ខេត្តឧត្តរមានជ័យ៖
សមត្ថកិច្ចចម្រុះក្នុងស្រុកត្រពាំងប្រាសាទ ដឹកនាំបញ្ជារួម ដោយលោក សោ សុភ័គ្គ ព្រះរាជាអាជ្ញារង ខេត្តឧត្តរមានជ័យ កាលពីល្ងាចម្សិលមិញ ថ្ងៃទី១៨ ខែមិថុនា បានចុះបង្ក្រាប ទីតាំងផ្ទះស្តុកឈើគ្រញូងមួយកន្លែង របស់មន្ត្រីយោធាម្នាក់ ដែលលួចលាក់ឈើគ្រញូងជាច្រើនដុំ ស្ថិតនៅក្បែររង្វង់មូលអូរស្វាយ ជាប់ជើងភ្នំដងរែក ក្នុងភូមិអូរស្វាយ ឃុំអូរស្វាយ ស្រុកត្រពាំងប្រាសាទ ខេត្តឧត្តរមានជ័យ ។
ការចុះបង្ក្រាបទីតាំងផ្ទះរបស់មន្ត្រីយោធា សមត្ថកិច្ច រឹបអូសបានឈើគ្រញូងជាច្រើន ដែលម្ចាស់ផ្ទះត្រូវបានគេស្គាល់ឈ្មោះ ជឿន ដែលបម្រើការ នៅការិយាល័យទី២ របស់យោធភូមិភាគទី៤ ជាកូនចៅរបស់លោក ឯក សាបាន ជានាយរង.ការិយាល័យទី២ ភូមិភាគ៤ ប្រចាំទិសទី២។
ចំពោះទីតាំងផ្ទះមន្ត្រីយោធា ស្តុកឈើគ្រញូងខាងលើនេះ ជាប់ជើងភ្នំដងរែក ដែលជាប្រភពឈើគ្រញូង ជាប់ព្រំដែនថៃ ហើយក៏ជាភូមិសាស្ត្ររបស់កងទ័ពផងដែរ នៅពេលសមត្ថកិច្ចចុះទៅដល់មុខទីតាំងផ្ទះ ហើយម្ចាស់ផ្ទះ ជាមន្ត្រីយោធា បានរត់គេចខ្លួនបាត់ ដោយបន្សល់តែវត្ថុតាំងនៅក្នុងទីតាំងផ្ទះប៉ុណ្ណោះ ទើបសមត្ថកិច្ច ប្រមូលដឹកជញ្ជូនមកផ្នែករដ្ឋបាលព្រៃឈើអន្លង់វែង នៅល្ងាចថ្ងៃដដែល រួចធ្វើការវាស់វែង មានចំនួន ២៤៥ដុំ ស្មើរនឹង ១៦៩៣គីឡូក្រាម។
ប្រជាពលរដ្ឋនៅក្បែរ ទីតាំងស្តុកឈើគ្រញូងខាងលើរបស់មន្ត្រីយោធានេះ បាននិយាយថា ទីតាំងផ្ទះខាងលើបានស្តុកឈើគ្រញូងជាច្រើនឆ្នាំមកហើយ ដែលចាំទទួលទិញឈើគ្រញូង នៅពេលពលរដ្ឋខ្មែរ ស្ពាយចុះពីខ្នងភ្នំដងរែក យកមកលាក់ទុករបស់មន្ត្រីយោធារូបនេះ ហើយបន្តឱ្យឈ្មួញ ២នាក់ ដែលត្រូវបានគេស្គាល់ឈ្មោះ មករា និងឈ្មោះ គារ ដែលមានទីលំនៅក្នុងស្រុកអន្លង់វែង ដោយអ្នកទាំង ២នាក់ ត្រូវបានគេដឹងថា ជាប្អូនបង្កើនរបស់មន្ត្រីយោធាម្នាក់ឈ្មោះ អាំង ចូច បម្រើការងារនៅក្នុងអង្គភាពកងពលធំលេខ២ ដែលជាឈ្មួញដុះស្លែរយូរជាងគេនៅក្នុងស្រុកអន្លង់វែង
