ខេត្តបន្ទាយមានជ័យ ៖ ដងស្ទឹងមង្គលបូរីផ្នែកខាងក្រោមក្នុងភូមិសាស្ត្រឃុំឫស្សីក្រោកឃុំគយម៉ែងនិងឃុំសំបួរស្រុកមង្គលបូរី ខេត្តបន្ទាយមានជ័យនៅកន្លែងខ្លះនៅតែខ្វះខាតទឹកប្រើប្រាស់និងបរិភោគនៅឡើយ។ តែកន្លែងខ្លះ មានទឹកឡើងវិញ ដោយសារតែមានទឹកភ្លៀង ធ្លាក់មួយ
មេធំ កាលពីល្ងាចថ្ងៃទី៧ ខែមិថុនា ឆ្នាំ២០១៥កន្លងមកនេះ។ ពោលគឺពុំមែនទឹកដែលមន្ត្រីអះអាងថាពីការបើកទម្លាក់ទឹក ពីទ្វារស្ទាក់ទឹក នៅស្រុកបវេល ខេត្តបាត់ដំបង កន្លងមកនោះឡើយ។ពលរដ្ឋនៅភូមិអញ្ចាញ ឃុំឫស្សីក្រោក បាននិយាយនៅថ្ងៃទី១២មិថុនានេះថា: ទឹកដក់ ហើយថ្លា ដែលឃើញមាន នៅក្នុងស្ទឹងមង្គលបូរី ពេលនេះ ពុំមែនទឹកហូរពីផ្នែកខាងលើ របស់ដងស្ទឹង ដែលខាងធនធានទឹកថា បើកបង្ហូរជាង ១ សប្តាហ៍មកនោះទេគឺមានដោយសារតែជាទឹកភ្លៀង ១ មេយ៉ាងធំ កាលពីយប់ថ្ងៃទី៧ មិថុនាតែប៉ុណ្ណោះ។ ចំណែកពលរដ្ឋ និងមន្ត្រីមូលដ្ឋាន បាននិយាយថា បណ្តោយដងស្ទឹងមង្គលបូរី ក្នុងភូមិសាស្ត្រ ឃុំឫស្សីក្រោក ឃុំគយម៉ែង ឃុំតាឡំ ឃុំគោកបល្ល័ង្គ និងឃុំសំបួរ ភាគច្រើន នៅខ្វះខាតទឹកដដែល។ ផ្ទៃស្ទឹង នៅកន្លែងខ្លះ នៅតែគ្មានទឹកប្រើប្រាស់ និងទឹកបរិភោគ។ ប៉ុន្តែទឹកផ្សើមដំណាំស្រូវ និងដំណាំលែងមានបញ្ហាទៀតហើយ ដោយសារមានភ្លៀងរលឹមដែរមកជាបន្តបន្ទាប់។ លោក រ័ត្ន ដាស៊ីណង់ អភិបាលស្តីទី ស្រុកមង្គលបូរី បានឲ្យដឹងនៅថ្ងៃទី១២មិថុនាថា: ទោះបីជាផ្នែកខាងលើ នៃដងស្ទឹងមង្គលបូរី មានទឹកមួយចំនួនឡើងវិញក៏ដោយៗសារទឹកបង្ហូរ ពីទំនប់ស្ទាក់ទឹកបវេល ខេត្តបាត់ដំបង ដែលជាផ្នែកខាងលើស្ទឹងនិងទឹកភ្លៀង។ ប៉ុន្តែផ្នែកខាងក្រោម ដងស្ទឹង នៅកន្លែងខ្លះឃុំឫស្សីក្រោក គយម៉ែង តាឡំ គោកបល្ល័ង្គ និងសំបួរ នៅតែគ្មានទឹក ក្នុងស្ទឹងដដែលមិនអាចឆ្លើយតបតាមតម្រូវការបានទេ។ តែសម្រាប់ដំណាំស្រូវ និងដំណាំផ្សេងៗអាចដុះលូតលាស់បាន ព្រោះមានភ្លៀងរលឹមតិចផងដែរ។ លោករ័ត្ន ដាស៊ីណង់ បាននិយាយបន្តថា រដ្ឋបាលស្រុក ក្តាប់សភាពការណ៍ទឹកភ្លៀង និងទឹកស្ទឹង ក៏ដូចជា ទឹកតាមស្រះ អណ្តូង ត្រពាំង បឹងបួរ ជាប្រចាំ ដោយឲ្យមេភូមិ មេឃុំ តាមដាននិងរាយការណ៍៕
