ហេតុការណ៍គ្រោះថ្នាក់ចរាចរណ៍មួយ ដែលបង្កឡើងដោយសារតែរថយន្តរ៉េងរ៉ូវ័រ ពាក់ស្លាកលេខ ខេមរភូមិមិន្ទ បើកក្នុងល្បឿនលឿន បំណងបត់ឆ្វេងដៃ បួងចង្កូតមិនទាន់ ជ្រុលបុកទ្វារក្រុមហ៊ុន CM60 Lottery ពេញទំហឹង បណ្តាលឱ្យរងការខូចខាត សំណាងល្អដែលសន្តិសុខ យាមនៅមុខក្រុមហ៊ុនលោតគេចទាន់គ្រាន់តែរបួសស្រាល ។ ហេតុការណ៍នេះបានកើតទ្បើង កាលពីវេលាម៉ោង២នឹង១០នាទី រំលងអាធ្រាតឈានចូលថ្ងៃទី១៥ ខែមិថុនា ឆ្នាំ២០១៥ នៅក្រុមហ៊ុន CM60 Lottery តាមបណ្តោយផ្លូវសីហនុ កែងនឹងផ្លូវលេខ៦៣ស្ថិតក្នុងសង្កាត់បឹងកេងកងទី២ ខណ្ឌចំការមន ។
សាក្សីដែលបានឃើញហេតុការណ៍ផ្ទាល់ បានឱ្យដឹងថា នៅមុនពេលកើតហេតុ គេបានឃើញយុវជនម្នាក់ បើករថយន្តរ៉េងរ៉ូវ័រ ពណ៍សពាក់ស្លាកលេខ ខេមរភូមិមិន្ទ 2-0035 រួមដំណើរដោយនារី៣នាក់ក្នុងរថយន្ត បើកបរតាមបណ្តោយផ្លូវព្រះសីហនុ ទិសដៅពីកើតទៅលិច ក្នុងល្បឿនយ៉ាងលឿន ខណះមកដល់ចំណុចកើតហេតុបំណងបត់ឆ្វេង ប៉ុន្តែបួងចង្កូតមិនទាន់ បានបុកទ្វារក្រុមហ៊ុន CM60 Lottery ពេញទំហឹងលាន់ដូចរន្ទះ បណ្តាលឱ្យរងការខូចខាត តែសំណាងសន្តិសុខដែលយាមនៅមុខក្រុមហ៊ុន លោតគេចទាន់គ្រាន់តែរបួសស្រាល ចំណែករថយន្តបង្ក បានបែកកង់ខាងស្តាំ និងរងការខូចខាត ផ្នែកខាងមុខយ៉ាងដំណំ ។
ក្រោយកើតហេតុ សមត្ថកិច្ចមូលដ្ឋាន បានចុះមកដល់កន្លែងកើតហេតុ និងសហការជាមួយជំនាញ ធ្វើការវាស់វែង ស្ទូចយករថយន្តបង្កទៅរក្សាទុក នៅការិយាល័យចរាចរណ៍ជើងគោក រាជធានីភ្នំពេញ រង់ចាំដោះស្រាយ នាពេលក្រោយ ៕
