កំពង់ឆ្នាំង៖កុមារកំព្រាទុរគតទាំង៥នាក់ដែលម្តាយស្លាប់ចោលរស់នៅភូមិថ្មី ឃុំកំពង់អុស ស្រុកជលគីរី ខេត្តកំពង់ឆ្នាំង និងត្រូវឪពុកចាកចោលតាំងពីកូនពៅមានអាយុ៣ខែនៅក្នុងផ្ទៃម្តាយ ត្រូវបានឯកឧត្តម ឈួរ ច័ន្ទឌឿន អភិបាលខេត្ត និងលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង អោយលោក ថោងចំរើន ប្រធានមន្ទីរសង្គមកិច្ចខេត្តកំពង់ឆ្នាំង នាំពួកគេមកអោយស្នាក់នៅក្នុងមណ្ឌលកុមារកំព្រាខេត្តកំពង់ឆ្នាំង នៅព្រឹកថៃ្ងទី១១ ខែមិថុនា ឆ្នាំ២០១៥បាន ដើម្បីអោយក្មេងទាំង៥នាក់នោះបានហូបចុកគ្រាប់គ្រាន់និងបន្តការសិក្សារៀនសូត្រដូចកុមារដ៏ទៃទៀត។
អាជ្ញាធរដែនដីបានបញ្ជាក់អោយដឹងថា៖ឪពុកកុមារទាំង៥នាក់នោះមានឈ្មោះ សែម សុវ៉ាន អាយុ៤៥ឆ្នាំ បានចាកចោលកូនទាំង៥តាំងពីកូនពៅនៅក្នុងផ្ទៃម្តាយ៣ខែម្ល៉េះ មិនដឹងជាទៅទីណាទេ និងម្តាយមាន ឈ្មោះ កិច វិន អាយុ៤០ឆ្នាំបានរកស៊ីចិញ្ចឹមកូនតែម្នាក់ឯងតាំងពីឆ្នាំ២០១១មកម្ល៉េះ ដោយប្រកបមុខរបបរាវលៀសចិញ្ចឹមកូន មកដល់ឆ្នាំ២០១៤បានធ្លាក់ខ្លួនមានជំងឺប្រចាំកាយធ្ងន់ធ្ងរ បានកូនស្រីបងអាយុ១៣ឆ្នាំមកស៊ីឈ្នួលរើសត្រីអោយគេយកលុយមកចិញ្ចឹមម្តាយនិងប្អូនទាំង៤នាក់។តែជាអកុសលម្តាយកុមារទាំង៥នាក់បានស្លាប់នៅថៃ្ងទី០៨ ខែមិថុនា ឆ្នាំ២០១៥ដោយទុកអោយកូនទាំង៥នាក់នៅកំព្រាគ្មានទីពឹង។កុមារទាំងនេះគឺ៖កូនបងឈ្មោះ សែមលីន ភេទស្រី អាយុ១៣ឆ្នាំស៊ីឈ្នួលរើសត្រីអោយគេយកលុយចិញ្ចឹមប្អូនៗ,កូនទី២ឈ្មោះ សែម លី ភេទស្រី អាយុ១០ឆ្នាំ អត់បានរៀនមើលប្អូន,កូនទី៣ឈ្មោះ សែម រក្សា ភេទប្រុស អាយុ៨ឆ្នាំ បានរៀនខ្លះអត់ខ្លះ ,កូនទី៤ឈ្មោះ សែម ឌី ភេទប្រុស អាយុ៦ឆ្នាំ អត់បានរៀន និងកូនទី៥ ឈ្មោះ សែម ស្រ៊ី ភេទប្រុស អាយុ៥ឆ្នាំ អត់បានរៀន។
អាជ្ញាធរដែនដីបានអោយដឹងបន្តទៀតថា៖នៅពេលម្តាយស្លាប់ចោលទៅនៅថៃ្ងទី៨ ខែមិថុនា ឆ្នាំ២០១៥នេះ កូនស្រីបងឈ្មោះ សែម លីន បានខ្ចីលុយ លោកស្រី ហៀប នៅភូមិកណ្តាល សង្កាត់ផ្សារឆ្នាំង ក្រុងកំពង់ឆ្នាំង ចំនួន៧០ម៉ឺនរៀលយកមកធ្វើបុណ្យសពអោយម្តាយ ក្រោយពីបុណ្យសពម្តាយរួចនិងទៅធ្វើការរកលុយសងគេវិញ។
