នារីមានផ្ទៃពោះម្នាក់បានស្លាប់ នៅនឹងកន្លែងកើតហេតុ និងបុរសម្នាក់បានរងរបួសធ្ងន់ធ្ងរ ត្រូវបានរថយន្តសាមុយ ដឹកយកទៅសង្គ្រោះនៅមន្ទីរពេទ្យភ្លាមៗ ដោយសារតែរថយន្តរ៉េងរ៉ូវ័រ បើកក្នុងល្បឿនលឿន រេចង្កូតជ្រុលបុរះពេញទំហឹង កាលពីវេលាម៉ោង២នឹង៣០នាទី រំលងអាធ្រាតឈានចូលថ្ងៃទី១៥ ខែមិថុនា ឆ្នាំ២០១៥ នៅផ្លូវរទេះភ្លើង តាមបណ្តោយផ្លូវលេខ៧០ ស្ថិតក្នុងសង្កាត់ទួលសង្កែ ខណ្ឌឬស្សីកែវ ។
ប្រភពពត៌មានពីកន្លែងកើតហេតុ បានឱ្យដឹងថា មុនពេលកើតហេតុ គេបានឃើញនារីរងគ្រោះខាងលើ បានឈរនៅមុខកន្លែងផ្ទះលក់ដូរមួយកន្លែង ជិតកន្លែងកើតហេតុ ចំណែកឯបុរសខាងលើ ជិះម៉ូតូស្មាសវី ពណ៍ខ្មៅ ពាក់ស្លាកលេខ ភ្នំពេញ 1Z-1597 បានឈប់ចូលកន្លែងលក់ឥវ៉ាន់ ដើម្បីចាក់សាំង ភ្លាមនោះគេបានឃើញរថយន្តរ៉េងរ៉ូវ័រ ពណ៍ខ្មៅ មិនចាំស្លាកលេខ បើកបរតាមបណ្តោយផ្លូវលេខ៧០ ទិសដៅពីកើតទៅលិច ក្នុងល្បឿនយ៉ាងលឿន រួចបានរេចង្កូតបុករះ បណ្តាលឱ្យនារីរងគ្រោះ បោកផ្ទប់នឹងរ៉ឺម៉កកង់បី ស្លាប់ភ្លាមៗយ៉ាងអាណោចអាធម៌ នៅនឹងកន្លែងកើតហេតុ ចំណែកបុរសម្នាក់ទៀត របួសធ្ងន់ធ្ងរ ត្រូវបានរថយន្តសាមុយ ដឹកយកទៅសង្គ្រោះនៅមន្ទីរពេទ្យភ្លាមៗ ។ បន្ទាប់ពីបង្កហេតុ រថយន្តខាងលើមិនបានឈប់នោះទេ គឺបានបន្ថែមល្បឿន បើកគេចខ្លួនបាត់ស្រមោលតែម្តង ។
ក្រោយកើតហេតុ សមត្ថកិច្ចមូលដ្ឋាន បានចុះមកដល់កន្លែងកើតហេតុ និងបានទំនាក់ទំនង ទៅសាច់ញាតិ ក្រុមគ្រួសារសព ឱ្យមកទទួលយកទៅធ្វើបុណ្យតាមប្រពៃណី ចំណែកជនរងគ្រោះ នៅមិនទាន់ស្គាល់អត្តសញ្ញាណ នៅឡើយនោះទេ ៕
