ភ្នំពេញ ៖ ម៉ូតូ២គ្រឿងបានបុកគ្នាពេញទំហឹងបណ្ដាលអោយអ្នកបើកបររងរបួសធ្ងន់និងស្រាល៣នាក់ ដែលហេតុការណ៍នេះបានកើតឡើងកាលពីវេលាម៉ោង១និង១០នាទីរំលងអាធ្រាត្រឈានចូលថ្ងៃទី២០ខែមេសាឆ្នាំ២០១៤ តាមបណ្ដាយផ្លូវ៥៥៥ ក្នុងសង្កាត់ទឹកថ្លា ខណ្ឌសែនសុខ។
តាមប្រភពព័ត៌មាននៅកន្លែងកើតហេតុបានអោយដឹងថានៅមុនពេលកើតហេតុមានម៉ូតូមួយគ្រឿងម៉ាកហុងដាឌ្រីម ធុនសេ១២៥ ពណ៌ខ្មៅ ពាក់ស្លាកលេខ1CE-3820 ជិះដោយបុរសម្នាក់និងរួមដំណើរជាមួយនារីម្នាក់ផងនោះបានធ្វើដំណើរតាមបណ្ដោយផ្លូវ៥៥៥ក្នុងទិសដៅពីត្បូងទៅជើងដោយជិះក្នុងល្បឿនលឿនស្រាប់តែមកដល់ចំនុចកើតហេតុខាងលើក៏បានជ្រុលមកបុកគ្នាជាមួយម៉ូតូមួយគ្រឿងទៀតម៉ាកស្មាស់វី ពណ៌ខ្មៅ ពាក់ស្លាកលេខ1BM-8933 ជិះដោយបុរសម្នាក់ធ្វើដំណើរទិសដៅពីជើងទៅត្បូងច្រាស់គ្នា ក៏បុកគ្នាចំពេញទំហឹងបណ្ដាលអោយម្ចាស់ម៉ូតូទាំង២រងរបួសធ្ងន់និងស្រាល។
ក្រោយកើតហេតុសមត្ថកិច្ចចរាចរនគរបាលខណ្ឌសែនសុខបានចុះវាស់វែងនិងយកម៉ូតូទាំង២គ្រឿងទៅរក្សាទុកនៅអធិការដ្ឋាននគរបាលខណ្ឌសែនសុខដើម្បីរង់ចាំធ្វើការដោះស្រាយ៕
