃឈើព្រះវិហារ។វត្ថុតាងឈើខុសច្បាប់ទាំងអស់នេះត្រូវបានក្រុមការងារដឹកជញ្ជូនយកទៅរក្សាទុកនៅផ្នែករដ្ឋបាល
ព្រៃឈើឆែបនិងបានកសាងសំណុំរឿងបញ្ជូនទៅកាន់សាលាដំបូងខេត្តដើម្បីចាត់ការទៅតាមផ្លូវច្បាប់។តាមសេចក្ដីរាយការណ៍ពីភ្នាក់ងារបានបង្ហើបអោយដឹងថាការបង្ក្រាបបទល្មើសវិស័យព្រៃឈើតាំងពីដើមទីរហូតមកដល់បច្ចុប្បន្ននៅទូទាំងខេត្តព្រះវិហារជួបឧបសគ្គមួយចំនួនធ្វើអោយកិច្ចការបង្ក្រាបគ្មានប្រសិទ្ធភាព។គ្រប់សមត្ថកិច្ចជំនាញមេព្រៃបន្ធូរដៃមិនសូវខិតខំបង្ក្រាបទប់ស្កាត់បទល្មើសព្រៃឈើមកពីគ្មានថវិកាចរន្តសំរាប់ដកចំណាយទូទាត់ថ្លៃជួលកម្មករលើកដាក់លីសែងឈើថ្លៃជួលរថយន្ដដឹកជញ្ជូននិងថ្លៃចំណាយប្រើប្រាស់ប្រេងឥន្ធនះជាដើម៕
