ខេត្តសៀមរាប៖ ទូរដកលុយរបស់ធនាគារចំនួន២របស់ធនាគារកាណាឌីយ៉ានិងធនាគារANZ Royal ដែលដាក់នៅក្នុងផ្សារទំនើបឡាក់គីម៉លត្រូវបានគេវាយកំទេចយកលុយអស់ជាង២០ម៉ឺនដុល្លា បច្ចុប្បន្នសមត្ថកិច្ចធ្វើការឃាត់ខ្លួនសន្តិសុខចំនួន២នាក់យកទៅសួរនាំ។
ហេតុការវាយទូរ ដកលុយរបស់ធនាគារATMចំនួន២កាលពីយប់រំលងអធ្រាត្រឈានចូលថ្ងៃទី២២ខែមិថុនាឆ្នាំ២០១៥ស្ថិតនៅចំនុចក្នុងផ្សារទំនើបឡាក់គីម៉ល ក្នុងភូមិមណ្ឌល២ សង្កាត់ស្វាយដង្គំ ក្រុងសៀមរាប។
ប្រភពពីកន្លែងកើតហេតុបានឲ្យដឹងថា នៅវេលាម៉ោងប្រមាណជា១យប់ឈានចូលថ្ងៃទី២២ខែមិថុនា មានករណីផ្អើលឆោឡោថា ការវាយបំបែកទូរATMនៅក្នុងផ្សារឡាក់គីម៉លយកលុយអស់ជាច្រើន ហើយបន្ទាប់មកក៏ឃើញមានកម្លាំងសមត្ថកិច្ចចំរុះចុះមកត្រួតពិនិត្យនៅកន្លែងកើតហេតុនិងឃាត់ខ្លួនអ្នកយាមនៅផ្សារនោះចំនួន២នាក់ជាសន្តិសុខរបស់ផ្សារឡាក់គីនេះដើម្បីយកទៅសួរនាំនៅស្នងការខេត្ត។ ប្រភពបន្តថា បើតាមការខ្សិបខ្សៀវបាន ឲ្យដឹងថា ចំនួនលុយដែលបាត់បង់ពីក្នុងទូរATMនោះមានចំនួនប្រមាណជាង២០ម៉ឺនដុល្លា។
ជុំវិញករណីខាងលើនេះ លោក ស៊ត ណាឌី ស្នងការនគរបាលខេត្តសៀមរាប មិនអាចសុំការបំភ្លឺពីលោកបានទេនៅរសៀលថ្ងៃទី២២ខែមិថុនានេះ ដោយសារទូរស័ព្ទរបស់លោកហៅចូលគ្មានអ្នកទទួល។ចំណែកលោក នុល រ៉ុង នាយរងការិយាល័យព្រហ្មទណ្ឌកំរិតធ្ងន់ បានប្រាប់ តាមទូរស័ព្ទនៅរសៀលនេះថា ករណីនេះលោកកំពុងស៊ើបអង្គេត ដូច្នេះលោកមិនទាន់ហ៊ានឲ្យព័ត៌មាននោះទេ ដោយរង់ចាំប្រមូលបានភស្តុតាងសិន។
នេះជាលើកទី២ហើយ ដែលមានករណីវាយបំបែកទូរATMក្នុងខេត្តទេសចរណ៍សៀមរាបអង្គរ តែលើកទី១ជនបរទេសជាអ្នកវាយបំបែក ដោយសារ ស្រវឹងជោគជាំ ប៉ុន្តែករណីលើកទី២នេះ ត្រូវបានគេវាយបំបែកទូរយកលុយអស់ជាង២០ម៉ឺនដុល្លា ហើយបច្ចុប្បន្ននេះសមត្ថកិច្ចឃាត់ខ្លួន២នាក់ទៅសួរនាំ ទោះជាយ៉ាងណាក៏គេនៅមិនដឹងច្បាស់ថា មានមនុស្សប៉ុន្មាននាក់ដែលពាក់ព័ន្ធក្នុងករណីនេះនៅឡើយទេ៕ដោយ កុសល
