កំពង់ឆ្នាំង៖ ជារៀងរាល់ថ្ងៃគេពិនិត្យឃើញមានគោយន្តរាប់សិបគ្រឿងបានបើកបន្តកន្ទុយគ្នាទៅកាប់យកកូនឈើមិនទាន់គ្រប់អាយុគ្រប់ប្រភេទពីក្នុងតំបន់ដែនជម្រកសត្វព្រៃភ្នំឱរ៉ាល់ និងមួយចំនួនទៀតកាប់ចេញពីតំបន់កាន់កាប់ដោយរដ្ឋបាលព្រៃឈើ មកអង្កន់ធ្វើជាអុសស្ទែរលក់អោយឈ្មួញ ដោយក៏មានការបោះបង្គោលយកដីព្រៃនៅក្នុងតំបន់ដែនជម្រកសត្វព្រៃភ្នំឪរ៉ាល់ពីក្រុមជនខិលខូតផងដែរ ហាក់ដូចជាគ្មានការអើការបង្ក្រាបពីមន្ត្រីជំនាញ ឬពីសមត្ថកិច្ចណាមួយឡើយ។ ប្រជាពលរដ្ឋសុំសំណូមពរដល់អាជ្ញាធរស្រុកខេត្ត និងជំណាញជួយចាត់វិធានការទប់ស្កាត់នូវសកម្មភាពទាំងអស់នេះផង។ព្រោះថា សកម្មភាពនេះបានធ្វើអោយបាត់ដង់កូនឈើព្រៃគ្រប់ប្រភេទពីតំបន់នោះជារៀងរាល់ថ្ងៃ និងអាចធ្វើអោយកើតមានគ្រោះធម្មជាតិផ្សេងៗ កើតមានឡើង ប៉ះពាល់ភាពសុខសាន្តរបស់ប្រជាពលរដ្ឋ។
សកម្មភាពខាងលើនេះលោក ពារ គឹមហេង នាយផ្នែករដ្ឋបាលព្រៃឈើរមាសបានបញ្ជាក់អោយដឹងនៅរសៀលថ្ងៃទី១៦.០៦.១៥ថា៖ការកាប់បំផ្លាញកូនឈើយកមកធ្វើជាអុសលក់គឺពិតជាមានខ្លះមែន ដោយបានកាប់ចេញពីដីក្រុមហ៊ុនចិនឈូសឆាយ និងមួយផ្នែកទៀតកាប់ចេញពីដីព្រៃឯកជន តែសង្កាត់រដ្ឋបាលជលផលរបស់លោកបានខិតខំទប់ស្កាត់ករណីនេះជាបន្តបន្ទាប់មក។ ពីមុនការគ្រប់គ្រងព្រៃឈើរបស់សង្កាត់លោកគឺមានវិសាលភាពធំទូលាយ ម្លោះហើយជនល្មើសតែងតែឆ្លៀតឱកាសលួចចូលឆ្មក់កាប់យកកូនឈើខ្លះ តែបច្ចុប្បន្នផ្ទៃដីព្រៃកាន់កាប់ដោយសង្កាត់រដ្ឋបាល ព្រៃឈើលោកនៅសល់ប្រមាណជាង១ពាន់ហិកតាប៉ុណ្ណោះ កន្លងទៅនេះថ្មីៗនេះដីព្រៃមួយចំនួនបានកាត់អោយទៅប្រជាពលរដ្ឋអាស្រ័យផល ហើយមានសហគមន៍ចំនួន៣កំពុងជួយថែរក្សាបន្ថែមទៀតការលួចកាប់បំផ្លាញកូនឈើមានតិតួចប៉ុណ្ណោះ។
