ខេត្តប៉ៃលិន ៖ ជនសង្ស័យពីរនាក់ ត្រូវបានសមត្ថកិច្ចការិយាល័យប្រឆាំងគ្រឿងញៀនខេត្ត ចាប់ឃាត់ខ្លួនជាបន្តបន្ទាប់ ខណៈជនសង្ស័យម្នាក់កំពុងប្រើប្រាស់ និងម្នាក់ទៀតជាអ្នកជួញដូរគ្រឿងញៀន កាលពីវេលាម៉ោង១០និង៣០នាទីព្រឹកថ្ងៃទី២២ ខែមិថុនា ឆ្នាំ២០១៥ ស្ថិតក្នុងភូមិអូរតាពុកក្រោម សង្កាត់ទួលល្វា ក្រុងប៉ៃលិន ខេត្តប៉ៃលិន ។
ជនសង្ស័យដែលសមត្ថកិច្ចឃាត់ខ្លួន ទី១ ឈ្មោះ ស៊ុំ រ៉េន ភេទប្រុស អាយុ៣៨ឆ្នាំ ជាជាងសិប្បកម្ម ដោយឆែកឆេរឃើញថ្នាំញៀន១គ្រាប់ និងទី២ ឈ្មោះ វ៉ាន់ សម្រស់ ហៅវ៉ាន់ នាង ភេទស្រី អាយុ៤៧ឆ្នាំ មុខរបរលក់នំ ដោយឆែកឆេររកឃើញវត្ថុតាង រួមមាន ថ្នាំញៀនប្រភេទម៉ាទឹកកកចំនួន៣កញ្ចប់តូច និង១កញ្ចប់ធំ និងប្រភេទគ្រាប់មេតំហ្វេតាមីនពណ៌លឿងចំនួន៣១គ្រាប់កន្លះ និងសម្ភារវេចខ្ចប់ថ្នាំញៀនសម្រាប់លក់មួយចំនួន ។ ជនសង្ស័យទាំងពីរនាក់រស់នៅភូមិកើតហេតុខាងលើ ។
លោកវរសេនីយ៍ទោ ឈុន ណាត នាយការិយាល័យប្រឆាំងគ្រឿងញៀនខេត្ត បានឱ្យដឹងថា៖ កម្លាំងល្បាតបានពូនស្ទាក់ឃាត់ខ្លូនអ្នកប្រើប្រាស់ និងជួញដូរគ្រឿងញៀននៅចំណុចខាងលើ លោកក៏សុំការអនុញ្ញាតពីលោកស្នងការនគរបាលខេត្ត និងឆ្លងយោបល់ពីលោក ជុំ សែនសទ្ធា ព្រះរាជអាជ្ញាអមសាលាដំបូងខេត្ត ដើម្បីចុះទៅគោលដៅ រួចបានឃាត់ខ្លួនជនសង្ស័យម្នាក់ ឈ្មោះ ស៊ុំ រ៉េន ភេទប្រុស អាយុ៣៨ឆ្នាំ ជាជាងសិប្បកម្ម រស់នៅកន្លែងកើតហេតុខាងលើ និងឆែកឆេរឃើញថ្នាំញៀន១គ្រាប់ ហើយជននេះ ក៏បានសារភាពថា ខ្លួនបានទិញពីស្ត្រីម្នាក់ ។ លោកបន្តថា៖បន្ទាប់មកសមត្ថកិច្ចយើង ក៏បន្តចុះទៅផ្ទះជនសង្ស័យមុខសញ្ញាជួញដូរគ្រឿងញៀនយ៉ាងសកម្ម ក៏ឃាត់ខ្លួនបានស្ត្រីម្នាក់ឈ្មោះ វ៉ាន់ សម្រស់ ហៅ នាង អាយុ៤៧ឆ្នាំ មុខរបរលក់នំ នៅភូមិខាងលើ ហើយឆែកឆេររកឃើញវត្ថុតាង រួមមាន ថ្នាំញៀនប្រភេទម៉ាទឹកកកចំនួន៣កញ្ចប់តូច និង១កញ្ចប់ធំ និងប្រភេទគ្រាប់មេតំហ្វេតាមីនពណ៌ក្បឿងចំនួន៣១គ្រាប់កន្លះ និងសម្ភារវេចខ្ចប់ថ្នាំញៀនសម្រាប់លក់មួយចំនួន ។
នៅចំពោះមុខសមត្ថកិច្ច ស្ត្រីសង្ស័យបានឆ្លើយសារភាពថា ខ្លួនពិតជាបានរកស៊ីជួញដូរគ្រឿងញៀនប្រាកដមែន ដោយទិញពីជនមិនស្គាល់អត្តសញ្ញាណម្នាក់ ដែលតែងតែយកមកលក់ឱ្យគាត់ ក្នុងរយៈពេល៤ទៅ៥ថ្ងៃម្តង ។ ចំណែកតម្លៃវិញ ថ្នាំញៀនម៉ាទឹកកក១កញ្ចប់ធំ តម្លៃ៥០ម៉ឺនរៀល ហើយគាត់បំបែកទៅជាកញ្ចប់តូចៗ លក់បាន៤ទៅ៥ម៉ឺនរៀល ក្នុង១កញ្ចប់ ។ រីឯប្រភេទគ្រាប់ថ្នាំយ៉ាម៉ា គាត់ទិញពីគេក្នុង១គ្រាប់ តម្លៃ១ម៉ឺនរៀល ហើយលក់ទៅវិញ ក្នុង១គ្រាប់ តម្លៃ១ម៉ឺន៥ពាន់ទៅ២ម៉ឺនរៀល ទើបតែលក់បានប្រហែលជាង១ខែ ក៏ត្រូវសមត្ថកិច្ចចាប់ឃាត់ខ្លួនតែម្តង ។ជនសង្ស័យទាំងពីរនាក់ រួមនឹងវត្ថុតាង ត្រូវបានសមត្ថកិច្ចកសាងសំណុំរឿង នឹងបញ្ជូនទៅសាលាដំបូងខេត្តប៉ៃលិន ដើម្បីចាត់ការតាមនីតិវិធី៕
