ភ្នំពេញ ៖ រថយន្តលុចស៊ីស GS300 បើកបរដោយស្ត្រីម្នាក់បានបុករ៉ឺម៉កកង់៣ដឹកភ្ញៀវបណ្ដាលរងរបួសមនុស្ស៣នាក់ កាលពីវេលាម៉ោង១១និង១៥នាទីយប់ថ្ងៃទី២០ខែមេសាឆ្នាំ២០១៤ តាមបណ្ដោយផ្លូវ១០៨ ស្ថិតនៅក្រោយធនាគារកាណាឌីយ៉ា ក្នុងសង្កាត់វត្តភ្នំ ខណ្ឌដូនពេញ។
ប្រភពព័ត៌មានពីកន្លែងកើតហេតុបានឱ្យដឹងថា មុនពេលកើតហេតុ មានរថយន្តមួយគ្រឿងម៉ាកលុចស៊ីស GS300 ពណ៌ទឹកប្រាក់ ពាក់ស្លាកលេខ ភ្នំពេញ 2M-5590 បើកបរដោយស្ត្រីម្នាក់ បានធ្វើដំណើរតាមបណ្ដោយផ្លូវ១០៨ យ៉ាងលឿនក្នុងទិសដៅពីលិចទៅកើត ខណៈមកដល់ចំណុចកើតហេតុក៏មានរ៉ឺម៉កកង់៣មួយគ្រឿងបានធ្វើដំណើរច្រាស់ទិសគ្នាបើកបរដោយបុរសម្នាក់ទំនងជាស្រវឹង ដឹកភ្ញៀវ ក៏ត្រូវរថយន្តបុកចំពីជំហៀងខាងឆ្វេង បណ្តាលឱ្យ ភ្ញៀវដែលជិះលើរ៉ឺម៉កកង់បីបោកធ្លាក់ពីរ៉ឺម៉ករបួសធ្ងន់ស្រាលចំនួន៣នាក់ ចំណែករថយន្តបាក់កាឡេ ខាងឆ្វេងទៅមុខលែងរួច និងរ៉ឺម៉កម៉ូតូកង់បី ខូចខាតកង់ខាងឆ្វេង។
បន្ទាប់ពីកើតហេតុភាគីទាំងសងខាងប្រកែកយកត្រូវរៀងខ្លួន ហើយសមត្ថកិច្ចមូលដ្ឋានក៏បានទំនាក់ទំនងទៅសមត្ថកិច្ចជំនាញចរាចរដើម្បីមកធ្វើការវាស់វែងយករថយន្តនិងរ៉ឺម៉កកង់៣ទៅរក្សាទុកនៅការិយាល័យចរាចរជើងគោកនៃស្នងការដ្ឋាននគរបាលរាជធានីភ្នំពេញដើម្បីធ្វើការដោះស្រាយ៕