លោក ថោង ចំរើន ប្រធានមន្ទីរសង្គមកិច្ចខេត្តបានអោយដឹងថា៖ក្រោយពីលោកបានទទួលដំណឹងពីអាជ្ញាធរមូលដ្ឋានសុំអោយ ជួយសង្រោះក្មេងកំព្រាទុរគតទាំង៥នាក់អោយបានរៀនសូត្រមានអនាគតល្អដូចគេឯងនោះ និង ដោយមានការព្រួយបារម្មណ៍អំពីជីវភាព សុខភាព សន្តិសុខ សុវត្តិភាព ការមិនបានរៀនសូត្ររបស់កុមារកំព្រាទាំង៥នាក់នោះ ឯកឧត្តម ឈួរ ច័ន្ទឌឿន អភិបាលខេត្តកំពង់ឆ្នាំង និងលោកជំទាវ កែ ច័ន្ទមុនី អ្នកតំណាងរាស្ត្រមណ្ឌលកំពង់ឆ្នាំង នៅព្រឹកថៃ្ងទី១១ ខែមិថុនា ឆ្នាំ២០១៥ បានអោយលោករួមនិ ងសហការីមាន លោក ឈាង ចន្ធី និងលោក ខាន់ សុឡេង មន្ត្រីមន្ទីរសង្គមកិច្ចខេត្ត និងមានការចូលរួមធ្វើសាក្សីពីអាជ្ញាដែនដីបានធ្វើសំណុំបែបបទតាមផ្លូវច្បាប់ ហើយបាននាំយកកុមារទាំង៥នេះ មកស្នាក់នៅក្នុងមណ្ឌលកុមារកំព្រាខេត្តកំពង់ឆ្នាំង នៅព្រឹកថ្ងៃទី១១ ខែមិថុនា ឆ្នាំ២០១៥នេះហើយ។
លោក ថោង ចំរើន បានអោយដឹងបន្តទៀតថា៖មុនចូលដល់មណ្ឌលកុមារកំព្រា លោកជំទាវ កែ ច័ន្ទមុនី បាន
ជួបសំណេះសំណាល និងសាកសួរសុខទុក្ខកុមារកំព្រាទុរគតទាំង៥នាក់ ដោយលោកជំទាវ បានសំណូមពរ អោយលោកថែទាំកុមារទាំង៥នេះអោយបានល្អគ្រប់ៗគ្នា និងរៀបចំកន្លែងស្នាក់អោយបានសមរម្យ ផ្គត់ផ្គង់ការហូបចុកអោយបានគ្រប់គ្រាន់ និងរៀបចំសំណុំបែបបទអោយកុមារទាំង៥នាក់នេះ បានបន្តការសិក្សាគ្រប់ៗគ្នា ដើម្បីអោយកុមារទាំង៥នេះមានអនាគតល្អដូចកុមារដទៃទៀតដែរ។លោកជំទាវ កែ ច័ន្ទមុនី ក៏បានឧបត្ថម្ភថវិកាចំនួន១០០ដុល្លាអោយលោកយកទៅសងលោកស្រី ហៀប ដែលក្មួយស្រី សែម លីន ខ្ចីយកទៅធ្វើបុណ្យសពម្តាយផងដែរ។ចំពោះថវិកាដែលក្មួយស្រី សែម លីន ខ្ចីលោកស្រី ហៀប ចំនួន៧០ម៉ឺនរៀល លោកស្រីបានអោយប្អូនស្រីសងតែ៤០ម៉ឺនប៉ុណ្ណោះ ហើយ៣០ម៉ឺនទៀតលោកស្រីបានចូលបុណ្យសពម្តាយក្មួយស្រី៕
)
