ខេត្តប៉ៃលិន ៖ បុរសម្នាក់បានរងរបួសធ្ងន់ ខណៈពេលបុរសរូបនេះដើររុករកអនុផលព្រៃឈើ យកមកលក់ ដើម្បីទ្រទ្រង់ជីវភាពគ្រួសារប្រចាំថ្ងៃ ជាន់លើមីនប្រភេទ72A រួចលូនបានចំងាយ២០០ម៉ែត្រ ទើបជួបអ្នកជួយសង្គ្រោះ ។ ហេតុការណ៏ជាន់មីនប្រភេទ7២A បណ្តាលឲ្យរងរបួសធ្ងន់នេះ បានកើតឡើងកាលពីវេលាម៉ោង៨និង៣០នាទីព្រឹក ថ្ងៃទី២២ ខែមិថុនា ឆ្នាំ២០០១៥ ស្ថិតនៅចំណុចបង្គោលឡាក់៦៨ (អូរតាសុខ) ក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ។ តែរហូតមកដល់វេលាម៉ោង០៤រសៀល ថ្ងៃខែដដែល ទើបមន្ត្រីអង្គការដោះមីន «ហេលឡូត្រាស» សហការជាមួយសមត្ថមិច្ចវរៈព្រំដែនរកឃើញជនរងគ្រោះ ។
លោក កែវ ពៅ នាយសម្របសម្រួលមីនប្រចាំ ខេត្តប៉ៃលិន បានឲ្យអ្នកយកព័ត៌មានកម្ពុជាថ្មីដឹងថាៈ ជនរងគ្រោះមានឈ្មោះ ខេង សំណាង ភេទប្រុស អាយុ២៤ឆ្នាំ ជាកសិករ រងរបួសប្រអប់ជើងធ្វេង(កាត់កជើងធ្វេងចោល) រស់នៅភូមិបរហ៊ុយជើង សង្កាត់បរយ៉ាខា ក្រុងប៉ៃលិន ខេត្តប៉ៃលិន ។ លោកបន្តថាៈមូលហេតុដែលបណ្តាលឲ្យជនរងគ្រោះជាន់មីន រងរបួសនេះ ដោយសារតែជនរងគ្រោះដើររុករកអនុផលព្រៃឈើ (ដើរបេះផ្លែសោមយកមកលក់) ដើម្បីទ្រទ្រង់ជីវភាពគ្រួសារប្រចាំថ្ងៃ នៅចំណុចបង្គោលឡាក់៦៨ (អូរតាសុខ) ជាប់ព្រំប្រទល់ប្រទេសថៃ ក្នុងភូមិបរហ៊ុយត្បូង សង្កាត់បរយ៉ាខា ក្រុងប៉ៃលិន ខេត្តប៉ៃលិន ប្រទេសកម្ពុជា ។ 
លោកបន្តទៀតថាៈ ករណីនេះដែរ ដោយជនរងគ្រោះមានស្មារតីរឹងមាំ ក្រោយពីជាន់មីនផ្ទុះភ្លាម ជនរងគ្រោះលូនបានចំងាយ២០០ម៉ែត្រ ហើយក៏ទូរស័ព្ទប្រាប់ប្រពន្ធឲ្យដឹង រួចក៏មានការភ្ញាក់ផ្អើលកើតឡើង ពេលនោះប្រពន្ធជនរងគ្រោះ ក៏ទៅប្រាប់មេភូមិបរហ៊ុយត្បូងបន្តទៀត បន្ទាប់មកលោកមេភូមិ ក៏ទូរស័ព្ទមកក្រុមCBMR ស្រុក-ក្រុងឲ្យជួយសង្គ្រោះ ។ លុះនៅវេលាម៉ោង០៤រសៀល ទើបមន្ត្រីអង្គការដោះមីន ឈ្មោះ«ហេលឡូត្រាស» សហការជាមួយសមត្ថកិច្ចវរៈព្រំដែនស្វែងរកជនរងគ្រោះឃើញ រួចបញ្ជូនមកសង្គ្រោះនៅមន្ទីរពេទ្យបង្អែកខេត្តប៉ៃលិន ។
សូមបញ្ជាក់ថាៈ រយៈពេលជិត៦ខែក្នុងឆ្នាំ២០១៥ នេះ មានករណីគ្រោះថ្នាក់ដោយយុទ្ធភ័ណមិនទាន់ផ្ទុះ ចំនួន០៥ ករណី ក្នុងនោះករណីផ្ទុះមីនមាន០២ ករណី , កែឆ្នៃគ្រាប់០២ ករណី ,កែឆ្នៃផាវផ្ទុះ ០១ ករណី ទាំង០៥ករណីនេះដែរ បណ្តាលស្លាប់បុគ្គលិកCMAC ម្នាក់ផងដែរ ៕
