បន្ទាយមានជ័យៈសមត្ថកិច្ចប៉ូលីសប្រឆាំងបទល្មើសគ្រឿងញៀននៃស្នងការនគរបាលខេត្តបន្ទាយមានជ័យ ក្នុងឆមាសទី១ ឆ្នាំ២០១៥ ករណីគ្រឿងញៀនចំនួន៧៤ករណីត្រូវបានធ្វើការបង្ក្រាប និងចាប់បានជនសង្ស័យចំនួន២២៦នាក់ ព្រមទាំងថ្នាំញៀនជាង២០០ក្រាម ។
លោក ធិន ស៊ិនដេត នាយការិយាល័យប្រឆាំងបទល្មើសគ្រឿងញៀនបានអោយដឹងថា ដោយមានការដឹងនាំផ្ទាល់ និងបញ្ជាពីលោកឧត្តមសេនីយ៍ អាត់ ខែម ស្នងការនគរាបាលខេត្តបន្ទាយមានជ័យ ក្នុងការបង្កា និងទប់ស្កាត់បទល្មើសគ្រឿងញៀនក្នុងខេត្ត ការិយាល័យជំនាញប្រឆាំងគ្រឿងញៀនក្នុងរយៈពេលឆមាសទី១ គិតចាប់ពីថ្ងៃទី១៦ វិច្ឆិកា ២០១៤ ដល់
ថ្ងៃទី១៥ ឧសភា ២០១៥ បានប្រតិបត្តិការណ៍ បង្ក្រាបបទល្មើសគ្រឿងញៀន សរុប៧៤លើក ក្នុងនោះឃាត់ខ្លួនជនសង្ស័យចំនួន២២៦នាក់ ស្រី១៥នាក់ និងបានដកហូតវត្ថុតាងរួមមាន ថ្នាំញៀនប្រភេទមេតំហ្វេតាមីនWYចំនួន៩៦៩គ្រាប់ ស្មើរនិង ៨៨,១៩ក្រាម ថ្នាំញៀនប្រភេទមេតំហ្វេតាមីនទឹកកកចំនួន២៨២កូនថង់ស្មើរនិង១៣២,៥ក្រាម និងទឹកប្រាក់គិតជាដុល្លាប្រមាណជាង៣០០ដុល្លា ព្រមទាំងមធ្យបាយសម្រាប់ធ្វើបទល្មើសរួមមានម៉ូតូ៥គ្រឿង រថយន្ត២គ្រឿង ទូរស័ព្ទដៃ២១គ្រឿង ។ ក្នុងករណីទាំង៧៤លើកខាងលើនេះមាន ករណីជួញដូរ៤៨លើក ករណីរក្សាទុក០៤លើក និង ករណីប្រើប្រាស់២២លើក ។
លោកបន្តថា បើប្រៀបធៀបទៅឆមាសទី១ឆ្នាំ២០១៤បទល្មើសគ្រឿងញៀនមានការកើនឡើងចំនួន៤០លើក ជនសង្ស័យកើនឡើង៨៦នាក់ ថ្នាំញៀនប្រភេទមេតំហ្វេតាមីនគ្រាប់ថយចុះចំនួន១២០គ្រាប់ស្មើរនិង១០,៨ក្រាម ថ្នាំញៀនប្រភេទមេតំហ្វេតាមីនទឹកកកកើនចំនួន២២៩កូនថង់ស្មើរនិង១៨,៧១ក្រាម ។
ចំពោះជនសង្ស័យទាំងអស់ត្រូវបានបញ្ជូនទៅតុលាការ ខ្លះកំពុងជាប់នៅពន្ធនាគា ខ្លះកំពុងតែស្ថិតនៅមជ្ឈបណ្ឌលបន្សាបសារធាតុញៀនភ្នំបាក់ ។
