សៀមរាប អង្គការសហប្រជាជាតិ បានអនុម័តសំណើរ ដើម្បីយកថ្ងៃទី២១ ខែមិថុនា ប្រកាសជាផ្លូវការថា៖ គឺជាទិវាអន្តរជាតិនៃមហាព្រឹត្តិការណ៍កីឡាលំហាត់ប្រាណ-សម្មាធិ ( YOGA ) ដែលមានសហឧបត្ថម្ភជាតិចំនួន ១៧៧ ប្រទេស លើពិភពលោកបានចូលរួម ។
ថ្ងៃទី២១ ខែមិថុនា ឆ្នាំ២០១៥ ព្រះរាជាណាចក្រកម្ពុជា ដោយមានកិច្ចសហការរវាងក្រសួងទេសចរណ៍ ជាមួយស្ថានទូតនៃសាធារណៈរដ្ឋឥណ្ឌា មហាព្រឹត្តិការណ៍អន្តរជាតិស្តីពី YOGA បានធ្វើឡើងជាលើកទី១របស់ខ្លួន នៅមុខប្រាសាទអង្គរវត្ត(ក្រុងសៀមរាប) និងនៅមុខព្រះបរមរាជវាំង(រាជធានីភ្នំពេញ) ។
នៅមុខប្រាសាទអង្គរវត្ត ដែលជាបេតិកភ័ណ្ឌជាតិកម្ពុជា និងបេតិកភ័ណ្ឌនៃមនុស្សជាតិ នាព្រឹកថ្ងៃទី២១ ខែមិថុនា ឆ្នាំ២០១៥ បានទទួលភ្ញៀវជាតិ និង ភ្ញៀវអន្តរជាតិ ប្រហែលជិត ២០០០នាក់ ចូលរួមក្នុងព្រឹត្តិការណ៍អន្តរជាតិ YOGA ក្នុងខណពេលដែលបណ្តាប្រទេសផ្សេងៗទៀតនៅលើពិភពលោក កំពុងតែចូលរួមជាមួយព្រឹត្តិការណ៍នេះ ដូចគ្នា ក្នុងថ្ងៃជាមួយគ្នានេះ ។ សាលាខេត្តសៀមរាប អាជ្ញាធរជាតិអប្សរា និងមានវត្តមានផងដែរ សហភាពសហព័ន្ធយុវជនកម្ពុជា(ខេត្តសៀមរាប) បានចូលរួមខ្នះខ្នែង ក្នុងការរៀបចំព្រឹត្តិការណ៍នេះ ។
YOGA គឺជាប្រភេទកីឡាលំហាត់ប្រាណ-សម្មាធិ សម្រួលអារម្មណ៍ សម្រួលចលនាសាច់ដុំ នាំមកការសន្សំសុខភាព ទាំងផ្លូវកាយ និង ផ្លូវចិត្ត ។ នៅក្នុងចំណោមភ្ញៀវជាតិនិងអន្តរជាតិជិត២០០០នាក់ ដែលបានចូលរួមក្នុងព្រឹត្តិការណ៍ YOGA នេះ មានភ្ញៀវមួយចំនួនដែលធ្លាប់បានអនុវត្តលំហាត់ប្រាណ YOGA បាននិយាយថា ៖ ពួកគេចូលចិត្ត និងព្យាយាមថែបំប៉នសុខភាពរបស់ខ្លួនជាមួយ YOGA ។
ឯកឧត្តម សូ ម៉ារ៉ា រដ្ឋលេខាធិការក្រសួងទេសចរណ៍ មានប្រសាសន៍ថា ៖ វាមិនត្រឹមតែជាមោទនភាពរបស់កម្ពុជាដែលបានប្រារព្ធទិវាអន្តរជាតិ YOGA ជាមួយពិភពលោកប៉ុណ្ណោះទេ តែតាមរយៈនៃព្រឹត្តិការណ៍នេះ YOGA ក៏បាននាំយកមោទនភាពនៃវិស័យទេចរណ៍កម្ពុជា ទៅកាន់ពិភពលោកវិញ ផងដែរ ។ ឯកឧត្តមបានបញ្ជាក់ថា ៖ YOGA អន្តរជាតិ ជាមួយនឹងប្រាសាទអង្គរវត្ត ដែលជាអច្ឆរិយៈនៃបេតិកភ័ណ្ឌ ជាព្រលឹងនៃវប្បធម៌ នឹងក្លាយជាដៃគូនៃការចូលរួមបង្កើតឡើង នូវព្រឹត្តិការណ៍ទេសចរណ៍កីឡាលំហាត់ប្រាណដើម្បីសុខភាព ដ៏ទាក់ទាញសម្រាប់កម្ពុជា នាឆ្នាំខាងមុខ ៕
