ពោធិ៍សាត់៖កាលពីវេលាម៉ោង២និង៣០នាទីរសៀល ថ្ងៃទី១២ ខែមិថុនា ឆ្នាំ២០១៥ ក្នុងភូមិត្នោតទ្រេត សង្កាត់ផ្ទះព្រៃ ក្រុងពោធិ៍សាត់ សិស្សប្រុសៗ នៃសាលាទាចំរ៉ាត់២នាក់ បានស្លាប់នៅនឹងកន្លែងតារាងបាល់ទាត់ភ្លាមៗ ឯមនុស្ស១៦នាក់ទៀត ដែលជាប្រុសៗបានរងរបួស ក្នុង
នោះធ្ងន់ធ្ងរម្នាក់ សល់តែដង្ហើមចង្រិត ត្រូវបានជួយសង្គ្រោះទៅកាន់មន្ទីរពេទ្យ ខេត្តពោធិ៍សាត់ជាបន្ទាន់ ។
នៅកន្លែងកើតហេតុ សិស្សានុសិស្ស ដែលបានឃើញហេតុការណ៍នេះ បានប្រាប់អ្នកយកព័ត៌មានថា មុនពេលកើតហេតុនោះ ពេលដែលពួកគេសម្រាកពីការរៀនសូត្រ ផ្ទៃមេឃដែលកំពុងតែក្ដៅខ្លាំងនោះ បានប្រែពណ៌ស្រទំរាងត្រជាក់ តែមិនមានភ្លៀងទេ ស្របពេលនោះសិស្សប្រុសៗក្នុងសាលាទាចំរ៉ាត់មួយហ្វូង ក៏នាំគ្នីគ្នាបបួលលេងបាល់ទាត់ ហើយក៏មានអ្នកឈរស្រែកហ៊ោកញ្ជ្រៀវ មើលខាងក្រៅដែរ ស្រាប់តែពួកគេកំពុងនាំគ្នាទាត់បាល់ បានមួយសន្ទុះ ក៏មានរន្ទះធម្មជាតិដ៏កាចសាហាវ ទាំងមេឃគ្មានធ្លាក់ភ្លៀងបាញ់ប្រហារ កន្លែងហ្វូងពួកគេទាត់បាល់នោះ បណ្ដាលឲ្យដួលរណូករណែល មុខទីធ្លាសាលាទាចំរ៉ាត់ ដោយ២នាក់បានស្លាប់នៅនឹងកន្លែង និង១៦នាក់ទៀតរងរបួស ក្នុងនោះមានម្នាក់របួសធ្ងន់ធ្ងរ សល់តែដង្ហើមចង្រិត ត្រូវបានជួយសង្គ្រោះជាបន្ទាន់ ទៅកាន់មន្ទីរពេទ្យ ខេត្តពោធិ៍សាត់ ។
លោក ប៉ិច សុផាន់ នាយប៉ុស្តិ៍ផ្ទះព្រៃ បានប្រាប់ពីអត្តសញ្ញាណ អ្នកស្លាប់ឲ្យដឹងថា ទី១–ឈ្មោះ រ៉ា ភារ៉ូត អាយុ១៩ឆ្នាំ ភេទប្រុស រៀនថ្នាក់ទី៩A រស់នៅភូមិចំកាអូរ ឃុំស្មាមព្រះ ស្រុកបាកាន ខេត្តពោធិ៍សាត់ ,ទី២–ឈ្មោះ យ៉េត សេងហុង អាយុ១៦ឆ្នាំ ភេទប្រុស រៀនថ្នាក់ទី៩A រស់នៅភូមិដងឡង ឃុំកោះជុំ ស្រុកកណ្ដៀង ខេត្តពោធិ៍សាត់ ។ ក្រោយកើតហេតុភ្លាម ជនរងគ្រោះ ដែលគេត្រូវបញ្ជូនទៅកាន់មន្ទីរពេទ្យ ខេត្តពោធិ៍សាត់នោះ ត្រូវឯ,ឧ ម៉ៅ ធនិន្ទ អភិបាល នៃគណៈអភិបាល ខេត្តពោធិ៍សាត់ ចុះទៅផ្ទាល់ ដើម្បីសួសុខទុក្ខផ្ទាល់ ។
ឯ,ឧអភិបាលខេត្ត បានឲ្យដឹងនៅក្នុងមន្ទីរពេទ្យនោះថា ឯ,ឧបានផ្ដល់ថវិកា ដល់អ្នករបួសក្នុងម្នាក់ៗទទួលបាន១០ម៉ឺនរៀល និងអ្នកស្លាប់ នៅថវិកា៣០ម៉ឺនរៀល អង្ករម្នាក់៥០គីឡូក្រាម ៕