ចំណែក លោក ប៊ឿ ប៊ុនថន នាយកដែនជម្រកសត្វព្រៃភ្នំឱរ៉ាល់បានអោយឆ្លើយអោយដឹងថា៖ការគ្រប់គ្រងតំបន់ដែនជម្រកសត្វព្រៃភ្នំឱរ៉ាល់ ពិតជាជួបការលំបាកខ្លាំងណាស់ ព្រោះផ្ទៃដីព្រៃមានទំហំធំទូលាយ គ្របដណ្តប់ចំនួន៤ឃុំ គឺឃុំក្បាលទឹក ឃុំជៀប ឃុំខ្លុងពពក និងឃុំក្រាំងស្គារ ចំណែកកម្លាំងការពារដែនជម្រកសត្វព្រៃមានតែ១៥នាក់តែប៉ុណ្ណោះ។នៅពេលខ្លះកម្លាំងរបស់លោក ត្រូវបានក្រុមជនល្មើសដែលមកកាប់ឈើមានគ្នាច្រើន និងផឹកស្រាស្រវឹង គំរាមសំឡុតរកសំលាប់វិញក៍មានដែរ។ ដោយឡែកការចាប់យកដីព្រៃនៅក្នុងដែនជម្រកសត្វព្រៃភ្នំឱរ៉ាល់គឺពិតជាកើតមានមែន ប៉ុន្តែកន្លងមកមន្ត្រីរបស់លោកបាននាំគ្នាដកដង្គោលបោះចាប់យក្ដីព្រៃចោលជាច្រើនលើកមកហើយ ដែលពួកជនខិលខូចទាំងនោះតែងតែបំផុសប្រជាពលរដ្ឋមកចាប់យកដីព្រៃក្នុងដែនជម្រកសត្វព្រៃស្រេចតែចិត្ត ដើម្បីផលប្រយោជន៍បុគ្គល។
លោក ម៉េង ហាក់ អភិបាលស្រុកទឹកផុសបានបំភ្លឺអោយដឹងថា៖បទល្មើសកាប់បំផ្លាញកូនព្រៃឈើនៅក្នុងស្រុកទឹកផុស ពេលនេះបានថយចុះមួយកំរិតគួរហើយ ព្រោះថាកន្លងមកអាជ្ញាធរស្រុក រួមនឹងសមត្ថកិច្ចបានធ្វើការអំពាវនាវតាមគោលការណ៍លោកអភិបាលខេត្តក្នុងពេលប្រជុំវេទិការសាធារណៈជាញឹកញាប់ ដល់បងប្អូនប្រជាពលរដ្ឋមួយចំនួនដែលមានម៉ាស៊ីនង៉ោង(ម៉ាស៊ីនត្រង់សឺន័រអារឈើកាន់ដៃ)អោយស្ម័គ្រចិត្តប្រគល់ជូនអាជ្ញាធរ សមត្ថកិច្ច។ក្នុងរយៈពេល១ខែកន្លងមកនេះ អាជ្ញាធរស្រុក និងសមត្ថកិច្ចបានទទួលម៉ាស៊ីនង៉ោងនេះ ពីប្រជាពលរដ្ឋស្ម័គចិត្តបានចំនួន១៤២គ្រឿង ហើយនឹងត្រូវស្នើសុំថ្នាក់លើកំទេចចោលទាំងអស់ក្នុងពេលឆាប់ៗខាងមុខនេះ។ លោកក៍សុំអំពាវនាវបន្ថែមទៀតដល់ប្រជាពលរដ្ឋដែលនៅមានម៉ាស៊ីនង៉ោងនេះ អោយស្ម័គ្រចិត្តប្រគល់ជូនសមត្ថកិច្ចនិងអាជ្ញាធរ ជៀងវាងការប្រឈមមុខនឹងការដកហូត តាមផ្លូវច្បាប់ ដើម្បីរួមគ្នាថែរក្សាបរិស្ថានព្រៃឈើ អោយបានគង់វង្ស ទើបអាចកាត់បន្ថយបាននូវគ្រោះថ្នាក់ធម្មជាតិផ្សេងៗមកលើទឹកដីរបស់យើង៕ 
