ខេត្តសៀមរាប៖ អ្នកនេសាទជនជាតិវៀតណាមចំនួន២ក្រុម ត្រូវបានកម្លាំងរដ្ឋបាលជលផលចាប់បាន ខណៈពួកគេចូលទៅធ្វើសកម្មភាពរុញស៊ីបនិងអូសយ៉ាំងកាវក្នុងដែនឡូត៍អភិរក្សលេខ៤ ហើយករណីនេះត្រូវបានទម្លាយថា ជនល្មើសទាំងនោះត្រូវបានគេដោះលែងទៅវិញស្ងាត់ៗ ជាថ្នូរនឹងការផាកពិន័យរាប់លានរៀល ។
សេចក្តីរាយការណ៍ច្បាស់ការពីតំបន់បឹងទន្លេសាបបានបង្ហើបឲ្យដឹងថា នៅវេលាម៉ោង១រំលងអធ្រាត្រឈានចូលថ្ងៃទី២១ខែមិថុនាឆ្នាំ២០១៥នេះ មានមន្ត្រីជលផលមួយក្រុមបានចុះទៅចាប់អ្នកនេសាទជាជនជាតិវៀតណាមចំនួន២ក្រុម មួយក្រុមជាអ្នករុញស៊ីបឃាត់បានចំនួន៣វង់ ,និងមួយក្រុមទៀតជាអ្នកអូសយ៉ាំងកាវដែលជាកូនរបស់លោកមេភូមិវៀតណាមនៅទីនោះមានឈ្មោះ យ៉ យ៉ាំងដី ដែលពួកគេបានលួចចូលទៅធ្វើនេសាទនៅតំបន់អភិរក្សឡូត៍លេខ៤ ក្នុងភូមិសាស្ត្រក្រុងសៀមរាបជាប់ជាមួយព្រំប្រទល់ស្រុកប្រាសាទបាគង។ប្រភពបានបន្តថា បច្ចុប្បន្នក្រុមកូនរបស់មេភូមិមានឈ្មោះ យ៉ យ៉ាំងដី ត្រូវបានគេដោះលែងជាថ្នូនឹងការផាកពិន័យចំនួន១លានរៀល។ប្រភពបន្ថែមថា ចំណែកក្រុមអ្នករុញស៊ីបចំនួន៣វង់នោះកំពុងស្ថិតនៅក្រោមការចរចារគ្នាសិន។
ទាក់ទិនទៅនងករណីនេះដែរ លោក ស្រី កែវសុភក្ក័ នាយផ្នែករដ្ឋបាលជលផលចុងឃ្នៀសបានមានប្រសាសន៍ឲ្យដឹងតាមទូរស័ព្ទនៅរសៀលថ្ងៃទី២១ខែមិថុនាឆ្នាំ២០១៥នេះថា លោកមិនទាន់បានដឹងព័ត៌មាននេះទេ ដោយសារលោកទើបនឹងមកពីប្រទេសថៃ។ចំណែកលោក ព្រិន្ទ សាវិន នាយខណ្ឌរដ្ឋបាលជលផលខេត្តសៀមរាប បានឲ្យដឹងនៅរសៀលថ្ងៃទី២១ខែមិថុនានេះដែរថា លោកមិនបានដឹងទេពីករណីនេះ ប៉ុន្តែលោកថា ចាំសួរទៅមន្ត្រីរបស់លោកសិន។លោកបន្តថា ករណីនេះទំនងជាខាងអធិការជាអ្នកចាត់ការ ព្រោះបើមានករណីដូច្នេះ មន្ត្រីរបស់លោកនឹងរាយការណ៍ភ្លាមៗតែម្តង។ រីឯមន្ត្រីរដ្ឋបាលជលផលខាងជើងបឹងទន្លេសាបឈ្មោះ លោក រដ្ឋា បាន ឲ្យដឹងតាមទូរស័ព្ទនៅរសៀលថ្ងៃទី២១ខែមិថុនាឆ្នាំ២០១៥នេះថា លោកកំពុងការពារនៅតំបន់កំពង់ភ្លក់ ហើយរឿងចាប់បទល្មើសនេសាទនោះលោកមិនទាន់ដឹងទេ។
ជុំវិញករណីខាងលើនេះដែរ លោក ប៊ុន ថាឬទ្ធិ អភិបាលរងខេត្ត និងជាអ្នកនាំពាក្យសាលាខេត្តបានមានប្រសាសន៍តាមទូរស័ព្ទនៅរសៀលថ្ងៃទី២១ខែមិថុនាឆ្នាំ២០១៥នេះថា
រឿងករណីខាងលើនោះ លោកមិនទាន់មាននរណាប្រាប់មកលោកទេ ចាំលោកសួរទៅខាងជលផលសិន។
ករណីចាប់អ្នកនេសាទល្មើសច្បាប់ខាងលើនេះ មិនត្រូវបានសមត្ថកិច្ច ជំនាញណាម្នាក់បានដឹងពីករណីនេះនៅឡើយទេ នេះបើតាមការធ្វើបទសម្ភាសន៍សួរនាំរបស់អ្នកកាសែតដូច្នេះគេនៅមិនទាន់ដឹងថា ជនល្មើសមានចំនួនប៉ុន្មាននាក់នៅឡើយទេ។
នៅតំបន់ឡូត៍នេសាទលេខ៤ត្រូវបានគេយាមកាមយ៉ាងតឹងរឹងពីសំណាក់សមត្ថកិច្ចចំរុះគ្រប់ស្ថាបន័ពាក់ព័ន្ធទាំងអស់ ហើយគេមានការងើយឆ្ងល់ថា ហេតុអ្វីបានជាមានអ្នកចូលទៅធ្វើនេសាទនៅតំបន់អភិរក្សទាំងនោះបាន ហើយបើតាមផ្លូវច្បាប់ក្រុមមន្ត្រីទាំងនោះត្រូវទទួលទោសបែបណាចំពោះមុខច្បាប់៕ដោយ កុសល
