ខេត្ដសៀមរាប ៖រថយន្តដឹកដីបើកបរមកពីកើតមកលិចក្នុងល្បឿនលឿន បតចូលកាហ្គាស់ឡានយីហោ ជាង យីន មិនបានមើលឆ្វេងស្តាំ ក៏បុកម៉ូតូពេញទំហឹង បណ្តាលឲ្យដួលរួចថយក្រោយកិនចំកង់ក្រោយខាងឆ្វេងស្លាប់ភ្លាមៗនៅកន្លែងកើតហេតុ ចំណែកអ្នកបើករថយន្តគេចខ្លួនបាត់ ដោយសុវត្ថិភាព។
ហេតុការណេ៍គ្រោះថ្នាក់ចរាចរធ្វើឲ្យមានការភ្ញាក់ផ្អើលនេះបានកើតឡើងនៅវេលាម៉ោង៤និង៣០នាទី ថ្ងៃទី១៤ខែមិថុនាឆ្នាំ២០១៥ ស្ថិតនៅចំណុច មុខកាហ្គាស់ឡានយីហោ ជាងយីន ក្នុងភូមិជន្លង់ សង្កាត់សាលាកំរើក ក្រុងសៀមរាប។
សាក្សីអ្នកលក់ដូរនៅជិតកន្លែងកើតហេតុបានឲ្យដឹងថា រថយន្តដឹកដីនេះបានបើកក្នុងល្បឿនលឿនមកពីកើតមកលិចបត ដើម្បីចូលកាហ្គាស់ឡាន តែមិនបានមើលមុខក្រោយ ក៏បុកជាមួយម៉ូតូដែលជិះមកពីលិចមកកើត ម្នាក់ឯងពេញទំហឹងបណ្តាលឲ្យដួលរួចរថយន្តនោះថយក្រោយកិនចំកង់ក្រោយបែកក្បាលចេញខួរស្លាប់ភ្លាមៗតែម្តង។
លោកអនុសេនីយឯក លៃ លឿន នាយរងការិយាល័យចរាចរផ្លូវគោកនៃស្នងការដ្ឋាននគរបាលខេត្ត បានប្រាប់ នៅកន្លែងកើតហេតុឲ្យដឹងថា ក្រោយកើតហេតុមានពលរដ្ឋបានរាយការមកថា មានគ្រោះថ្នាក់ចរាចរដល់ស្លាប់នៅក្រោយភោជនីយដ្ឋានភ្នំស្រីផ្លូវឡើងទៅក្រវ៉ាត់ក្រុង។លោកបន្តថា ពេលនោះលោកនិងកូនចៅបានចុះទៅដល់កន្លែងកើតហេតុភ្លាមៗផងដែរ រួចឲ្យកម្លាំងជំនាញធ្វើការវាស់វែងភ្លាមៗ តែជនបង្កបានរត់គេចខ្លួនបាត់ពេលសមត្ថកិច្ចមកដល់។លោកបន្ថែមថា ជនរងគ្រោះដែលស្លាប់មានឈ្មោះ អៀង ភារម្យ ភេទប្រុសអាយុ៣១ឆ្នាំមានមុខរបរលក់វត្ថុអនុស្សាវរីយ៍មានទីលំនៅភូមិខ្នារ សង្កាត់ជ្រាវ ក្រុង
សៀមរាប បានជិះម៉ូតូម្នាក់ឯងម៉ាកវីវ៉ាព័ណ៌ខ្មៅ ពាក់ស្លាកលេខសៀមរាប ១C.០៤១១ បើកបរមកពីលិចមកកើត រីឯម៉ូតូជនរងគ្រោះខូចខាតទាំងស្រុង។លោកបន្ថែមទៀតថា ចំណែកអ្នកបើកបររថយន្តម៉ាកហ្វី ណូ ពណ៌ស ពាក់ស្លាកលេខកំពង់ចាម ៣A.០៣២៧ បើកបរមកពីកើតមកលិច ហើយបតចូលកាហ្គាស់ឡាន បានគេចខ្លួនបាត់ហើយ។ បច្ចុប្បន្នសមត្ថកិច្ចចរាចរបានប្រគល់សាកសពជនរងគ្រោះឲ្យទៅក្រុមគ្រួសារយកទៅធ្វើបុណ្យតាមប្រពៃណី ចំណែករថយន្តបង្កនិងម៉ូតូត្រូវបានសមត្ថកិច្ចយកទៅរក្សាទុកនៅស្នងការនគរបាលខេត្តសៀមរាបដើម្បីចាត់ការតាមផ្លូវច្បាប់៕ដោយ កុសល
