.ឧត្តរមានជ័យ. កាលពីរសៀលថ្ងៃទី១៧.ខែមិថុនា.ឆ្នាំ២០១៥.កម្លាំងសមត្ថកិច្ចចំរុះ ស្រុក និងខេត្ត ចុះបង្ក្រាបឈើក្រញូងជាច្រើនតោនដែលក្រុមឈ្មួញលាក់ទុកនៅក្នុងផ្ទះនិងនៅខាងក្រោយផ្ទះ នៅចំណុចភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យកាលដែលកម្លាំងចំរុះ ចុះបង្ក្រាបឈើក្រញូងនោះ ដឹកនាំដោយលោកសោ សុភ័ក្រ ព្រះរាជអាជា្ញរងអមសាលាដំបូងខេត្តឧត្តរមានជ័យ និងលោកទៀង ដាវិទ្យនាយខណ្ឌរដ្ឋបាលព្រៃឈើខេត្តឧត្តរមានជ័យ និងលោកឃុន ប៊ុន ហេង នាយផ្នែករដ្ឋបាលព្រៃឈើគ្រប់គ្រងចំនួន២ស្រុក ហើយនៅក្នុងការចុះបង្ក្រាបឈើក្រញូងនោះ រួមមានអាជា្ញធរភូមិ.ឃុំ ស្រុក និងកម្លាំងរដ្ឋបាល
ព្រៃឈើស្រុក.រដ្ឋបាលព្រៃឈើផ្នែក.រដ្ឋបាលព្រៃឈើខណ្ឌនិងបវិស្ថានស្រុក កងរាជអាវុធហត្ថស្រុកត្រពាំងប្រាសាទ។លោកទៀង ដាវិទ្យ នាយខណ្ឌរដ្ឋបាលព្រៃឈើខេត្តឧត្តរមានជ័យ បានឲ្យដឹងថា ឈើក្រញូងដែលកម្លាំងចំរុះ ចុះចាប់បង្ក្រាបនោះ រួមមានវត្ថុតាងឈើក្រញូងចំនួន២៤៥ដុំ ដើម្បីដកហូតយកទៅរក្សាទុកនៅខណ្ឌរដ្ឋបាលព្រៃឈើខេត្តឧត្តរមានជ័យ វីឯម្ចាស់ផ្ទះមានឈ្មោះជឿន និងឈ្មួញឈើក្រញូងនោះ សមត្ថកិច្ចកំពុងស្រាវជ្រាវចាប់ឃាត់ខ្លួន និងកសាងសំណុំរឿងទៅតាមនិតិវិធីច្បាប់៕ 
