ខេត្ដក្រចេះ ៖ ជនសង្ស័យម្នាក់ក្នុងចំណោមបក្ខពួកជាច្រើននាក់ត្រូវកម្លាំងនគរបាលស្រុកសំបូរចាប់ឃាត់ ខ្លួនកាលពីយប់ថ្ងៃទី១៦ ខែមេសា បន្ទាប់ ពីជនម្នាក់នេះបានបង្កហិង្សាដោយ ចេតនាវាយកាប់ចាក់ទៅលើប្រជាពល រដ្ឋនិងប្រជាការពារភូមិចំនួន៣នាក់ឱ្យ រងរបួសធ្ងន់ក្នុងជម្លោះរាំធុងបាស់ក្នុងវត្ដមួយដើម្បីអបអរពិធីបុណ្យចូលឆ្នាំថ្មី ។នគរបាលស្រុកសំបូរបានឱ្យដឹងថា ជនសង្ស័យម្នាក់នេះឈ្មោះ ម៉ៅ វីរៈ ហៅវ៉ិត អាយុ២៦ឆ្នាំ មានទីលំនៅភូមិ កោះច្បារ ឃុំកំពង់ចាម ស្រុកសំបូរ ខេត្ដក្រចេះ ។
បើតាមប្រភពព័តមានពីកន្លែងកើតហេតុបានអោយដឹងថា ៖ កាលពីថ្ងៃ ទី១៥ មេសា ជនសង្ស័យម្នាក់នេះ បាន មកផឹកស៊ីរាំរែកនៅក្នុងវត្ដក្នុងភូមិដែលមានចាក់ធុងបាស់រាំកម្សាន្ដដើម្បីអប អរពិធីបុណ្យចូលឆ្នាំថ្មី ហើយជននេះបាន មានជម្លោះជាមួយម្ចាស់ធុងបាស់ឈ្មោះ ភឿន ដែន អាយុ៣៧ឆ្នាំ ខណៈដែល ជននេះបានឱ្យម្ចាស់ធុងបាស់ចាក់បទ ញាក់តែម្ចាស់ធុងបាស់មិនចាក់តាម បំណងគេ ។
ប្រភពដដែរបានបន្តទៀតថា ៖ រហូតដល់ថ្ងៃទី១៦ មេសា ជនសង្ស័យម្នាក់នេះ បានមករាំកម្សាន្ដនៅក្នុងវត្ដនេះម្ដង ទៀតជាមួយបក្សពួកមួយចំនួន ។ រហូត ដល់វេលាម៉ោង១១យប់ជននេះក៏មាន ចេតនាយកកាំបិតប៉័ងតោកាប់លើ ម្ចាស់ធុងបាស់ឈ្មោះ ភឿន ដែន តែ ដោយជនរងគ្រោះគេចទាន់ក៏ត្រូវចំភ្លៅខាងស្ដាំបណ្ដាលឱ្យរងរបួសធ្ងន់ ។
ក្នុងជម្លោះនោះក៏មានប្រជាការពារភូមិ៣ នាក់ដែលនៅក្បែរនោះបានចូលទៅជួយឃាត់តែត្រូវជននេះកាប់យ៉ាងចាស់ដៃ បណ្ដាលឱ្យប្រជាការពារ៣នាក់បានរងរបួសធ្ងន់ដូចគ្នា ។ លោកវរសេនីយ៏ទោ ហួត លឹមហ៊ាង នាយការិយាល័យព្រហ្មទណ្ឌកម្រិត ធ្ងន់បានឱ្យដឹងថា៖ ជនម្នាក់នេះគឺត្រូវ កម្លាំងនគរបាលស្រុកសំបូរចាប់ឃាត់ ខ្លួនភ្លាមៗបន្ទាប់ពីរូបគេនិងបក្សពួកជា ច្រើននាក់បានយកកាំបិតប៉័ងតោកាប់ទៅ លើប្រជាការពារភូមិនិងម្ចាស់ធុងបាស់បណ្ដាលឱ្យរបួសធ្ងន់ ។
រីឯបក្ខពួករបស់ គេមួយចំនួនទៀតដែលរត់គេចខ្លួនគឺ កម្លាំងនគរបាលកំពុងតែតាមស្រាវជ្រាវចាប់ខ្លួនផងដែរ ។ លោកនាយការិយាល័យព្រហ្មទណ្ឌ កម្រិតធ្ងន់បានបន្ដថា៖ ជនម្នាក់នេះត្រូវ កម្លាំងនគរបាលកសាងសំណុំរឿងចោទ ប្រកាន់ពីបទហិង្សាដោយចេតនាមាន ស្ថានទម្ងន់ទោសនិងត្រូវបញ្ជូនខ្លួនទៅ កាន់សាលាដំបូងខេត្ដនារសៀលថ្ងៃទី១៨ ខែមេសា នេះដើម្បីមានវិធានការបន្ដតាមផ្លូវច្បាប់ ៕
