ខេត្តព្រះសីហនុ
នៅរសៀលថ្ងៃទី១៤ ខែមិថុនា ឆ្នាំ២០១៥ លោកវរសេនីយ៌ត្រី ហ៊ត សីហាមេបញ្ជាការកងរាជអាវុធហត្ថក្រុងព្រះសីហនុបានអំណោយលោកឧត្តមសេនីយ៌ ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ ជាក្តារមឈូសចំនួន០១ និងថវិកាចំនួន ៤០ម៉ឺនរៀល ប្រគល់ជូនដល់គ្រួសារសពប្រជាពលរដ្ឋក្រីក្រដែលស្លាប់ដោយគ្រោះថ្នាក់ចរាចរណ៌កាលពីវេលាម៉ោង១៣ និង៣០នាទី ថ្ងៃទី១៤ ខែមិថុនា ឆ្នាំ២០១៥ នៅលើផ្លូវជាតិលេខ៤ ត្រង់ចំណុចអូរត្រាវ ស្ថិតក្នុងភូមិ១ សង្កាត់លេខ១ ក្រុងព្រះសីហនុ ។
លោកវរសេនីយ៌ត្រីហ៊តសីហាបានឲ្យដឹងថាជនរងគ្រោះក្នុងករណីគ្រោះថ្នាក់ចរាចរណ៌នេះឈ្មោះ ឡោ ទូច ភេទប្រុស អាយុ ២១ឆ្នាំ មានមុខរបរកម្មករនេសាទ ស្រុកកំណើតភូមិទួលស្រងាំ ឃុំភ្នំលាវ ស្រុកកំពង់ត្រាច ខេត្តកំពត បច្ចុប្បន្នស្នាក់នៅក្រុង ព្រះសីហនុ ។ ជនរងគ្រោះបានជួបគ្រោះថ្នាក់ចរាចរណ៌បង្កឡើងដោយរថយន្ត TOYOTA TACOMAពណ៌ឈាមជ្រូក ពាក់ស្លាកលេខភ្នំពេញ 2C-2813 បានបើកទៅបុកម៉ូតូមួយគ្រឿងម៉ាក Honda C- 125 សេរី ២០០៥ ពណ៌ខ្មៅ គ្មានស្លាកលេខ បើកបរក្នុងទិសដៅពីខេត្តព្រះសីហនុទៅភ្នំពេញ ។បុរសរងគ្រោះ បានស្លាប់បន្ទាប់ពីបានបញ្ជូនទៅដល់មន្ទីរពេទ្យបង្អែកចំការចេក ។ ចំណែកអ្នកបើកបររថយន្ត បានរត់គេចខ្លួនបាត់ ។
សូមបញ្ជាក់ផងដែរថានេះជាក្តារមឈូសលើកទី៥៤ ដែលលោកឧត្តមសេនីយ៌ ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ បានផ្តល់ជូនក្រុមគ្រួសារសពប្រជាពលរដ្ឋក្រីក្រ នៅក្នុងខេត្តព្រះសីហនុ និងនៅតាមបណ្តាខេត្តមួយចំនួនទៀត ហើយការជួយឧបត្ថម្ភជាក្តារមឈូសនិងប្រាក់កាសនេះ គឺជាទឹកចិត្ត មនុស្សធម៌របស់លោកមេបញ្ជាការអាវុធហត្ថខេត្ត
ព្រះសីហនុ ។ ព្រោះក្រៅពីការងារស្នូលក្នុងការងារបំពេញភារកិច្ចការពារ ទប់ស្កាត់រាល់បទល្មើសនាៗក្នុងខេត្តព្រះសីហនុ លោក មេបញ្ជាការតែងតែបានចូលរួមការងារក្នុងសង្គមជាច្រើនទៀត ជាមួយសហគមន៌ប្រជាពលរដ្ឋក្នុងខេត្តព្រះសីហនុ ដោយមិនប្រកាន់និន្នាការនយោបាយឪ្យតែមានប្រជាពលរដ្ឋណាម្នាក់ជួបការលំបាកជីវភាពរស់នៅប្រចាំថ្ងៃ លោកមេបញ្ជាការតែងតែបានជួយឧបត្ថម្ភជាបន្តបន្ទាប់ដល់ជនក្រីក្រដើម្បីជួយសំរួលក្នុងជីវភាពគ្រួសាររបស់ពួកគាត់បានមួយកម្រិតផងដែរ ៕
