កំពង់ឆ្នាំង៖ ស្ត្រីមេម៉ាយក្រីក្រឈ្មោះ តុល ចាន់នី នៅភូមិកំពង់រាំង ឃុំស្វាយជ្រុំ ស្រុករលាប្អៀរខេត្តកំពង់ឆ្នាំងមានជម្ងឺរលាកផ្លោកនោមនិងពោះវៀនធ្ងន់ធ្ងរ ដែលនាងអាចរស់នៅបានតែ១ខែ និង៨ថៃ្ងទៀតតែប៉ុ ណ្ណោះតាមគ្រូពេទ្យប្រាប់គិតចាប់ពីថៃ្ងនេះទៅ ហើយត្រូវចិញ្ចឹមកូន៣នាក់ក្នុងបន្ទុក នៅព្រឹកថ្ងៃទី២២ ខែមិថុនា ឆ្នាំ២០១៥ ត្រូវបានលោក ប្រាក់ សោភ័ណ នាយកប្រតិបត្តិសាខាកាកបាទក្រហមខេត្តកំពង់ឆ្នាំងរួមដំណើរដោយលោកស្រី វង្ស សាតស៊ុនលី អនុប្រធានសាខាកាកបាទក្រហមស្រុករលាប្អៀរនិងសហការី បានចុះសាកសួរសុខទុក្ខ និងបាននាំយកអំណោយរបស់សាខាកាកបាទក្រហមខេត្តកំពង់ឆ្នាំង ទៅ
ផ្តល់ជូន ដល់ផ្ទះជនក្រីក្រដល់មូលដ្ឋាន។
លោកស្រី វង្ស សាតស៊ុនលី អនុប្រធានសាខាកាកបាទក្រហមស្រុករលាប្អៀរបានអោយដឹងថា៖អំណោយផ្តល់ជូនស្ត្រីក្រីក្រឈ្មោះ តុល ចាន់នី ចិញ្ចឹមកូន៣នាក់ក្នុងបន្ទុកនិងមានជំងឺប្រចាំកាយធ្ងន់ធ្ងរបានទទួលអំណោយពីសាខាកាកបាទក្រហមខេត្តកំពង់ឆ្នាំងរួមមានអង្ករ៣០គី ឡូក្រាម, មី១កេះ, ត្រីខ១០កំប៉ុង, ក្រម៉ារ១ ,មុង១ ,ភួយ១,សារ៉ុង១ និងថវិកា ២០ ម៉ឺនរៀល។
នៅក្នុងឱកាសនោះលោក ប្រាក់ សោភ័ណ នាយកប្រតិបត្តិសាខាកាកបាទក្រហមខេត្តកំពង់ឆ្នាំងបានពាំនាំប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចគតិព្រឹទ្ធបណ្ឌិតប៊ុនរ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចជាកាល សម្តេចតែងតែផ្តល់អំណោយមនុស្សធម៌ ជួយសង្គ្រោះដល់ប្រជាពលរដ្ឋទីទាល់ក្រគ្រប់ទីកន្លែង ដោយមិនប្រកាន់ពូជសាសន៍និងនិន្នាការនយោបាយអ្វីឡើយ។
លោក ប្រាក់ សោភ័ណ ក៍បានផ្តាំផ្ញើផងដែរដល់ប្អូនស្រី តុល ចាន់នី កុំអស់សង្ឃឹមក្នុងជីវិត ត្រូវពង្រឹងស្មារតីឡើងវិញ ហើយត្រូវចេះថែទាំសុខភាពអោយបានល្អ និងមានអាយុវែងហើយគ្រប់គ្រងកូនចៅអោយបានរៀនសូត្រសំរាប់អនាគតកូនៗរបស់ប្អូនស្រីទៅថៃ្ងខាងមុខ។
ពេលបានទទួលអំណោយខាងលើប្អូនស្រី តុល ចាន់នី បានលើកដៃសំពះ សូមថ្លែងអំណរគុណដល់សម្តេចតេជោហ៊ុនសែន និងសម្តេចគតិព្រឹទ្ធបណ្ឌិតប៊ុនរ៉ានីហ៊ុនសែន សូមអោយសម្តេចទាំងទ្វេរជួបតែសេចក្តីសុខ និងពុទ្ធពរទាំង៤ប្រ ការគឺអាយុ វណ្ណៈ សុខៈ និងពលៈ រហូតតទៅ ដើម្បីដឹកនាំប្រទេសកម្ពុជាអោយបានសំបូរសម្បាយរុងរឿងទៅអនាគត៕
